Lulanga lwa 61

Omusengero gw’olulizîbwe

1 Gwârhi omukulu w’abimbiza. Oku nzihwa z’emisî. Lwa Daudi.

2 Oyumve guno mulenge gwâni mâshi Nnâmahanga, orhege guno musengero gwâni amarhwîri.

3 Ndwîrhe nakubirikira na ndi ekulî, bulyâla amagala gandîre. Ondengereze okw’ibuye onampè obuluhûkiro.

4 Wêne we lwâkiro lwâni we n’ibuye ncîfulikaho nka nshimbirwe n’omubisha.

5 Kurhi nankabona nabêra omu mwâwe ensiku zoshi, mbone nyâkîre omu lukangà lw’ebyûbi byâwe wâni!

6 Nnâmahanga, nêci wayumvirhize omusengero gwâni, wanshobôzize akashambala abakenga izîno lyâwe bashobôla.

7 Ensiku za mwâmi ozihirekwo ezindi, emyâka yâge eyumânane n’ey’owamayâlusa kanji kanjî.

8 Ayôrhe arhegeka omu masù ga Nyamuzinda, omurhumîre oburhonyi n’obudahemuka bikaz’imulanga.

9 Nyimbirage izîno lyâwe obwo nnanyûkirize emihigo yâni bwaca bwayira.