1 Ɔnɔɔ iswi la sabata, Malia ɔ Magadala, Malia nɛngɛ Djake na Salome basomba malasi ma so epele bɛngɛ bakɛɛ asua ndjemba ɛ Yesu. 2 Ta iswi la mbangi ɛ eyenga, sɔɔ mɛɛnɛ, ta imane la diso la busa, bakɛɛ ta esɛmɔ. 3 Basabaleanaka boo: «Olohilingoanedjalea mondeke modipi eingeli ɛ esɛmɔ nda?» 4 Endolo ɔhokea bo, baenɛ boo mondeke, monɛnɛ, mahilingoana yɛɛlɛ. 5 Ɔingea bo ta esɛmɔ; baenɛ mwenga moomi, adii ta ebɔ ɛ bami, alwali mokoto mopu, ko badaa na bɔɔ bonɛnɛ. 6 Endolo mwenga ona abala na bu boo: «Pɛpɛ obangani, ɔhombakani Yesu ɔ Nasaleta, hoo obakaki bo ta ekulusu; apusoi, aditi haa. Hokeani esika emosambeaki bo. 7 Kɛɛ atɔndɔeni hadɛdi batingami ba nde, na Piɛlɛ koko boo: "Yesu akɛi aombani ta Galilai; omoenɛleani oho oko moda mabala yo na nu."» 8 Bea baimana ta esɛmɔ ko batia ohali, badaka bangongome na bɔɔ. Ko baitɔndɔ noko moto omɔti tin'ɛ badaka na bɔɔ.

9 Ngɔngɔ dja opusoa ba Yesu sɔɔ ɛ iswi la mbangi la eyenga, asaenɛmɛdja boso mɛɛnɛ odii Malia ɔ Magadala, ona obengana yo miembo mibe saambo. 10 Akɛɛ atɔndɔ gala ena odii bato ibadalaka na Yesu. Badaka na ndjokwa ko bayea. 11 Endolo ehole ɛoka bo abala boo: «Yesu apusoi, namoeni!» Baimodhimea.

12 Ngɔngɔ djia, Yesu asaenɛmɛdja na moda mokina odii batingami babae ibadaka bakɛɛ ta ngando. 13 Batingami bia basɔmbɔ ko batɔndɔ bakina, baibadhima noko osinɛɛ.

14 Ngɔngɔ djia, Yesu asaenɛmɛdja na batingami doomi na omɔti ta ehole ɛdaka bo bayaka; abapɛlɛ diko la taka ɛ bobo ɛ edhimeli ko na milema ma bobo mipipo odii bii ibamoenɛ ngɔngɔ dja opusoa ba nde. 15 Bea abala na bu boo: «Kɛɛni ta ngondo esusu ko lehani Mwako Mopele odii bato basusu. 16 Moto ona odhimabi ko oinamabi ahelabi; endolo ona odabi pɛpɛ odhima adihabi etumbu. 17 Ko hokeani bimbete ibienɛmɛbi odii bato ibadhimabi: babenganabi miembo mibe ta kombe ɛ mbai; babalabi kɔpɛ dja yanie; 18 bakapea ndjɔ na mabɔ ma bobo, kaoko bakamwa moselo, modjɔ mobe motakɔmɔ na bu; babakeabi mabɔ diko la bato ba bipeko, bahelabi.»

19 Ngɔngɔ dja obala na bu bea, Kumu Yesu aihwea ta busa ko adaa ta ebɔ ɛ bami ɛ Ndjambe. 20 Batingami bakɛɛ aleha Mwako Mopele mɔɔngɔ masusu. Kumu asalaka nabu engbanga ko aenɛmɛdjaka sooti ɛ ebaeli ɛ bobo na ndjia ɛ bimbete ba okamoa ibakɔkɔ bo.