1 Ta eyɛ ɛ busa ta busa ba eyenga, bali bakɛɛ ta ikila, na minɛ ma so epele imabɔngɛdja bo. 2 Batanea boo mondeke monɛnɛ imadipaka monɔkɔ ma ikila modii mohilingoanake o yɛɛlɛ; 3 baingia otei, endolo baitanea ndjemba ɛ Kumu Yesu. 4 Baidjeba eka ɛ okɔ, oko ta ehole ena baami babae baimea ibadaka balwali bisendja baongɛngɛ. 5 Babanga ko basunea mbanda dja bobo nase, baami bia babala boo: «Ohombakani ona odii na mohelo ta ndanda ɛ bago tina nda? 6 Aditi haa, apusoi. Lɛdjani moda mabala yo na nu ehole ɛdaka yo ta Galilai boo: 7 "Eboani boo Mwana ɔ moto akabame ta mabɔ ma bato ba masumu, abakame ta ekulusu ko ngɔngɔ dja maswi masato apusoe ta ogwa."» 8 Bea bali balɛdjana bibaeli ba Yesu. 9 Badonga ta ikila ko bakɛɛ atɔndɔɔ midjɔ mia misusu odii batingami doomi na omɔti ko na batingami bakina. 10 Ɛdaka Malia ɔ Magadala, Yoana na Malia nɛngɛ ɛ Djake. Bali bakina ibadaka na bu engbanga batɔndɔɔ koko gala ena odii ba apotele. 11 Endolo batingami balɛdjaka boo edii midjɔ ma pɛpɛ tina ko baibadhimea. 12 Na bea Piɛlɛ aema ko apeta ta ikila; asunama ko aenɛ oko biale ba molekani. Bea asɔmbɔ odii yo, na okamoa bonɛnɛ ta mua imakɔɔmɔ.

13 Oko ta iswi dia, batingami babae bakɛkɛ ta ngando ɛbeaka bo Emausu, ɛdaka na Yelusalema ohali ba ngonga ibae dja mɔndɔ. 14 Ena ɔdaka bo badale basoolaka diko la midjɔ misusu mia imanɔ. 15 Ehole ɛdaka bo babale ko babome kite, Yesu yo mɛɛnɛ abatama ko adala na bu engbanga. 16 Bamoenɛkɛ, endolo modjɔ momɔti mabasiaka boo batamodjeba. 17 Yesu abahɔdja boo: «Modjɔ mabomaka no kitɛ nda?» Ko baema, na ndjokwa esusu. 18 Omɔti ta ndanda ɛ bobo, obeaka bo Keleopa, abala na nde boo: «Edii oko wɛ haa ta Yelusalema, odii pɛpɛ odjeba muu mahulake anɔɔ ta maswi mii?» – 19 Yo abahɔdja boo: «Mua modjɔ nda?» Bamosɔmbɛdja boo: «Modjɔ mokɔɔmi na Yesu ɔ Nasaleta! Adaka motɛli ɔ ngulu; asainedja na mikɔ ko bibaeli ba nde boso ba Ndjambe ko boso ba bato basusu. 20 Bakumu ba banganga ba Ndjambe ba booso na bakumu ba booso bamokabi mbunoko etumbu ɛ ogwa ko bamobaki ta ekulusu. 21 Iso labakeaka milema diko la nde boo adalea ona oboanaki boo asikoe Isalaele. Endolo diko la midjɔ mia misusu, busabu edii iswi la basato donga okɔɔmi midjɔ mia. 22 Bea, bali bakina ba engbanga ɛ booso balokamodjai. Bakɛki sɔɔ hee ta ɛyɛ busa ta ikila 23 endolo bataneiti ndjemba ɛ nde. Bahuli alotɔndɔ boo baeni babwɛndi ko babadjebedjai boo adii ta mohelo. 24 Bakina baminasu bakɛi ta ikila ko batanei misusu oko moda mabala bali bia, endolo yo, bamoeniti.» 25 Bea Yesu abali na bu boo: «Tina ndani otakini esipoli, odini na motɛnɔ ta odhima midjɔ misusu imadjebedja batɛli! 26 Ɛiboanaka boo Masiya anɔngɔme boso ba oingea ta ekumu ɛ nde?» 27 Na bea abatingodja mia imabalama tina ɛ nde otei ba Makomi, banga mikanda ma Mose mbunoko mikanda misusu ma batɛli.

28 Ehole ɛimea bo mbuti na ngando ena ekɛkɛ bo, Yesu akɔɔ elengɛ boo apalaka anɔe. 29 Endolo ibo bamosia ko babala na nde boo: «Dikama na su; busa botiti ko bulu bobatami.» Aingea ta ndako tina ɛ oda na bu. 30 Adaa na bu ta mesa engbanga emɔti, atomba mapa ko asakoa Ndjambe; na bea abuki mapa ko abapi mo. 31 Bea, miso mabobo madipoa, ko bamodjeba, endolo alɛmɔɔ ta boso ba bobo. 32 Basabaleana boo: «Molema ma boso modakiti na sepi ehole elotingodjaki yo Makomi?»

33 Baema pɛpɛlɛ ko basɔmbɔ ta Yelusalema. Batanea batingami doomi na omɔti ibadaka esika emɔti na baminabu, 34 ibabalaka boo: «Sooti mɛɛnɛ Kumu apusoi! Simo amoeni!» 35 Batingami bia babae babatɔndɔɔ mua imakɔɔmɔ na bu na ndjia ko moda madjeba bo Yesu ta ehole ɛbuka yo ipa.

36 Oko ta ehole ɛdaka batingami babala midjɔ mia, Yesu yo mɛɛnɛ asaenɛmɛdja ta ndanda ɛ bobo ko abala na bu boo: «Bogoo badae na nu!» 37 Batingami baluma na bɔɔ bonɛnɛ, tina ɛ balɛdjaka boo baeni mongɔli. 38 Endolo Yesu abala na bu boo: «Oyeketanini tina nda? Tina ndani odini na kitɛ otei ba milema ma boono? 39 Hokeani mabɔ na bigbota ba mbai: edii oko mbai! Mɔmɔnini ko hokeani, tina ɛ boo mongɔli aditi na muni ko na kua, endolo mbai nadii na muni na kua.» 40 Ena ɔbalaka yo bea abainedja mabɔ na bigbota ba nde. 41 Batingami baluma na sepi ko na okamoa. Ena odaka bo oko pɛpɛ opeta dhima, mbunoko Yesu abahɔdja boo: «Odini na mɛɛka ɔ oyaka haa?» 42 Bamopa ekenge ɛ moswi ekalangamake. 43 Ayetomba ko ayeyaka boso ba bobo. 44 Bea abala na bu boo: «Ehole ɛdaka mbai na nu hokeani midjɔ mabalaka mbai na nu ohuu: mua imakomama tina ɛ mbai ta mobeko ma Mose, ta mikanda ma batɛli ko ta mikanda ma Biembo, midjɔ mia misusu mabuanaka boo makɔɔme.» 45 Bea adipoa owɛi ba bobo bɛngɛ boo basipoe Makomi, 46 ko abala na bu boo: «Hokeani mua imakomama: Masiya aboani onɔngɔmɔ, bea apusolea ta tei ɛ bago ngɔngɔ la iswi la basato, 47 ko eboani bo balehe diko la kombe ɛ nde ta mabota masusu, obanga ta Yelusalema; ta obea bato boo basɔmbɔtɔne mida ma bobo ko bayɛɛme ta masumu. 48 Ino odini batemo ba midjɔ mia misusu. 49 Ko naolomalea diko la boono mua imabunedjani Tata. Ta tina ɛ boono, dikamani ta ibonga mbunoko okalumaleani na ngulu ɛ diko.»

50 Bea Yesu akɛɛ na batingami ba nde sokolu ɛ ibonga, mbuti na Betania, ko oho, angangodja mabɔ ko abadjongoa. 51 Ehole ɛdaka yo abadjongoa, abɔtɔɔ na bu ko aihwea o diko. 52 Ta tina ɛ bobo, bakwa magunda boso ba Yesu ko basɔmbɔ ta Yelusalema, na sepi enɛnɛ. 53 Bihole bisusu bakumedjaka Ndjambe ta tepelo.