1 Sɔɔ mɛɛnɛ, bakumu ba banganga ba Ndjambe baputoana engbanga na basuku, na bato ba edjebeli ɛ mibeko, ɛpalaka ɛbale boo tibinalo enɛnɛ esusu. Bananga Yesu mbɔti, bakɛɛ na nde odii Pilato. 2 Pilato amohɔdja boo: «Odii kumu ɔ Bayuda?» Yesu amosɔmbɛdja boo: «Obali bea.» 3 Bakumu ba banganga ba Ndjambe bapunda Yesu na midjɔ mike. 4 Na bea, Pilato amohɔdja naikina boo: «Wɛ oditi na kopɛ ɛ osɔmbɛdja? Otaokaka mii maopundaka bo!» 5 Endolo Yesu aisɔmbɛdja noko kopɛ emɔti, Pilato akamoa na modjɔ mua.

6 Eengi tɛkɛ ɛ Pasika, Pilato adaka aimusedja moto ɔ bɔlɔkɔ omɔti, ona ɔsɛngɛkɛ bato. 7 Bea, ta ehole ena moto omɔti adaka ta bɔlɔkɔ ɔbeaka bo Balaba engbanga na bakina bato tin'ɛ bo baowa moto ta ehole ɛ wusuwusu. 8 Emumu ɛ bato ɛkɛɛ ta ndako ɛ Pilato ko babanga omosɛngɛ boo abakɔe modjɔ imadjebeana na nde obakɔmɛɛ. 9 Pilato abasɔmbɛdja boo: «Ɔpalakani boo naotingoeni kumu ɔ Bayuda?» 10 Adjebaka opele boo bakumu ba banganga ba Ndjambe bapunda Yesu odii yo tin'ɛ ikuwa. 11 Endolo bakumu ba banganga ba Ndjambe bapa simbisi odii bato basusu basɛngɛ Pilato abatingoe Balaba ta esika ɛ Yesu. 12 Pilato abahɔdja mbala ekina boo: «Ɛpalaka no nakɔe yee na moto hoo odii no obea kumu ɔ Bayuda?» 13 Bamosɔmbɛdja na ogama boo: «Mobaka ta ekulusu!» 14 Pilato abahɔdja boo: «Obe bokɔi yo nda?» Endolo bagama koko na ngulu boo: «Mobaka ta ekulusu!» 15 Ta tin'ɛ osepedja emumu ɛ bato Pilato abatingoa Balaba; ngɔngɔ djia abomedja Yesu pimbo ko abapa yo boo bamobake ta ekulusu.

16 Basoda bakɛɛ na Yesu ta ndako ɛ gupunɛlɛ ta esika ɛ esambi, ko babea basoda basusu. 17 Bamolwɛdja mokoto mokpetu, bayoa egbala ɛ ndjubɛ ko bamobakea yo ta molo. 18 Ngɔngɔ djia, babanga omoisia boo: «Bwanda, kumu ɔ Bayuda!» 19 Ko bamobhimboa mokɛɛlɛ ta molo, bamotɔɔ masɔi ko badaa magunda bɛngɛ basuname boso ba nde. 20 Ehole ɛbɛtɛ bo omosɛkɛ bamoihwa mokoto mokpetu ko bamosɔmbɛdja bisendja ba nde. Ngɔngɔ djia baimana na nde o sokolu ɛ opango bɛngɛ boo bamobake ta ekulusu.

21 Moto omɔti ɔ Kulene, kombe ɛ nde Simo, sɛngɛ Alekidjandele na Lufusu, anɔkɔ ena ta ihule la nde ta gue. Basoda bamopea na ngulu bɛngɛ boo atombe ekulusu ɛ Yesu. 22 Bakɛɛ na Yesu ta esika ebeaka bo Gologota, etingodjai boo «Esika ɛ engbongolo ɛ molo.» 23 Bapalaka bamopɛ vino eputoanake na bole ba otitedja saya, endolo Yesu alona oye mwa. 24 Ngɔngɔ djia bamobaka ta ekulusu ko basakaanea bisendja ba nde na ndjia ɛ djonga bɛngɛ badjebe eka edihalea moto na moto. 25 Ɛdaka ehole ɛ ibua ɛ sɔɔ ena ɔbakama yo ta ekulusu. 26 Bakoma tina ɛ modjɔ imagwa na nde ta maa yaale ɔ ibaya diko la ekulusu boo: «Kumu ɔ Bayuda». 27 Bato babae ba babakama na nde engbanga emɔti ta ekulusu, omɔti ta ebɔ ɛnde ɛ bami ko okina ta ebɔ ɛnde ɛ bali. [28 Edii okokedjama ba Makomi imabala ohuu boo: «Alangama ta motwuia ma bato babe.»] 29 Minɔ na ndjia bamosingaka ena bakumana melo babalaka na nde boo: «Aa! Wɛ titi ɔbalaka boo obukalea tepelo ko opikalea ekina ngɔngɔ dja maswi masato, 30 saheledja wɛ mɛɛnɛ, tita ta ekulusu!» 31 Moda momɔti na bakumu ba banganga ba Ndjambe na bato ba edjebeli ɛ mibeko basɛkɛkɛ Yesu ko basabaleanaka boo: «Aheledjaka bato bakina, endolo atahɔnɔ osaheledja yo mɛɛnɛ! 32 Yɛɛ Masia, kumu ɔ Isalɛlɛ atite hadɛdi ta ekulusu! Lokaenɛlea modjɔ mua, lomodhimalea!» Bato ibabakama na nde ta ekulusu bamosingaka koko.

33 Donga ndanda ɛ busa mbunoko ehole ɛ basato ɛ mɔkɔmɔkɔ, modidi makwa ta ngando esusu. 34 Ko ta ehole ena ɛ basato ɛ mɔkɔmɔkɔ, Yesu agama na ngulu boo: «Eli, Eli, lama sabakatani?» – Etingodjai boo: «Ndjambe ɔ mbai, Ndjambe ɔ mbai, osundolini tina nda?» – 35 Bato bakina ibadaka ena, baoka ko bagama boo: «Hokamedjani, abeaka Elia!» 36 Omɔti ɔ bobo apeta alumedja imbusu na vino ɛ ngai ko alitingea ta sɔngɔ ɛ mokɛɛlɛ, bea alilɛkɛɛ odii Yesu bɛngɛ amwɛ ko abala boo: «Kinani, laindje kaoko Elia adoalea amotitedja ta ekulusu!» 37 Endolo Yesu agama na ngulu ko agwa. 38 Lido ɛdaka esɛpi ta tepelo ɛsaola biale bibae donga odiko mbunoko o nase. 39 Kapitɛni ɔ basoda ɔ Baloma ona ɔdaka aemi boso ba Yesu aenɛ moda magwa yo ko abala boo: «Sooti mɛɛnɛ, moto hoo adaka Mwana ɔ Ndjambe!» 40 Bali bakina ibadaka ena, ibo koko baenɛkɛ ohali. Ta ndanda ɛ bobo, ɛdaka ena Malia ɔ Magadala, Malia, nɛngɛ Djake o yɛngɛ na Yose, na Salome. 41 Bakimana Yesu ko bamokɔmɛdja ehole ɛdaka yo ta Galilai. Ɛdaka ena koko na bali bakina bike ibakɛɛ na nde ta Yelusalɛmɛ.

42 Ɔimea mɔkɔmɔkɔ, iswi la mosalingo ma tɛkɛ ibange la sabata. 43 Ehole ɛimea Yosepu ɔ Alimate, omɔti ɔsumaka bo ta tibinalo enɛnɛ, yo alɛndɛkɛ koko odoa ba Okumu ba Ndjambe. Yosepu aibanga okɛ odii Pilato asɛngɛ mokuku ma Yesu. 44 Endolo Pilato akamoa ɔɔka yo boo Yesu agwi. Abea kapitɛni ɔ basoda ko amohɔdja kaoko Yesu asi ogwa. 45 Ngɔngɔ dja esɔmbɛdjɛli ɛ kapitɛni ɔ basoda, apa enɔli odii Yosepu bo atombe ndjemba ɛ Yesu. 46 Yosepu asomba molekani ma motwuia, atitedja ndjemba ɛ Yesu ta ekulusu, ayehua ko ayepusea ta ikila ilalongea yo ta mondeke monɛnɛ. Ngɔngɔ djia ahilingoanedja mondeke imabɔngɛdjama tin'ɛ odipa eingeli ɛ mobombo. 47 Malia ɔ Magadala na Malia nɛngɛ Yose badaka bahokea esika ɛsambea bo Yesu.