Lulanga lwa 47

Nyamuzinda Mwâmi w’Israheli n’ow’igulu lyoshi

1 Gwârhi omukulu w’abimbiza. Lwa bene Korè. Lulanga.

2 Mwe mashanja mweshi, mukome akagasha mucîtakîre Nyamuzinda n’enshagadu.

3 Bulya Nyakasane w’enyanya arhajîbwa omw’irhwe, ye Mwâmi Nn’amahanga goshi.

4 Ayansire amashanja agahira idako lîrhu, agayandaza burhaba aha magulu gîrhu.

5 Yêne acîshoga ishwa rhwayimamwo, ishwa omurhonyi wâge Yakôbo akazâg’icîtakîrira.

6 Nnâmahanga oyo warherema omu karhî k’orhuhababo, Nyakasane oyo wasôka emishekera yashekeza.

7 Muzihire Nnâmahanga, muzihe, muzihe; muzihire Nnawîrhu, muzihe, muzihe!

8 Bulyâla Nyamuzinda, ye Mwâmi w’igulu lyoshi lyoshi, mumuzihire olulanga.

9 Nyamuzinda ye wârhegeka amashanja goshi, Nyamuzinda oyôla otamîre oku ntebe yâge ntagatîfu.

10 Abaluzi ba ngasi ishanja batamîre aha ngombe, batamîre boshi n’ishanja lya Abrahamu.

Abaluzi ba ngasi ishanja boshi banali bagula ba Nyamuzinda, ali w’enyanya bwenêne.