João 6

Yesu ayedjai bato koto itano

1 Ngɔngɔ djia, Yesu akɛɛ ta dɔngɔ ikina la ibeke ilinɔi na onɛnɛ la Galilai – ekabee bo koko ibeke ilinɔi na onɛnɛ la Tibelia. 2 Emumu ɛ bato bamokimanaka, tina ɛ boo baenɛkɛ bimbete baokamoa ibakɔmɔkɔ na nde ena ɔheledjaka yo bato ba bipeko. 3 Ta tina hee, Yesu ahwea ta ngomba ko adaa ena yo na batingami ba nde. 4 Na bea, tɛkɛ ɛ Bayuda ɛ Pasika eimeaka mbuti. 5 Yesu ahokea ko aenɛ emumu ɛ bato ɛdoe odii yo; bea ahɔdja Pilipo boo: «Ohɔniso osomba mapa bɛngɛ labapɛ oya ibo basusu hɔɔ?» 6 Abala bea tina ɛ omeka Filipo, tina ɛ boo adjebaka ehele modjɔ imahombaka yo boo akɔe. 7 Pilipo amosɔmbɛdja boo: «Noko na pata dja falanga mikama mibae, lohɔnɛtelea osomba mapa boo moto na moto adihe maa ekenge mokɛkɛ.» 8 Okina ɔ batingami ba nde, Andele, mwɛngɛ Simo Piɛlɛ, abala na nde boo: 9 «Yɛngɛ moomi omɔti adii haa na mapa matano ma ɔlɔdje na swi babae. Endolo ena edii yee ta emumu hee ɛ bato?» 10 Yesu abala boo: «Badedjani basusu.» Ndjani djadaka djinɛnɛ ta esika ena. Na bea badaa bami mbuti na koto itano. 11 Bea Yesu atomba mapa, ko ngɔngɔ dja osakoa Ndjambe, amakaana odii bato ibadaka ena. Akɔɔ moda momɔti na swi, abapa moda imapalaka bo. 12 Ehole ɛgola bo, Yesu abala na batingami ba nde boo: «Tutani bikenge ibidikai, bɛngɛ boo eka emɔti etabunga.» 13 Babituta ko balumedja mapole doomi na mabae na bikenge ba mapa ba ɔlɔdje bitaano ibayaka bo. 14 Ɔenɛ bato embete ena ɛokamoa ɛkɔɔ Yesu, babala boo: «Moto hoo adii sooti mɛɛnɛ motɛli ɔboanaka odoa ta ngondo.»