1 Bato bike bameka okoma midjɔ imakokedja Ndjambe ta ndanda ɛ booso. 2 Balodjebedja moda imalotɔndɔɔ bato bia iba mienɛ na miso donga ibange la mu ko ibadiha elomu ɛ oleha ebaeli ɛ Ndjambe. 3 Ta tina hee mbai koko ngɔngɔ dja ohomba sooti ɛ midjɔ mii misusu moda manɔɔ mo donga ibange eenɛmi opele odii mbai boo naokomee wɛ Teofili moto ɔ gala, 4 bɛngɛ boo odjebe sooti ɛ bileho bia ibadiha wɛ.

5 Ta ehole ɛdaka Elode kumu ɔ Yuda, omɔti ɔ nganga ɔ Ndjambe ona obeaka bo Djakalia, adaka ta mbota ɛ banganga ba Ndjambe ba Abia. Mwali ɔ nde Elisabɛti adaka ɔ ibota la Alona. 6 Ibo basusu babae badaka bato ba odjoo boso ba Ndjambe, ko bakokedjaka na pɛpɛ opɛli mibeko ma Kumu na bilomu ba nde. 7 Endolo baidaka na mwana, tina ɛ boo Elisabɛti adaka motete, ko ibo basusu babae baimeaka basuku.

8 Busa bomɔti, Djakalia adaka ta Tepelo tina ɛ okokedja bilomu ba nde ba onganga ba Ndjambe, tina ɛ boo ɛdaka ngala ɛ mbota ɛ nde. 9 Okokana na okɔkɔ ba onganga ba Ndjambe, ahɔɔmɔ na djonga boo aingee ta ndako esɛnɔke ɛ Kumu bɛngɛ boo atumbe mbeka. 10 Ehole ɛdaka Djakalia atumba paka ɛ so epele bato bike badaka osokolu ta miongɔɔnɔ.

11 Obwɛndi ɔ Kumu asaenɛmɛdja na Djakalia, aemi diko dɔngɔ la ebɔ ɛ baami ɛ kinda ena ɔtumbaka bo paka ɛ so epele. 12 Ɔmoenɛ Djakalia, ayeketana ko aluma na bɔɔ. 13 Endolo Obwɛndi abala na nde boo: «Djakalia pɛpɛ obanga oko, tina ɛ boo Ndjambe aoki miɔngɔɔnɔ ma wɛ: Elisabɛti mwali ɔ wɛ aobotealea mwa moomi ona olalea wɛ kombe ɛ Yoani. 14 Osepalea obuke mɛɛnɛ ko bato banɛnɛ basepalea tina ɛ obotama ba nde.

15 Tina ɛ boo adabi monɛnɛ boso ba Kumu. Amwɛtebi vino, noko na makina mana mapipo. Alumabi na Mwembo Mosɛnɔke donga sɔpɔ dja nango 16 ko asɔmbɛdjabi bato bike ba Isalaele odii Kumu Ndjambe ɔ bobo. 17 Adalabi boso ba nde na mwembo ko na ngulu ɛ Elia tina ɛ osɔmbɛdja bwela pakasa ɛ batata na bana ba bobo. Ahekodjabi milema ma bato ba opokotoi boo badihe owɛi ba bato ba odjoo; ko abɔngɛdjabi tina ɛ Kumu bato baboani okɔ midjɔ mipele.» 18 Djakalia abala na obwɛndi boo: «Nadjebalea boo modjɔ muu modii sooti moda nda? Tina ɛ boo naimei mobange, ko mwali ɔ mbai koko aimei mosuku.» 19 Obwɛndi amosɔmbɛdja boo: «Mbai, nadii Gabiɛlɛ ona okaemae boso ba Ndjambe tina ɛ omosalea; nalomami tina ɛ otɔndɔɔ na olwɛɛ gala hee epele. 20 Endolo odhimiti bibaeli ba mbai, ibikokedjamalea ta ehole ɛ bu; ta tina hee oimealea emimi, ohɔnetelea obala mbunoko iswi ilikokedjamabi midjɔ mii.»

21 Ta ehole ena, bato badaka ta yambo ɛ Djakalia, ko bakamoa moda manɛngɛdja yo ekoka ta esika esɛnɔke. 22 Ɔimana yo, aihɔnɔ obala na bu ko bato badjeba boo aenɛ modjɔ ma okamoa imadonga odii Ndjambe ta esika esɛnɔke. Abalaka na bu oko na bimbete ko adikaa emimi.

23 Ɔkoka maswi ma Djakalia ma mosala ta tepelo, asɔmbɔ ta ndako ɛ nde. 24 Ngɔngɔ dja maswi, mwali ɔ nde Elisabɛti alwa deemi, ko asabomba ta ndako songe batano. Asabalea boo: 25 «Hokea modjɔ mokɔi Kumu tina ɛ mbai: ta ehole eeni yo opele boo adongedjɛni muu imapakani sɔni ta boso ba bato basusu.»

26 Ta songe ɔ basamano ɔ deemi la Elisabɛti, Ndjambe aloma Obwɛndi Gabiɛlɛ ta ibonga imɔti la Galilai kombe ɛ lu Nasaleta, 27 odii mwana mwali ɔ pɛpɛ odjebana na baami ona oboanedjamaka boo abale moomi omɔti ɔ kombe ɛ Yosepu ɔ ibota la Davidi; kombe ɛ mwana mwali ona ɛdaka Malia. 28 Obwɛndi aingea odii yo ko abala na nde boo: «Sepa! Kumu ona oenɛmɛdjai bwela ba nde bonɛnɛ, adii na wɛ.» 29 Malia ayeketana na bibaeli bia, asahɔdja tina ɛ ndese ena ɛmopa yo. 30 Obwɛndi abala na nde boo: «Pɛpɛ obanga, Malia, tina ɛ boo, Ndjambe aoinedjai bwela ba nde. 31 Hokea: olwalea deemi, obotalea mwana moomi ona olalea wɛ kombe ɛ Yesu. 32 Adabi moto monɛnɛ ko abeamabi Mwana ɔ Ndjambe Oonɔi Diko, ko Kumu Ndjambe amopabi ngbɛndɛ ɛ taata nde Davidi, 33 ko ekumu ɛ nde diko la bato ba Isalaele edɛtebi na suka.» 34 Malia abala na obwɛndi boo: «Modjɔ mua mokɔmɔlea moda nda, tina ɛ boo napakita djebana na moomi?» 35 Obwɛndi amosɔmbɛdja boo: «Mwembo Mosɛnɔke adualea diko la wɛ ko ngulu ɛ Ndjambe Oonɔi Diko eohualea na esii ɛ nde. Ta tina hee mwana ona obotamalea adalea mosɛnɔke, bamobealea Mwana ɔ Ndjambe. 36 Elisabɛti, ona odii ta ibota la wɛ, noko ɔnɔdjai yo ehole ɛ obota; bamobeaka motete adii hadɛdi na deemi la mwana moomi songe basamano. 37 Tina ɛ boo odii Ndjambe pɛpɛ modjɔ mokadae pɛpɛ okokedjama!» 38 Bea Malia amosɔmbɛdja boo: «Nadii mobuli ɔ Kumu; kina boo misusu makɔɔme na mbai oko bea omiwɛ bala.» Ko obwɛndi amokina.

39 Ngɔngɔ dja maswi, Malia aema ko akɛɛ pɛpɛlɛ ta ibonga imɔti la Yuda ilidii ta ngomba. 40 Aingea ta ndako ɛ Djakalia ko aisea Elisabɛti. 41 Omioka Elisabɛti ndese ɛ Malia, mwana ɔdaka ta sɔpɔ dja nde akumana. Elisabɛti aluma na Mwembo Mosɛnɔke, 42 ko abala na ngulu boo: «Ɔdjongoama na Ndjambe onɔ bali basusu, ko edjongoli ɛ nde ɛdae diko la mwana ona odii ta sɔpɔ dja wɛ! 43 Mbai ndani boo nɛngɛ Kumu ɔ mbai adoe odii mbai? 44 Tina ɛ bo, oeni, ta ehole emii mbai oka ndese ɛ wɛ, mwana akumani na sepi ta sɔpɔ dja mbai. 45 Odjongoami na Kumu: ɔɔdhima boo Kumu akokedjalea mbuno ɛodjebedja yo!»

46 Na bea Malia abala boo:

«Molimo ma mbai kumedja

Kumu,

47 molema ma mbai molumi na sepi

Tina ɛ Ndjambe adii moheledja ɔ mbai;

48 tina ɛ boo aenɛ opele oindja mbai

mosali ɔ nde ɔ pɛpɛ gala,

Sooti, donga hadɛdi mbunoko bihole bisusu,

nabeamalea na bato basusu mwali ona odjongoami

49 tina ɛ boo Ndjambe Onɔi Ngulu akɔi tina ɛ

mbai midjɔ minɔi na onɛnɛ.

Kombe ɛ nde edii esɛnɔke,

50 aluma na bwela bihole bisusu ta tina ɛ bato ibakamosume.

51 Aenɛmedja ngulu ɛnde esusu, ananganedja bato ba

Malɛi ma molumba,

52 aatitedja bato ba ngulu nase dja ngbɛndɛ dja bobo

ko aihwedja bato ba pɛpɛ ngulu.

53 Alumedja bato ba ndja na leka,

ko ayanedja badiheli mabɔ bwase.

54 Adoa akɔmedja mobuli ɔ nde Isalɛlɛ:

Aibosa oinedja opele ba nde

55 Moda imabunedjaka yo bataatasu,

odii Abalayama na mbota dja nde bihole bisusu.»

56 Malia anɛngɛdja nɔbɔ Elisabɛti mbuti na songe basato, ngɔngɔ djia asɔmbɔ odii yo.

57 Ɔkoka ehole ɛ obota, Elisabɛti abota mwana moomi. 58 Bato ibadaka mbuti na nde ko na denga la nde baoka boo Kumu amokɔi mongandi monɛnɛ ko basepa na nde engbanga emɔti. 59 Ɔkoka maswi mwambe ngɔngɔ dja obotama, badua tina ɛ olena mwana epole, bapalaka omobea na kombe ɛ sango Djakalia. 60 Endolo nango abatɔndɔɔ boo: «Pɛpɛ, abeamalea Yoani.» 61 Babala na nde boo: «Endolo, pɛpɛ moto omɔti ɔ ibota la wɛ odii na kombe ena!» 62 Bea, na ndjia ɛ bimbete bahɔdja sango, kombe ndani epali yo bo apɛ na mwana ɔ nde 63 Djakalia ahɔdja maa yale ɔ ibaya ko akoma ena boo: «Kombe ɛ nde wɛte Yoani.» Bea, bato basusu bakamoa. 64 Oko ena Djakalia asɔmbɔ koko obala: abanga okumedja Ndjambe na moholi mopipo. 65 Bea, bato basusu iba mbuti badaka na bɔɔ, na bia ibadaka ta bisika bisusu ba ngomba dja Yuda, basoolaka diko la midjɔ mia. 66 Bia basusu ibaoka midjɔ mia mabalama badaka bamilɛdja ko basahɔdja boo: «Mwana ona adabi moda nda?» Na bea ngulu ɛ Kumu ɛdaka na nde.

67 Djakalia, sɛngɛ mwana, aluma na Mwembo mosɛnɔke; abanga otɛlɛ na bibaeli bii:

68 «Kumama Kumu, Ndjambe ɔ Isalɛlɛ,

Adoi akɔmɛdja ko asikoa bato ba nde!

69 Alopi mosikoi monɛnɛ ta ndako ɛ Davidi mosali ɔ nde.

70 Oko moda mamaa yo bala donga ehele na ndjia ɛ batɛli ba nde basɛnɔke:

71 Alobunedja boo losikoamabi odii baloni ba boso

Ko ta kpati ɛ bato basusu ibakaloine.

72 Ainedja ndjokwa ɛnde odii bataatasu

Ko aibosa edhimaneli ɛ nde esɛnɔke.

73 Ndjambe asimba ndai na taatasu Abalayama,

74 olodongedja ta mabɔ ma baloni

Bɛngɛ bo lamosalee na pɛpɛ obanga.

75 Bo ladae basɛnɔke na odjoo boso ba nde

Maswi masusu ma mohelo ma booso.

76 Ko wɛ, mwana ɔ mbai, odalea motɛli ɔ Ndjambe ona Oonɔi Diko,

Odalalea boso ba Kumu tinaɛ obongɛdja ndjia ɛ nde,

77 Bɛngɛ bato ba nde badjebe boo adoi abaheledja

Na obayɛɛ ta mabunga ma bobo.

78 Ndjambe ɔ booso aluma na bwɛli ko na opele:

Angɛngɛdjabi diko la booso ohuu ba diko, elengɛ bua iba diso la busa ikaimana sɔɔ,

79 Tina ɛ opa ohuu odii bia ibadaka ta modidi ko ta esii ɛ ogwa,

tina ɛ odaledja mako ma booso ta ndjia ɛ ogoo.»

80 Mwana akandoaka ko mwembo ma nde mapingedjamaka. Adaka ta bisika ba bisobe* mbunoko iswi lasaenɛmɛdja yo ohuu boso ba Isalaele.