1 Ehole ɛ batama bo na Yelusalɛmɛ, mbuti na Betefadje na Betania, dɔngɔ la ngomba ɛ mele ma Olive. Yesu asuakedja batingami ba nde babae: 2 «Kɛɛni ta ngando enaho edii boso ba boono. Ehole eimealeano ena, otanealeani mwana ɔ punda* atingi ta mole, moto omɔti apakiti abakama ta diko la nde. Motingoani ko doani na nde haa odii mbai. 3 Ekada boo moto aohɔdjaini boo: "Ɔkɔkɔni bea tina nda?" Mosɔmbɛdjani boo: "Kumu akambaka na nde, endolo pɛpɛ ekoka amosɔmbɛdjalea oko haa."» 4 Bakɛɛ ko batanea mwana ɔ punda, atingi osokolu mbuti na edipako, ta ndjia. Bamotingoa. 5 Bato bakina ibadaka ena babahɔdja boo: «Mua makɔkɔno nda? Tina ɛtingoaka no mwana ɔ punda hoo nda?» 6 Batingami ba basɔmbɛdja moda mabala Yesu, ko babakina bo bakɛɛ na nde. 7 Batomba mwana ɔ punda bakɛɛ na nde odii Yesu; babakea bisendja babobo diko la punda, ko Yesu adaa ena. 8 Bato bike batanda bisendja ba bobo ta ndjia, ko bakina batanda bitape ba mele bamosu ibakɛsɛ bo ta gue. 9 Bato ibadalaka boso ba Yesu na bii ibamokimanaka osangɔngɔ bagamaka boo: «Ozana! Yɛɛ boo adjongoame ona odoi ta kombe ɛ Kumu! 10 Yɛɛ boo Ndjambe adjongoe okumu ibodoi, okumu ba Davidi sangwasu! Ozana ta bisika ibinɔi diko!» 11 Yesu aingea ta Yelusalɛmɛ ko akɛɛ ta tepelo. Ngɔngɔ dja ohokea midjɔ imanɔkɔ mbuti na nde, aimana ko asɔmbɔ ta Betania engbanga na batingami ba nde doomi na babae, tin'ɛ boo eimiaka mɔkɔmɔkɔ.

12 Ngɔngɔ dja iswi imɔti, ehole ɛimana bo ta Betania, Yesu aoka ndja. 13 Aenɛ ohali mole ma figi imadaka na kasa, ko akɛɛ amohokea kaoko moboani oda na mbuma; endolo ehole eimea yo mbuti na mole, atanea oko kasa ngasa, tina ɛ boo ɛidaka edidi ɛ mu ɛ obota mbuma. 14 Bea Yesu abala na mole ma figi boo: «Yɛɛ boo moto omɔti adae pɛpɛ oyaka koko mbuma dja wɛ!» Batingami ba nde baoka modjɔ mua.

15 Ngɔngɔ djia baimea ta Yelusalɛmɛ. Yesu aingea ta opango ba tepelo ko abanga obengana bato ibatɛkɛkɛ na bia ibasombaka ena. Akalimodja mesa dja bato ibasɔmbɔtɔnɔkɔ falanga na bigboto ba batɛki ba bimbenga. 16 Ko aikina noko moto omɔti boo atombe eka akatise na yu tepelo. 17 Bea abanga obaleha modjɔ muu boo: «Ɛkomama boo: "Ndako ɛ mbai ebeamabi ndako ɛ miɔngɔnɔ tin'ɛ mabota masusu." Endolo ino, oyeimedjaini ndako ɛ baibi.» 18 Bakumu babanganga ba Ndjambe bike na bato ba edjebeli ɛ mibeko ɔɔkabo modjɔ mua bahombaka moda ndani ma oowa Yesu; endolo badaka na bɔɔ ba nde tin'ɛ boo bato bike bakamoaka na bileho ba nde. 19 Ehole ɛ tita busa, Yesu na batingami ba nde baimana ta ibonga.

20 Ehole ɛya busa, ena ɔdaka bo banɔe ta itilinga la ndjia, baenɛ mole ma figi: mahɔlɔngɔnɔ mosusu mbunoko ta nginga. 21 Ko Piɛlɛ alɛdjana diko la modjɔ imanɔɔ, ko abala na Yesu boo: «Molehi, hokea, mole ma figi mu imalakedjabi wɛ mohɔlɔngɔni mosusu.» 22 Bea Yesu abala na batingami ba nde boo: «Nabali na nu sooti: daani na edhimeli odi Ndjambe! 23 Kaoko moto akabala na ngomba hee boo: "Donga ena, ko sadumba ta ibeke ilinɔi na onɛnɛ", ko amiti daa na kitɛ ta molema ma nde, akadhima boo modjɔ mobali yo modii okɔɔmɔ, mokɔmɔbi bea ta tina ɛ nde. 24 Na tina hee nabali na nu boo: Ehole ɛ ongɔnɔkɔ no tin'ɛ osɛngɛ eka odii Ndjambe, dhimani boo osidjaini oyediha ko eka ena epamalea odino. 25 Ko ehole emai no diko tina ɛ oongɔnɔ, okada na modjɔ na mino, moyɛɛ, bɛngɛ Tata ɔ boono ona odii odiko aoyɛɛni koko ta obe ba boono. [ 26 Endolo omiti yɛɛni bato bakina, Tata ɔ bono odii odiko aoyɛɛtebini ta mabunga ma boono.]»

27 Basɔmbɔ koko ta Yelusalɛmɛ. Ehole ɛdaka Yesu akɛɛ ko asɔmbɔ ta tepelo, bakumu babanganga ba Ndjambe, bato ba edjebeli ɛ mibeko na basuku ba ngando badoa mbuti na nde. 28 Bamohɔdja boo: «Na kpati ɛ ndani ɔkɔkɔ midjɔ mii? Ona osaopa kpati ɛ omiko nda?» 29 Yesu abasɔmbɛdja boo: «Naohɔdjakani ihɔdja imɔti; okalisɔmbɛdjani, bea naodjebedjaleani na kpati ɛ ndani nakɔkɔ midjɔ mii. 30 Ona ɔloma Yoani boo aine nda? Ndjambe kaoko bato? Sɔmbɛdjanini.» 31 Endolo babanga opana malɛi, basabaleaka boo: «Lokasɔmbɛdja boo: "Edii Ndjambe moto ɔmoloma", alohɔdjalea boo: "Tina ndani oidhimeani Yoani?" 32 Endolo lokasɔmbedja boo: "Edii nde bato bamoloma..."?» – Badaka na bɔɔ ba bato bike tin'ɛ boo ibo basusu badhimaka boo Yoani adii motɛli ɔ sooti. – 33 Bea basɔmbɛdja Yesu boo: «Lotadjeba.» Ko Yesu abala boo: «Mbai ko natadjeba otɔndɔni na kpati ɛ ndani nakɔkɔ midjɔ mia.»