1 Ɛdikaka oko maswi mabae boso ba tɛkɛ ɛ Pasika* na tɛkɛ ɛ mapa imataki nɛngɛ mapa. Bakumu babanganga ba Ndjambe na bato ba edjebeli ɛ mibeko bahombaka ndjia ɛopea Yesu na mbombi boo bamoowoe. 2 Bea, basabaleanaka ibo mɛɛnɛ boo: «Lotahɔnɔ okɔ modjɔ mua ta ehole ɛ tɛkɛ, ɛlɔkɛ boo bato basaka tɔmbɔ.»

3 Yesu adaka ta Betania, ta ndako ɛ Simo moto ɔ mabha; ehole ɛdaka yo ta mesa, mwali omɔti aingea na molangi ma alabate molumake na malasi ma motwuia monɛnɛ, imakɔɔmɔ na kasa dja so epele dja mondjani ma nalade esɛnɔke. Abuka molangi ko asopa malasi ta molo ma Yesu. 4 Bato bakina ibadaka ena basuboa ko basabaleana boo: «Tina ɛ onamea malasi mii ma so epele nda? 5 Bahɔnɔki otɛkɛ malasi mii onɔ pata mikama misato ma falanga tin'ɛ odjipa odii batundu!» Ko bahima mwali ona. 6 Endolo Yesu abala boo: «Mokinani ogoo. Tina ɛ monɔngɛdjaka na nu nda? Modjɔ mu mokokedjai yo tin'ɛ mbai modi mopele. 7 Tina ɛ boo odabini maswi masusu engbanga na batundu, ko ohɔni obakɔmɛini opele bihole bisusu ibipali no; endolo mbai, odaetebini na mbai bihole bisusu. 8 Akɔi mua mohɔni yo okɔ: abangi osuani malasi ta obɔngɛdja mokuku ma mbai tin'ɛ opuseama. 9 Nabali nanu sooti boo: mɔɔngɔ masusu imalehabi bo Mwako Mopele, ta ngondo esusu, batɔndɔbi modjɔ mokɔi mwali hoo ko bamolɛdjakabi.»

10 Na bea Yudasi Isikalioti, omɔti ɔ batingami doomi na babae, akɛɛ asoola na bakumu babanganga ba Ndjambe bɛngɛ boo akabe Yesu ta mabɔ ma bobo. 11 Ta ehole ɛ mooka bo, baluma na sepi enɛnɛ ko bamobunedja boo bamopɛ falanga. Ko Yudasi abanga ohomba enɔli epele tin'ɛ okaba Yesu ta mabɔ ma bobo.

12 Iswi la boso la tɛkɛ ɛ mapa imataki nɛngɛ mapa, busa ibanɔdjakabo mbeka ɛ bana ba bhata tin'ɛ mia ma Pasika, batingami ba Yesu bamohɔdja boo: «Esika ɛpalaka wɛ boo lakɛɛ aobɔngɛdja mia ma Pasika nda?» 13 Na bea, Yesu aloma batingami ba nde babae, abala na bu boo: «Kɛɛni ta ibonga, osakaleani na moto omɔti alwali kulutu ɛ madiba. Mokimanani, 14 ko ta esika eingealea yo, balani na moswa ndako boo: "Molehi ahɔdjai boo: Ekenge ɛ ndako eyakalea mbai mia ma Pasika na batingami ba mbai odii yo hɔɔ?" 15 Ko aonedjaleani ta samba ɛ diko, ekenge ɛ ndako enɛnɛ eboanedjami, na midjɔ misusu mikokake. Edii ena, esika elobɔngɛdjaleano mia.» 16 Batingami bakɛɛ, baimea ta ibonga; batanea misusu oko moda ma bala Yesu na bu, ko babɔngɛdja mia ma Pasika. 17 Ɔimea mɔkɔmɔko, Yesu aimea engbanga na batingami ba nde doomi na babae. 18 Ta ehole ɛdaka bo ta mesa ena baya, Yesu abala boo: «Nabali na nu, edii sooti: omɔti ɔ boono, ona ɔyaaka na mbai, akabaleani.» 19 Batingami baimea na ndjokwa ko babanga omohɔdja omɔti ngɔngɔ dja okina boo: «Edii mbai?» 20 Yesu abasɔmbɛdja boo: «Edii omɔti ta ndanda boono, doomi na babae, ona ɔdubeaka na mbai mapa ta saani. 21 Sooti, Mwana ɔ moto agwalea oko moda mabala Makomi tina ɛ nde, endolo ndjokwa ndani odii ona okabi Mwana ɔ moto! Ɛnɔkɔ na opele boo moto ona adae pɛpɛ obotama!»

22 Ehole ɛdaka bo bayaka, Yesu atomba ipa ko, ngɔngɔ dja osakoa Ndjambe, alibuka ko alipa odi batingami ba nde; abala na bu boo: «Tombani, hee edii mokuku ma mbai.» 23 Atomba koko kɔbɔ ɛ vino ko, ngɔngɔ dja osakoa Ndjambe, abapa yo, ko bayemwa ibo basusu. 24 Yesu abala na bu boo: «Hee edii makia ma mbai, makia ma edhimaneli, imasopei tin'ɛ bato bike. 25 Nabali na nu sooti boo: Nawetebi mwa koko vino mbunoko iswi limwabi mbai vino ɛyanie ta Okumu ba Ndjambe.» 26 Ngɔngɔ djia baemba biembo, bea bakɛɛ ta ngomba ɛ Olive.

27 Yesu abala na batingami ba nde boo: «Ino basusu otialeanini, moda makomama mo boo: "Nabomalea mobanyeli ɔ bingbɛndɛ, ko bhata bananganalea ngise djisusu". 28 Endolo, Yesu abakea boo, ngɔngɔ dja opusoa bambai, nakɛlea aombani ta Galilai.» 29 Piɛlɛ abala na nde boo: «Noko bakina bakaosundola, mbai naosundoletelea.» 30 Bea Yesu amosɔmbɛdja boo: «Nabali na wɛ sooti: busabu, ta bulu bu mɛɛnɛ, boso ba kɔkɔ okɔkɔlɔ mbala ibae, wɛ, oinganaleani mbala isato boo todjebeni.» 31 Endolo Piɛlɛ andindimedjai obala boo: «Nitameka noko osinɛɛ oingana boo teodjebe, noko ekada boo nagwɛ nɔsɔ wɛ.» Ko batingami bakina babala oko moda mua momɔti.

32 Ngɔngɔ djia baimea ta esika ɛbiamaka Getesemane, ko Yesu abala na batingami ba nde boo: «Dikani haa, ta ehole edalea mbai naongɔɔnɔ.» 33 Bea akɛɛ engbanga emɔti na Piɛlɛ, Djake na Yoani. Abanga odaa na bɔɔ ko na okɛsɛli, 34 ko abala na bu boo: «Molema ma mbai molumi na ndjokwa ɛ ogwa; dikani haa ko pɛpɛ ohwɛni.» 35 Asatswa maa ohali na batingami, asadumba ta kpɔtɔ ko aongɔɔnɔ Ndjambe boo, ekaboana, ehole hee ɛ saya ɛsasue na nde. 36 Abala boo: «Sesa, odii wɛ misusu miboani okɔɔmɔ; dongedja mbuti nambai kɔbɔ hee ɛ saya. Noko bea, titi moda mapalaka mbai, endolo moda mapalaka wɛ.» 37 Yesu asɔmbɔ mbala ekina odii batingami ba nde basato ko abatanea bahwɛli. Abala na Piɛlɛ boo: «Simo, ohwɛkɛ? Ohɔniti noko oda mɔsu ehole emɔti? 38 Pɛpɛ ohwɛni ko ongɔɔnɔni, bɛngɛ boo osakakwani ta omekama. Mwembo molumi na posa, endolo muni modii na bwɛmbu.» 39 Asasua mbala ekina ko asɔmbɔ oongɔnɔ oko moda maongɔnɔkɔ yo boso. 40 Na bea asɔmbɔ koko mbuti na batingami ba nde ko abatanea bahwɛli; miso ma bobo maimeaka mandi. Baidiha eka ɛ omosɔmbɛdja. 41 Ehole ɛsɔmbɔ yo tin'ɛ mbala ɛ basato, abala na bu boo: «Ohwɛlini oko hiɔ ko odini oko ta iheme? Modjɔ mosi! Ehole eimei. Hadɛdi, Mwana ɔ moto akabamalea ta mabɔ ma bato ba masumu. 42 Emani, lakɛɛ! Hokeani, mokabi ɔ mbai abatami!»

43 Oko ena ɔdaka Yesu abala, Yudasi aimea, omɔti ɔ batingami doomi na babae. Emumu ɛ bato ibapeaka mipata na mangenda badaka na nde engbanga emɔti. Balomama na bakumu babanganga ba Ndjambe, bato ba edjebeli ɛ mibeko na basuku. 44 Yudasi, ona ɔbakabea Yesu, abapa embete: «Moto ona obhimbalea mbai, edii yo. Mopeani, kɛɛni na nde mobanyeani opele.» 45 Ehole ɛimea Yudasi, asabatea na Yesu ko abala na nde boo: «Molehi!» Ko amobhimba. 46 Oko ena, bakina baisa mabɔ diko la Yesu ko bamopea. 47 Endolo omɔti ɔ bia ibadaka ena aihwa mopata, aboma mobuli ɔ nganga monɛnɛ ɔ Ndjambe ko amokɛsɛ itoi. 48 Yesu abala na bu boo: «Odoini apeani na mipata ko na mangenda elengɛɛ boo nadii motɔmbɔki? 49 Maswi masusu nadaka na nu engbanga, nalehaka ta tepelo, ko ɔipeakanini. Endolo mu mokɔɔmi bɛngɛ boo Makomi makokedjame.» 50 Bea batingami basusu bamosundola ko batia. 51 Mwenga moomi omɔti atingama ngɔngɔ dja Yesu, alwali molekani. Ehole ɛmopeabo, 52 abasundolea molekani ko atia.

53 Bakɛɛ na Yesu odii nganga monɛnɛ ɔ Ndjambe, oho ɔbolama bakumu babanganga ba Ndjambe, basuku na bato ba edjebeli ɛ mibeko. 54 Piɛlɛ akimana Yesu ohali ko aingea ta tiangando ɛ opango banganga ɔ Ndjambe o monɛnɛ. Oho, adaa esika emɔti na babaneli aoka mosa. 55 Ena bea, bakumu ba banganga ba Ndjambe na bato basusu ba tibinalo eenɛnɛ ɛ Bayuda bahombaka tati ebe diko la Yesu bɛngɛ bamopɛ etumbu ɛ ogwa, endolo baiyediha. 56 Na bea, bato bike, badoa na tati dja okosa tin'ɛ Yesu, endolo ibo basusu baidaka kɔpɛ emɔti. 57 Na tina hee, bato bakina baema ko bakosa na Yesu midjɔ boo: 58 «Lamooka abala boo: "Mbai nabukabi tepelo hee epikama na bato ko ngɔngɔ dja maswi masato, napikabi ekina ena edabi pɛpɛ oda mosala ma mabɔ ma bato."» 59 Endolo noko diko la tati ena baibalaka monɔkɔ momɔti. 60 Na bea, nganga ɔ Ndjambe o monɛnɛ aema ta ndanda ɛ ikita ko ahɔdja Yesu boo: «Oditi na kɔpɛ ɛ osɔmbɛdja diko la tati dja bato bii odii wɛ?» 61 Endolo Yesu apɔpɔnɔ, aisɔmbɛdja noko eka. Nganga ɔ Ndjambe o monɛnɛ amohɔdja koko boo: «Odii Masia, Mwana ɔ Ndjambe ona okakumedjae so?» 62 Yesu amosɔmbɛdja boo: «Oko bea, edii mbai, ko oenɛbini ino basusu Mwana ɔ moto adii ta ebɔ ɛ bami ɛ Ndjambe ɔ ngulu; omoenɛbini koko adoe ta matute ma busa.» 63 Na bea, nganga ɔ Ndjambe o monɛnɛ akala bisendja ba nde ko abala boo: «Loditi koko na tina e batemo! 64 Ino mɛɛnɛ ookini moda mokotoi yo Ndjambe. Malɛi ma boono madii nda?» Ibo basusu babala ohuu boo akwii na ikambo ko aboani na etumbu ɛ ogwa. 65 Bakina ta ndanda ɛ bobo babanga otɔɔ Yesu masɔi, bahua mbanda ɛ nde, bamoboma makɔfi ko babala na nde boo: «Lodjebedja moto okɔi modjɔ mua!» Ko babaneli batomba Yesu ko bamoboma bipataka.

66 Piɛlɛ adaka oko o nase ta tiangando ɛ opango. Mosali omɔti mwali ɔ nganga ɔ Ndjambe o monɛnɛ aimea. 67 Aeni Piɛlɛ aoka mosa, amosisimodjai ko abali na nde boo: «Wɛ koko, ɔdaka na Yesu, moto ɔ Nasaleta.» 68 Endolo Piɛlɛ amoinganea abala ohuu boo: «Natadjebaka modjɔ mapalaka wɛ ɔbale, nitamosipoaka.» Bea aimana ta tiangando ko aemaa ta eingeli ɛ opango. Kɔkɔ akɔkɔlɔ. 69 Endolo, mosali mwali amoenɛ ko asɔmbɛɛ boso ba bato ibadaka ena boo: «Moto hoo adii omɔti ɔ bobo!» 70 Ko Piɛlɛ aingana mbala ekina. Ɔnɔɔ ma yumbu, bato ibadaka ena babala koko na Piɛlɛ boo: «Sooti mɛɛnɛ, odii omɔti ɔ bobo, tin'ɛ bo, wɛ koko, odii Mogalilai.» 71 Bea Piɛlɛ abala na ngulu boo: «Yɛɛ boo Ndjambe apɛni etumbu ekada boo nakosi! Nakati seleka, natadjebaka moto ona ɔbalaka no.» 72 Oko ta ehole ena, kɔkɔ akɔkɔlɔ mbala ɛ babae, ko Piɛlɛ alɛdja moda mabala Yesu na nde boo: «Boso bo kɔkɔ akɔkɔle mbala ibae, oinganaleani mbala isato bo todjebeni.» Bea, Piɛlɛ abanga oyea.