1 Lulanga. Lwa Daudi. Amango àli omu irungu lya Yûda.

2 Nnâmahanga we Nyamuzinda wâni, w’ono ndwîrhe nalongereza. Nyôrha yâwe omurhima gwâni gwalwâla, ndwîrhe nakwifinja nieshi nieshi nka kul’idaho lyûmu licîfinja amîshi bwenêne.

3 Nkulolekwo omu bwâmi bwâwe, mbone bulya buhashe bwâwe n’irenge lyâwe.

4 Okurhona emund’oli kulushire obuzîne, akanwa kâni kakukuze là.

5 Oku nciyîs’omûka erhi kugashâniza nnankugashâniza, nalengereza amaboko emund’oli okukuza izîno lyâwe.

6 Omurhima gwâni gudendêze obwo ak’owalyag’ey’amashushi, n’akanwa kâni kayunjule mwishîngo kanakukuze.

7 Erhi nacikukengera nangwishîre, obudufu bunakule erhi wêne nakengêra.

8 Bulya nêci washubire mufungizi wâni, n’omu byûbi byâwe nuno ndwîrhe nacîshingira.

9 Omurhima gwâni gukwishwekìrekwo; n’okulyo kwâwe kwo nyegemîre

10 Balya badwîrhe balonza okumpeza, bajè omuw’idaho kuli kulî.

11 Engôrho ebamîme, ebibwa bibashêge,

12 Mwâmi yêhe Nnâmahanga acîtakîra; ngasi muntu ocîtakìra Nyamuzinda kukuzibwa anakuzibwa, bulya akanwa kaderha ebibî kuhumbârhala kanahumbârhala.