1 Ɔsidja Yesu obala midjɔ mia misusu odii bato bike ibadaka bamooka akɛɛ ta Kapalanauma. 2 Ehoo, kumu omɔti ɔ basoda ɔ baloma adaka na mosali ɔ nde ona ɔpalaka yo obuke. Mosali ona adaka na epeko mbuti na ogwa. 3 Kumu ɔ basoda ɔɔka yo bato babala ta tina ɛ Yesu, amolomea ekenge ɛ basuku ba Bayuda boo bamohɔdjae bɛngɛ adoe aheledja mosali ɔ nde. 4 Ɔimea bo mbuti na Yesu, bamoongɔɔnɔ na lokamo na bibaeli bii boo: «Moto ona abɔngi boo adihe ekɔmɛdjɛli ɛ wɛ. 5 Apali bato ba boso ko edii yo moto ɔlopikia ndako ɛ miɔngɔɔnɔ ɛ Bayuda.» 6 Bea Yesu akɛɛ na bu engbanga. Ɔimea yo mbuti na ndako, ehole ɛloma kumu ɔ basoda badjebaneli ba nde tina ɛ obala na Yesu boo: «Kumu, pɛpɛ osatungea. Nabɔngiti boo oingee ta ndako ɛ mbai; 7 ta tina hee ebɔngiti boo nadoe mbai mɛɛnɛ odii wɛ. Endolo bala etoko kɔpɛ emɔti bɛngɛɛ mosali ɔ mbai ahele. 8 Mbai mɛɛnɛ nadii na bakumu ibakasume mbai ko nadii na basoda ibakasumeni. Nakabala na omɔti boo: "Kɛɛ!", akɛi; nakabala na okina boo: "Doa!", adoi; ko nakabala na mosali ɔ mbai boo: "Kɔɔ boo!", adii okɔ.» 9 Ehole ɛoka Yesu bibeli bia, asepa obuke na kumu ɔ basoda. Ahombana odii bato ibamokimanaka: «Nabali na nu ohuu boo: napakita tanea mondumba ma edhimeli hee, noko ta Isalɛlɛ.» 10 Ehole ɛyana bato ibalomaka kumu ɔ basoda ta ndako, batanea mosali aheli.

11 Ngɔngɔ djia Yesu akɛɛ ta ibonga ilabeamaka Naina; batingami ba nde ko na bato bakina bike bakɛɛ na nde engbanga. 12 Ehole eimea yo mbuti na edipako ɛ ibonga, asaka na bato bakɛɛ ta ikila akunda ebembe ɛ mwana moomi ɔ ikinda ɔ mwali ɔgwedja moomi. Bato bike ba ibonga dia badaka na nde engbanga. 13 Ehole ɛenɛ Kumu mwali ona ɔgwedja moomi, aluma na ndjokwa tina ɛ nde ko abala na nde boo: «Pɛpɛ oyea!» 14 Bea Yesu asabatea ko abinga epomba; bato ibadaka bayesonge baema. Yesu abala boo: «Mwenga moomi, nabali na wɛ, emaa!» 15 Moto mogo adaa ko abanga obala. Yesu amosɔmbɛdja odii nango. 16 Bato basusu babanga; bakumedja Ndjambe ko babala boo: «Motɛli monɛnɛ aimani ta ndanda ɛ boso!» Koko boo: «Ndjambe adoi akɔmɛdja bato ba nde!» 17 Gala ɛ modjɔ imakɔɔ Yesu ɛnangana ta Yuda esusu ko ta mikenge ma ngando ma mbuti na Yuda.

18 Batingami ba Yoani badjebedja midjɔ mia misusu odii molehi ɔ bobo. Yoani abea babae ta ndanda ɛ bobo 19 ko abaloma odii Kumu bɛngɛ bamohɔdjae boo: «Edii wɛ Masia ona oboani odoa kaoko loboani oomba moto okina?» 20 Ehole eimea bo odii Yesu, babala na nde boo: «Yoani Mobatisi alolomi odii wɛ bɛngɛ laohɔdjae boo: "Edii wɛ Masia ona oboani odoa kaoko loboani oomba moto okina?"» 21 Oko ta ehole ena, Yesu aheledja bato bike na bigo ba bobo, na biɛmɛ ba bobo ko na miembo mibe ko asɔmbɛdja ndjɛni odii bato bike ibagwa miso. 22 Bea asɔmbɛdja odii bato ibaloma Yoani boo: «Kɛɛ atɔndɔeni Yoani midjɔ imieni no ko imioki no: bato ibagwa miso baeni, bato ba mitɛngu badali, bato ba mabha baheli, bato ba ohoka baoki, bago basɔmbi ta mohelo, mwako mopele modjebedjami odii bakwali. 23 Sepi odii ona odii pɛpɛ okina edhimeli ɛ nde tina ɛ mbai!»

24 Ngɔngɔ dja iyane la bato ibaloma Yoani, Yesu abala na emumu ɛ bato ta tina ɛ Yoani boo: «Ekɛki no aindja ta esobe ye? Mososongo imakumanaka na epoipoi? Pɛpɛ! 25 Na bea, ekɛki no aindja ye? Moto olwali bisendja ba gala? Endolo, bato ibakalwae bisendja ba motwuia monɛnɛ ko bakahelame ta ibɔngi bakataneame ta ndako dja bakumu. 26 Okɛki no aindja nda? Motɛli? Edii bea, mbai nabali na nu, ko anɔi noko motɛli. 27 Tina ɛ boo Yoani adii ona odii Makomi obala ohuu boo:

"Hokea, nalomalea molomami ɔ mbai boso ba wɛ,

tina ɛ obongɛdja ndjia boso ba wɛ."

28 Yesu abakea boo, nabali na nu ohuu boo, ta bato ibabotama na mwali pɛpɛ onɔi Yoani na onɛnɛ; endolo, ona onɔi na okɛkɛ ta okumu ba Ndjambe amonɔi na onɛnɛ. 29 Bato basusu ko baputedjeli ba puti ibaoka Yoani, badjeba boo Ndjambe adii odjoo ko babatisama na nde. 30 Endolo Bafalusai na bato ba edjebeli ɛ mibeko batiola olulea ba Ndjambe tina ɛ bobo ko balona oinama na Yoani.»

31 Yesu abala naikina boo: «Na ndani naboani okoanedja bato ba ehole hee? Bakoani na nda? 32 Bakoani na bana ibadii na manɔkɔ ta esika ɛ masaka ma bato bike, badii ogama omɔti odii okina boo: "lobomeini piololo ko obuitini! Loembi biembo ba kɔndɔ ko oyeitini!" 33 Tina ɛ boo, Yoani Mobatisi adua, aiyaaka ipa ko aimwaka vino, ko obalani boo: "Adii na mwɛmbo mobe!" 34 Mwana ɔ moto adua, ayaka ko amwaka ko ɔbalani boo: "Hokea moto hoo adii etoko na posa ɛ oya ko omwa vino, ona odii modjebaneli ɔ baputedjɛli ba puti ko na bato ba masumu!" 35 Endolo owɛi ba Ndjambe badjebama elengɛɛ odjoo odii ibia ibakamosume.»

36 Mofalusai omɔti abea Yesu ayaka nɔbɔ nde. Yesu aingɛa odii mofalusai ko adaa ta mesa. 37 Oko ta ehole ena, mwali omɔti ɔ gala ebe ɔ ibonga dia aimea. Ɔoka yo boo Yesu adaka ta ndako ɛ mofalusai, adoa na molangi ma alabate molumake na malasi 38 ko aema mbuti na bigbota ba Yesu. Ayea ko apodjaa bigbota ba Yesu na mbisoli dja nde. Ngɔngɔ djia, abihakoa na swee dja nde, abibumea ko asopa malasi diko la bu. 39 Ɔenɛ mofalusai ona ɔ moosɔ ta ndako ɛ nde bea, asabalea yo mɛɛnɛ boo: «Ekadaa boo moto hoo adaki sooti mɛɛnɛ motɛli, eke adjebi mwali hoo omobingi boo adii mwali ɔ gala ebe.» 40 Yesu abala na mofalusai boo: «Simo, nadii na modjɔ ma ɔdjebedja.» Simo amosɔmbɛdja boo: «Molehi, bala.» 41 Yesu abala boo: «Moto omɔti adepedja baami babae falanga. Omɔti adaka na nyongo pata mikama mitano ko okina pata tuku itano. 42 Ena ɔtaka bo eka ɛ omosɔmbɛdja, abakinei ibo basusu babae nyongo djia. Ta ndanda ɛ ibo babae omopalalea onɔ nda?» 43 Simo amosɔmbɛjda boo: «Nalɛdjaka boo edii ona ɔdaka na nyongo enɛnɛ.» Yesu abala na nde boo: «Olongi.» 44 Na bea ahekoa odii mwali ko abala na Simo boo: «Oeni mwali hoo? Naingei ta ndako ɛ wɛ ko opitini madiba tina ɛ bigbota ba mbai; endolo yo asosi bigbota ba mbai na mbisoli dja nde ko abihakoi na swee dja nde. 45 Obumeitini ehole eosini wɛ, endolo yo akiniti obumeani bigbota donga oingei mbai ta ndako ɛ wɛ. 46 Osopeitini mosola diko la molo ma mbai; endolo yo asopeini malasi ta diko la bigbota ba mbai. 47 Na tina hee, nabali na wɛ ohuu boo: masumu ma nde mike mayɛɛmi ta tina ɛ epaeli ɛ nde enɛnɛ enemɛdjai yo. Endolo odii moto ona oyɛi bo na okɛkɛ aenɛmɛdjalea oko epaeli ekɛkɛ.» 48 Bea Yesu abala na mwali boo: «Masumu ma wɛ mayɛɛmi.» 49 Bato ibadaka na nde ta mesa basabaleana ibo mɛɛnɛ boo: «Muu mondumba ma moto nda ona ohɔni oyɛɛ noko na masumu?» 50 Endolo Yesu abala na mwali ona boo: «Edhimeli ɛ wɛ eoheledjai: kɛɛ na ogoo.»