1 Busa bomɔti, Yesu aongɔɔnɔkɔ ta esika emɔti. Ehole ɛbɛtɛ yo oongɔɔnɔ, omɔti ɔ batingami ba nde amohɔdja boo: «Kumu, lolaka oongɔɔnɔ, moda malaka Yoani Mobatisi batingami ba nde.» 2 Yesu abala na bu boo: «Ehole edii no oongɔɔnɔ, balani boo:

"Tata,

yɛɛ boo kombe ɛ wɛ ɛdae esɛnɔke;

yɛɛ okumu ba wɛ badoe!

3 Lopa engi busa mia madi na su posa.

4 Loyɛɛ iso masumu ma booso, tina ɛ boo iso mɛɛnɛ lokayɛɛ ibia bakalokɔmɛɛ obe.

Ko pɛpɛ olokina boo lakwae ta omekama."»

5 Yesu abala na bu koko boo: «Eka daa bo omɔti ɔ boono adii na mopalani ɔ nde ona okɛlea yo na bulu mɛɛnɛ tina ɛ obala na nde boo: "Mopalani ɔ mbai, bekedjani mapa masato. 6 Omɔti ɔ bapalani ba mbai ona odii ta mwɛngɔ asataneani oko hadedi ko naditi na eka ɛ omopa." 7 Ekada bo ta otei ba ndako mopalani ɔ nde amosɔmbɛdjai boo: "Kina otungeani! Edipako edipami ehele, na mbai na bana ba mbai losaami; nataboana oongɔɔ bɛngɛ naopɛ mapa." 8 Na bea, nabali na nu boo: noko na amiti oongɔɔ ta omopa tina ɛ boo adii mopalani ɔ nde, aongɔɔlea tina ɛ ingbangba la nde ko akokedjalea mua imakambaka na nde. 9 Ko mbai, nabali na nu boo: Yeyoani osɛngɛ baopaleani; yeyoani ohomba odihaleani; yeyoani oboma ekukɛ baodipoaleani. 10 Tina ɛ boo moto ndani ona osɛngɛkɛ adii oosɔ, ona ɔhombaka adii odiha ko badii odipoa ekukɛ odii ona ɔbomaka. 11 Ona sɛngɛmoto ndani ta ndanda ɛ boono, oboani opa mokpakola odii mwana ɔ nde moomi ekada boo amosɛngi moswi? 12 Kaoko amopalea gbangaikɔlɔ ekada boo amosɛngi itɔ? 13 Ino ibadii babe, odjebini opa leka lopele odii bana ba boono. Na onɔ Sɛngɛmoto ona odii o diko apɛtelea Mwembo Mosɛnɔke odii bia ibadii omosɛngɛ mo!»

14 Busa bomɔti, Yesu abengana mwembo mobe imaimedja moto emimi. Ena oimwana mwembo mobe, emimi abanda obala ko emumu ɛ bato ɛkamoa. 15 Endolo, bakina babala boo: «Edii Bɛlɛzebulu*, kumu ɔ miembo mibe, ona omopi kpati ɛ obengana miembo mia mibe!» 16 Bakina tina ɛ omotɛdja ibaku: bahombaka badihe odii yo embete ɛ okamoa oenɛmɛdja boo alomama na Ndjambe. 17 Endolo Yesu adjeba malɛi ma bobo; bea abala na bu boo: «Ekada boo okumu bokabani ko bato ba bu baoni bitumba ibo mɛɛnɛ, okumu bua bosukealea na obeha, ndako dja bu djibukeanalea djikina diko la djikina. 18 Ekadaa bea boo Satana asakabani yo mɛɛnɛ, moda ndani okumu ba nde boyeyoalea? Obalini bea boo, nadii obengana miembo mibe tina ɛ boo Bɛlɛzebulu apini kpati. 19 Nakababengana na moda mua, ona okapɛ ibadii imbati na nu kpati ɛ obengana nda? Ibadii na imbati na nu ibo mɛɛnɛ baenɛmɛdjaka boo okwini na ikambo! 20 Endolo ekada boo nabenganaka miembo mibe na ngulu ɛ Ndjambe, edii boo okumu ba Ndjambe bodoi mbunoko odii no. 21 Ekada moto ɔ ngulu ko odii na bipeko ba bila abanei ndako ɛ nde, leka la nde losusu lobaneamalea opele. 22 Endolo ekada boo moto omonɔi na ngulu amoimanei ko amolongi, amokatolalea bipeko ba bila ibikaisee yo molema ko aboani okabana leka losusu lomokatoi yo. 23 Ona odii pɛpɛ oda na mbai, adii moloni ɔ mbai; ko ona odii pɛpɛ osanganedja, adii onanganedja.

24 Ehole edii mwembo mobe oimana odii moto, modii olebaleba ta bisika ba bisobe ko modii ohomba iheme. Otaki yo esika ɛ iheme, mosabalei boo: "Nasɔmbɔlea ta ndako ɛ mbai, ena ɛkina mbai." 25 Mosɔmbi ko motanei ndako eombɔmoke, ebɔngɛdjamake. 26 Bea mwembo mua mobe mokɛi atomba miembo mikina mibe saambo iminɔi na obila, baingei ta ndako ko badai ena. Na bea, moda ma moto ona monɔlea obe onɔdja moda ma nde ma mbangi.»

27 Ehole ɛbala Yesu bea, mwali omɔti ta emumu ɛ bato abala na nde boo: «Sepi odii mwali ona olwa deemi la wɛ ko ona ɔɔnungea!» 28 Endolo Yesu amosɔmbɛdja boo: «Sepi ɛ onɔ edii wɛte odii bia ibakaoke ebaeli ɛ Ndjambe ko bakayesume!»

29 Bimumu ba bato badoa abolama mbuti na Yesu, abanga obala na bu boo: «Yangola hee edii yangola ebe; edii ohɔdja embete, endolo embete emɔti epametelea dongedja oko embete ɛkɔɔmɔ odii Yona. 30 Tina ɛ boo, moda madaa Yona embete tina ɛ bato ba Niniwe, moda momɔti Mwana ɔ moto adalea embete tina ɛ yangola hee. 31 Ta busa ba esambi, kumu mwali ɔ Saba aemabi boso ba yangola hee ko ayedumbabi na ikambo, tina ɛ boo adua donga bisika ba ohali bɛngɛ aoke bibaeli ba Solomo ibaluma na owɛi! Endolo, ona oonɔi Solomo adii haa! 32 Ta busa ba esambi, bato ba Niniwe baemabi boso ba yangola hee ko bayedumbabi na ikambo, tina ɛ boo bato ba Niniwe ɔɔka bo bileho ba Yona bahekodja milema. Endolo ona oonɔi Yona adii haa!»

33 «Moto tayodjae moinda tina ɛ omobomba kaoko omoisa nase dja poke; endolo adii omobakea diko la mesa ɛ mwinda, bɛngɛ boo bato ibaingeaka ta ndako baenɛ ohuu. 34 Diso la wɛ lidii moinda ma mokuku: diso la wɛ likada laenɛ opele, mokuku ma wɛ mosusu koko modii oenɛmɛ ohuu; endolo diso la wɛ likadaa na epeko, mokuku ma wɛ koko modii ta modidi. 35 Bea, tomadinga boo ohuu bodii ta tei ɛ wɛ bosaka imea modidi. 36 Ekadaa boo mokuku ma wɛ mosusu modii ta tei ɛ ohuu, pɛpɛ yale ekina ta modidi, modalea mosusu ta ohuu mɛɛnɛ, oko moda modii moinda ohoodja na ohuu ba mu ba ongɛngɛ.»

37 Ehole ɛbɛtɛ Yesu obala, mofalusai omɔti amobea ayaka odii yo. Yesu aingea ko adaa ta mesa. 38 Mofalusai akamoa ena oenɛ yo boo Yesu aisosa mabɔ boso ba oyaka. 39 Kumu abala na nde boo: «Ino Bafalusai: odini opuedja sokolu ɛ kɔbɔ na saani, endolo otei ba milema olumini na posa ɛ iba ko obila. 40 Otasipoakani eka! Ndjambe ona ɔ kɔɔ sokulu editi oko yo moto ɔkɔɔ otei? 41 Endolo pani odii bakwali ena edii ta otei ba kɔbɔ na saani dja boono, na moda mua misusu midalea osɛnɔɔ tina ɛ boono.

42 Ndjokwa ɛ boono, Bafalusai! Odii opaani odii Ndjambe ibondo la doomi la kona dja mokonda na dja ngando, ijikape ikɛmɔ ta mia, endolo otsiolini odjoo na bato ko na epaeli ɛ Ndjambe: ena edii modjɔ mobɔngɔkino okɔ, na pɛpɛ otsio la mikina.

43 Ndjokwa ɛ boono, Bafalusai! Okapaleni bigboto ba boso ta ndako dja miɔngɔɔnɔ ma Bayuda ko okapaleni baoisiakeni ta bisika ba masaka ma bato bike. 44 Ndjokwa ndani tina ɛ boono! Odini elengɛɛ makila imadii pɛpɛ oenɛmɛ ko bato badii odala diko la mu pɛpɛ odjeba!»

45 Omɔti ɔ bato ba edjebeli ɛ mibeko abala na Yesu boo: «Molehi, odii wɛ obala bea, odii olosinga iso koko!» 46 Yesu amosɔmbɛdja boo: «Ndjokwa odii no koko, bato ba edjebeli ɛ mibeko! Odini obakea ta mikɔngɔ ma bato mina minɔi na mandi ta olwa, ko oditini obinga mina mia noko na sɔngɔ ɛ mosapi tina ɛ obakɔmɛdja ta omilwa. 47 Ndjokwa ndani tina ɛ boono! Odii opikani makila ma omwenga tina ɛ batɛli, batɛli bia ibaowa bataatanu! 48 Oinedjaini bea boo ɔdhimakani mikɔ ma batatanu, tina ɛ boo baowa batɛli, ko ino, opikini makila ma bobo! 49 Na tina hee Ndjambe, ta owɛi ba nde, abala ohuu boo: "Nabalomeabi batɛli na ba apotele; baowabi bakina ta ndanda ɛ bobo ko banyɔkolabi bakina." 50 Bɛngɛ boo yangola hee ɛlwae lindo ɛ makia ma batɛli imasopea donga oyoama ba ngondo, 51 donga owama ba Abɛlɛ mbunoko owama ba Zakalia*, ona ɔowa bo si etumbelo ɛ mbeka na esika esɛnoke. Edii bea, nabali na nu ohuu, yangola hee elwalea lindo ɛ magwa mia masusu!

52 Ndjokwa ndani tina ɛ boono, bato ba edjebeli ɛ mibeko! Otombini fungola edii opaa enɔli ɛ odipoa edipako ɛ edjebeli: ino mɛɛnɛ otaingeakani ko ɔsiini ibia ibadii opala oingea.»

53 Ehole ɛ imana Yesu ta ndako ena, bato ba edjebeli ɛ mibeko na Bafalusai bamooka kɛlɛ ko bamohɔdja mahɔdja mida misusu: 54 bamopekeaka nduka bɛngɛ boo bamotɛdjae diko la bibaeli ba nde mɛɛnɛ.