1 Den Pol, net mugumgu non Ḡod wa nahal non Tigsas Kraēs. Kē mēvētleg no hiy ige mey a kē mal vonyak vatag kēy, tō so ak maymay nēdēmtig nonoy. Wa tō nok so vatne kēy mi nēhēyhēywē tō so kēy so dam nitiy metevun Ḡod. 2 Nēdēmtig nan nitig maymay how lavatvat non Ḡod. Veg am̄ag a namyam tateh qete en, kē mavatvat tō so lep nēh lap van hiy ige nonon. Ḡod tit galgal vēhte, tō gēn dēmdēyē nēh a tit bah vēhte. 3 Tō mavan me lōqōn̄ tenenen en, kē mavasemlō nohohole nonon. Ḡod Ivaēh nongēn mōm̄ōk veteg me noyoy nan lemnēk, tō nivap hiy maymay no so nok toytoy.

4 Hiy Titus, intik tenenen heylō nēdēmtig nondō.

Nasgōp wa natm̄at non Ḡod Imam wa Kraēs Tigsas, Ivaēh nongēn, notogtog lap mi nēk.

5 No mavan veteg nēk n̄a Krit veg namgumgu gōh, tō so nēk m̄ōk galsi namgumgu mey a dōyō et ak qēt te, wa tō m̄ōk kal ige m̄agoy ēm̄ yon̄ vel vōnō del, qele a no mōlvayēg tō nēk aē. 6 M̄ōk ige et mey a namtevuy nēwē hiy ige sil, wa ēgnōy vitwag wōy ēwē, wa tō yantēntēn en, kēy nēdēmtig wa kēy et vanvan soloteg te ba notog leln̄e yon̄teg.

7 Veg ige nibisop en, kēy net betetgoy nēm̄ yon̄ non Ḡod. Tō itōk so sok tow ige mey a ige sil et van so namtevuy nēwē. M̄ōk ige mey a et dēm liwo te kēy, et lolgagay towoyig te, et inin memeh te nawaen, et net bēvēvēhyuw te, wa tō kēy et net bemyōmyōs kokoym̄eg te nēsēm. 8 Ba kēy net beleplep vasgēt ige halvan, kēy nemyōs nahaphap mey a vēlēs wē geh ōk, kēy net muhuy, kēy netnenen, kēy noyon̄, wa nēdēmdēm hoyo aē mi kēy. 9 Tō kēy tētēy maymay nitiy yoy ēwē a nivan me den ige hal. Kēy so tēy maymay navatvatne tenenen tō so kēy tavahiy vēh ige sil mi navatvatne mey nēwē, mey a niak maymay nēdēmtig nonoy. Wa tō kēy tohole maymay vēh van hiy ige mey a et buste navatvatne tenenen.

10 Veg togtōkē woqse et mēqēt maymay, a kēy galgal nisil, yakhagyeh ige a nemyōs so ak vēglal nisil tatag van nele non ige Juw. Nohohole nonoy yeghuquy. 11 Gatgoy kēy so kēy tog hohole van hiy nisil. Veg kēy vatvatne navatvatne mey a nagatgoy, tō kēy akak hethet nēdēmtig non ige lelo ēm̄ vivitwag aē. Kēy damdam namtehal mey a nehet tō so van me m̄eye haphap.

12 Net lēgēlgēg tam̄ag nonon ige Tikrit, kē mavap so, "Ige Tikrit kēy net galgal vaga, ikēy qeleso noqo tuytuy, ikēy namyen̄ wa negengen memeh." 13 Ba nohohole nonon hēywē. Veg bege gōh en, nēk hole maymay van hiy kēy ak tō so nēdēmtig nonoy nimaymay lokse. 14 Ōlgontegoy kēy tō so kēy tit yon̄teg vēhte nakaka galgal tam̄ag non ige Juw, wa tō kēy et tatag te nele non ige a mepsipteg nēhēyhēywē.

15 Net mey a nēdēmdēm nonon newenwen galsi en, negengen del newenwen hiy kē.*1:15 Pol nihohole veg nele tam̄ag non ige Juw, qele a nele a so nitog gengen negengen a et wenwen te. Ba ige mey a nēdēmdēm nonoy et wenwen te en, wa kēy et dēmtig te, tateh gengen mey newenwen hiy kēy. Ba nēdēmdēm het mal ak hethet nēdēmdēm nonoy, tō kēy tit mamayge vēhte aē. 16 Kēy galgal so kēy nēglal Ḡod, ba kēy lēn̄lēn̄teg kē bemgumgu nonoy, veg namgumgu nonoy et tenenen te lengon Ḡod. Kēy ige het, nēqēt maymay, tō kēy et sey te bemgumgu togolgol del agōh.