1 Ngɔngɔ djia Yesu abanga obala na bu na mandjɛ boo: «Moto omɔti aona gue ɛ mele ma vino; ayehika na opango, alongea mombɔndɔ tina ɛ okamola mbuma dja vino ko apika ndako eyai ɛ bato ba oyebanyea. Ngɔngɔ djia aisa basali ba oyeputela ko akɛɛ ta mwɛngɔ. 2 Ehole ɛkpeta mbuma dja vino, aloma mosali ɔ nde omɔti odii ba baputeli ba gue boo aosɛ odii bo ɛ nde ekenge ɛ mbuma dja gue ɛ vino. 3 Endolo baputeli bia ba gue bamopea, bamoboma ko bamoyanedja mabɔ bwase. 4 Moswa gue abalomea mosali okina; bamoboma ta molo ko bamosinga. 5 Abalomea koko mosali okina, ko, ona, bamoowa; ko bakɔɔ moda momɔti na basali bakina bike: baboma bakina ko baoowa bakina. 6 Moto omɔti odikaka na moswa gue oko mwana ɔ nde ɔ epaeli. Yo moto ɔ suka ɔbalomea yo, ɛlɔkɛ alɛdjaka boo: "Badalea na isuma tin'ɛ mwana ɔ mbai." 7 Endolo baputeli ba gue basabaleana boo: "Hokeani mosangoli! Doani, lamoowoe, ko lasangoe gue!" 8 Bapea mwana ɔ moswa gue, bamoowa ko badumba ndjemba ɛ nde sokolu ɛ gue ɛ vino.» 9 Yesu abahɔdja boo: «Eka ndani ehɔni okɔ moswa gue? Adoabi, aowabi baputeli ba gue ɛ vino ko ayepabi odii baputeli bakina. 10 Opakita langani Ikomi dia boo:

"Ikwee iladumba bayoli ba ndako

laimea ikwee la ndonga.

11 Mua imodongi odii Kumu, modii tin'ɛ booso, modjɔ ma okamoa!"»

12 Bakumu babanganga ba Ndjambe, bato ba edjebeli ɛ mibeko na basuku bahombaka ndjia ɛ opea Yesu tin'ɛ badjeba boo abala indjɛ dia ɛlɔkɔ ɛ bobo. Endolo badaka na bɔɔ ba bato bike ibadaka ena; bamokina ko bayana.

13 Ngɔngɔ djia baloma ekenge ɛ Bafalusai ko na bato ba Elode odii Yesu bɛngɛ boo bamodihe na ibunga diko la kɔpɛ ɛ nde mɛɛnɛ. 14 Badoa abala na Yesu boo: «Molehi, lodjebi boo okabale midjɔ na osooti; toise molema odii moto; na tina hee, tohokee mbanda dja bato, endolo okalehe bileho ba Ndjambe ba sooti. Lotɔndɔɔ, mobeko ma booso modii opa enɔli ɛ oputa puti odii Kaisala? Loboani bo lapute kaoko pɛpɛ?» 15 Endolo, Yesu adjeba boo babombi midjɔ ta milema ma bobo, na bea abala na bu boo: «Tina ɛ mekakani na nu nda? Lwɛnini pata ɛ falanga emɔti bɛngɛ boo na ye enɛ.» 16 Badoa na pata ɛ falanga emɔti odii yo, ko Yesu abahɔdja boo: «Mbanda hee na kombe hee ɛkoma bo haa, ɛ nda?» Bamosɔmbɛdja boo: «Ɛ kumu Kaisala.» 17 Na bea Yesu abala na bu boo: «Pani Kaisala ibondo la nde, ko pani odii Ndjambe la nde ibondo.» Ko bakamoa na esɔmbɛdjɛli ɛ nde.

18 Bakina Basadukai badoa odii Yesu. Bato bia bakabale bo bato iba bagwa bapusoetebi. – Bamohɔdja moda muu boo: 19 «Molehi, Mose akoma tin'ɛ boso boo: "Ekada boo moomi, ona odii na mwanango moomi, agwi ko akini mwali ɔ ogwa ona odaa na nde pɛpɛ obota, eboani boo yɛngɛ ɔ nde abale mwali ɔ gwedja moomi bɛngɛ boo akɔe mbota tina ɛ mowei." 20 Na bea, ibota imɔti ladaka na bana bami saambo. Mwana ɔ boso aosɔ mwali ko agwa pɛpɛ obota. 21 Mwana ɔ babae aosɔ mwali ona ɔgwa na moomi ko aibota na nde. Ɔbasato oko moda mua, 22 ko ibo basusu saambo basangoa mwali ona motete ko bagwa pɛpɛ okina bana. Ngɔngɔ dja ibo basusu, mwali agwa koko. 23 Ta opusoama ba bato, yo adabi mwali ɔ nda? Tin'ɛ boo ibo basusu saambo badaa na nde moki!» 24 Yesu abasɔmbɛdja boo: «Odini ta ndanda ɛ ibunga; otadjebakani na Makomi, na ngulu ɛ Ndjambe. 25 Tin'ɛ boo, ehole epusoabi bato, bami na bali baosɔnetebi, endolo badabi ta busa elengɛɛ babwɛndi. 26 Ta modjɔ ma opusoa ba bato, opakitini alanga ta mokanda ma Mose isolo la mole muu madaka mosa mayoa? Ndjambe abala na Mose boo: "Nadii Ndjambe ɔ Abalayama, Ndjambe ɔ Isaka na Ndjambe ɔ Yakobo." 27 Yesu abala na bu koko boo: Ndjambe adii Ndjambe ɔ bato ba mohelo endolo aditi Ndjambe ɔ bato bago. Na bea, odini ta ndanda ɛ ibunga.»

28 Moto ɔ edjebeli ɛ mibeko abaoka baboma kitɛ. Yo aenɛ boo Yesu asɔmbɛdja opele odii Basadukai; abatama mbuti na Yesu ko amohɔdja boo: «Mobeko monɔi mibeko misusu nda?» 29 Yesu amosɔmbɛdja boo: «Hokea Mobeko monɔi mibeko misusu imumu: "Hokamedja, Isalɛlɛ! Yawɛ Ndjambe ɔ boso adii oko omɔti. 30 Pala Yawɛ, Ndjambe ɔ wɛ na molema ma wɛ mosusu, na molimo ma wɛ mosusu, na owɛi bawɛ bosusu ko na ngulu ɛ wɛ esusu." 31 Ko hokea mobeko ma babae imumu: "Oboani ɔpale mina wɛ elengɛɛ okasapale wɛ mɛɛnɛ." Mobeko mokina ma onɔ mii mibae moditi.» 32 Na bea, moto ɔ edjebeli ɛ mibeko abala na Yesu boo: «Edii bea, Molehi! Muu mobali wɛ modii sooti: Ndjambe adii oko omɔti, okina aditi. 33 Omopala na molema mosusu, na owɛi bosusu, na ngulu esusu, na opala mino elengɛɛ okasapale wɛ mɛɛnɛ. Mua monɔi bipeli bisusu ba opa Ndjambe na mbeka dja tito.» 34 Yesu ɔenɛ yo boo moto ɔ edjebeli ɛ mibeko amosɔmbɛdja opele, abala na nde boo: «Wɛ oditi ohali na Okumu ba Ndjambe.» Ngɔngɔ djia, pɛpɛ moto omɔti ɔdaa koko na kaso boo amohɔdjae mahɔdja makina.

35 Ehole ɛdaka Yesu aleha ta tepelo, ahɔdja ihɔdja dii boo: «Moda ndani bato ba edjebeli ɛ mibeko bahɔni obala boo Masia adii ta mbota ɛ Davidi? 36 Tin'ɛ boo ɔlɔndɔmɔ Davidi, na Mwembo Mosɛnɔke, abala yo mɛɛnɛ boo:

"Yawɛ abala ohuu na Kumu ɔ mbai boo:

Dua, daa haa ta ebɔ ɛ mbai ɛ bami,

Mbunoko nadedjae baloni ba wɛ nase dja bigbota ba wɛ."

37 Davidi yo mɛɛnɛ adii omobea "Kumu". Moda ndani Masia ahɔni oda Mwana ɔ nde?» Ko bato bike bamookaka na sepi.

38 Yesu alehaka bato basusu boo: «Angatanani na bato ba edjebeli ɛ mibeko bapali odala na mikoto miyai, bakapale babaiseake ndese dja ekumu ta bisika bidii bato bike osaka; 39 bakahɔe oko bidie ba boso ta ndako dja miongɔnɔ dja Bayuda ko bisika ba ekumu ta tɛkɛ. 40 Bakakatoe bali bagwa na bami leka la bobo ko, oko ta ehole ena, bakaongɔɔne miongɔɔnɔ miyai bɛngɛ babahokee. Badihabi esambi epipo mɛɛnɛ!»

41 Bea, Yesu adaa ena ayɛli sanga ekaisebo bipeeli ta tepelo, ko ahokeaka moda maisaka bato falanga ena. Badiheli bike baisa falanga djike. 42 Motundu mwali ɔgwa na moomi aimea ko aisa pata dja bibende ba kɔngɔ ibae dja pɛpɛ motwuia. 43 Na bea Yesu abea batingami ba nde ko abala na bu boo: «Nabali na nu sooti: motundu mwali hoo ɔgwa na moomi aisi ta sanga obuke onɔdja bato bakina basusu. 44 Tin'ɛ boo bato bakina bapi falanga idjidaki bo pɛpɛ okamba nadju; endolo yo, ta otundu ba nde, api odiheli ba nde bosusu bodaki na nde tin'ɛ ohela.»