1 Ngɔngɔ djia, Yesu asɔmbɔ koko ta ndako ɛ miɔngɔnɔ ɛ Bayuda. Moto ɔ ebɔ ɛhɔlɔngɔnɔ adaka ena. 2 Bafalusai batingea Yesu miso bɛngɛ baenɛ kaoko amoheledjalea ta iswi la sabata, bɛngɛ boo bamopunde. 3 Yesu abala na moto ɔ ebɔ ɛhɔlɔngɔnɔ boo: «Emaa ena, boso ba bato basusu.» 4 Na bea abala na bu boo: «Modjɔ moboani okɔmɔ ta iswi la sabata nda? Edhimami ta iswi la sabata okɔ opele kaoko obe? Oheledja kaoko oowa?» Endolo badaa ogoo. 5 Yesu abahokea ibo basusu na miso ma ndjokwa; tin'ɛ balona osipoa. Abala na moto ona boo: «Ninodja ebɔ ɛ wɛ.» Ayeninodja ko ebɔ ɛ nde ɛhela. 6 Bafalusai baimana ta ndako ɛ miongɔɔnɔ ɛ Bayuda badaa na boso Elode ikita tina ɛ obɔngɛdja moda moboani bo oowa Yesu.

7 Yesu asasua na batingami ba nde ta lokula la ibeke inɛnɛ la Galilai ko emumu ɛ bato ɛ mokimana. Bato badongaka ta Galilai na Yuda, 8 ta Yelusalɛmɛ, ta Idume, ta ekenge ɛ mokpɔtɔ ɛ dɔngɔ la dua ɛ Yolodani, ko mbuti na Tula na Sidona. Emumu ɛ bato ɛdoa odii Yesu tina ɛ boo baoka gala dja midjɔ misusu makɔkɔ yo. 9 Na bea abala na batingami ba nde babɔngɛdjae bwato, tin'ɛ boo bato basaka mombambamedja. 10 Na tina hee, elengɛɛ ɔheledjaka yo bato bike, basusu ibatungeamaka na bipeko bakɛɛ pɛpɛlɛ odii yo bɛngɛ boo bamobinge. 11 Ko ehole emoenɛ bato ibatungeamaka na miembo mibe, basadumba ta mako ma nde ko bagama na ngulu boo: «Odii Mwana ɔ Ndjambe!» 12 Endolo Yesu abasia na ngulu mɛɛnɛ boo batabala ta tina ɛ nde.

13 Ngɔngɔ djia Yesu aihwea ta ikoli; abea bato ibapalaka yo, ko badoa odii yo. 14 Ahɔɔ doomi na babae ibapa yo kombe ɛ ba apotele, bɛngɛ badae na nde ko abalome aleha Mwako Mopele, 15 na kpati tin'ɛ obengana miembo mibe. 16 Ba apotele bia doomi na babae ibibi: Simo, ona ɔɔpa Yesu kombe ɛ Piɛlɛ –, 17 Djake na mwanango Yoani, ibo basusu bana ba Djebedai – Yesu abapa kombe ɛ Boanelegesi, ena etingodjaka boo: «Bato ibakoani na egbulumeli ɛ kake», 18 Andele, Pilipo, Batelemi, Matie, Toma, Djake, mwana ɔ Alifa, Tade na Simo moto ookaswee ngando 19 na Yudasi Isikalioti, ona okaba Yesu.

20 Ngɔngɔ djia Yesu asɔmbɔ ta ndako. Emumu ɛ bato ɛlumana koko na moda ma boo Yesu na batingami ba nde bataka noko enɔli ɛ oyaka. 21 Ehole ɛoka bato ba ibota la nde gala ena, badoa amotomba na ngulu. Tin'ɛ babalaka boo: «Akɔni gbukele!»

22 Bato ba edjebeli ɛ mibeko iba donga ta Yelusalɛmɛ babalaka boo: «Belezebulu, djabulu, adii odi yo!» Naikina boo: «Edii kumu ɔ miembo mibe moto okamopɛ kpati ɛ obengana miembo mia!»

23 Bea Yesu ababea ko abala na bu na mandjɛ boo: «Moda ndani Satana ahɔni osabengana yo mɛɛnɛ? 24 Okumu bomɔti bokabɔtɔɔ ta tei ɛ bu, botahɔnɔ oema; 25 ko bato ba ibota imɔti bakabɔtɔɔ ibo mɛnɛ, ibota dia itahɔnɔ oyeyoa. 26 Ko ekada boo Satana asaonedjai yo mɛɛnɛ, kaoko akasakabana, ngulu ɛ nde etahɔnɔ oyeyoa endolo esialea.

27 Moto atahɔnɔ oingea ta ndako ɛ moto ɔ ngulu ko okatoa leka la nde, amiti nanga moto ona ɔ ngulu boso; ngɔngɔ dja omonanga na ngɔli, apundjalea leka la ndako ɛ nde. 28 Nabali na nu edi sooti: bato bayɛɛmɛbi ta masumu ma bobo masusu ko na masingi imasinga bo Ndjambe. 29 Endolo moto akatuka Mwembo Mosɛnɔke ayɛɛmɛtebi noko osinɛɛ, tin'ɛ boo akwi ta isumu la seko.» 30 Yesu abadjebedja bea tin'ɛ babalaka ohuu boo: «Adii na mwembo mobe.»

31 Nɛngɛ Yesu na bananango baimea; baema o sokolu ɛ ndako ko baloma moto amobea. 32 Bato bike badaka mbuti na nde ko bamotɔndɔ boo: «Hokamedja, ngwao na banangwao bali na bami badii o sokolu ko baohombaka.» 33 Yesu asɔmbɛdja boo: «Odii inga nda ko badii banainga banda?» 34 Bea ahokea bato ibadaka bamohiki ko abala boo: «Hokea inga na banainga badi haa. 35 Tina ɛ boo ona ɔkɔkɔ opala ba Ndjambe adii mwaninga, ngɛnɛ kaoko inga.»