1 Ta ehole ena, Kaisala Ogisito*, apa mobeko ma pisi tina ɛ odjeba motwuia ma bato basusu ibadaka nase dja okumu ba nde. 2 Pisi ena, ɛ boso, ɛkɔɔmɔ ta ehole ɛdaka Kuluneli gupunɛlɛ ɔ Sulia. 3 Moto mosusu akɛkɛ akomedja kombe, moto na moto ta ibonga la nde mɛɛnɛ. 4 Yosepu koko adonga ta Nasalɛta, ibonga la Galilai, tina ɛ okɛ ta Yuda, ta Bɛtɛlɛmɛ ta esika ɛbotama Davidi; tina ɛ boo Davidi adaka taata nde, 5 bɛngɛ boo asakomedjae engbanga na Malia ona ɔboanedjamaka boo amobale, ona ɔdaka na deemi. 6 Ta ehole ena ɛdaka bo ta Bɛtɛlɛmɛ, iswi la nde la obota lakoka. 7 Ko abota mwana ɔ nde moomi ɔ boso. Amodinga na bisendja ko amosambea ta esika ɛ eyakeli ɛ bingbɛndɛ, tina ɛ bo esika ɛtaka tina ɛ bobo ta ndako ɛ bakɛndɛli.

8 Ta mbuti mbuti na Bɛtɛlɛmɛ, babanei ba bingbɛndɛ badaka ta gue na bulu tina ɛ obanea mela ma bobo ma bingbɛndɛ. 9 Obwɛndi ɔ Kumu asaenɛmɛdja na bu ko ekumu ɛ Kumu ebahua na ohuu. Bea badaa na bɔɔ bonɛnɛ. 10 Endolo Obwɛndi abala na bu boo: «Pɛpɛ obangani, tina ɛ boo, naolwɛini gala epele esepedjalea bato basusu: 11 ta bulu buu ta ibonga la Davidi, tina ɛ boono Moheledja abotami; yo Klisto, Kumu! 12 Ko hokeani embete emodjebalea na nu: otanealeani mwana mopu ahuami na bisendja ko asambi ta eyakeli ɛ tito.»

13 Oko ena, bakina babwɛndi bike ba busa bakatana na obwɛndi ona ɔduaka boso bakumedja Ndjambe boo:

14 «Ekumu odii Ndjambe ta bisika Binɔi Diko,

ko ogoo ta ngondo odii bato ibakapale yo!»

15 Ehole ɛsɔmbɔ babwɛndi ta busa, babanei ba tito basabaleana boo: «Na bea lakɛɛ mbunoko ta Bɛtɛlɛmɛ: eboani na su boo laenɛ mua mosakɔɔmɔ oho, imolodjebedjai Kumu.» 16 Bakɛɛ pɛpɛlɛ ko batanea Malia na Yosepu na mwana mopu asambi ta eyeeli ɛ tito. 17 Ɔenɛ bo mwana, badjebedja midjɔ misusu imabala obwɛndi ta tina ɛ nde. 18 Bato basusu ibaoka midjɔ mia ta minɔkɔ ma babanei ba tito bakamoa. 19 Malia abanea midjɔ mia misusu ta molema, ko amilɛdjanaka obuke. 20 Ngɔngɔ djia babanei ba tito basɔmbɔ. Badaka bakumedjae onɛnɛ ba Ndjambe tina ɛ midjɔ mia misusu maoka bo ko maenɛ bo, moda imabatɔndɔɔ obwɛndi.

21 Iswi la mwambe ngɔngɔ dja obotama, ehole ɛ omolena epole ɛimea, bamobakea kombe ɛ Yesu, kombe ɛbadjebedja obwɛndi boso boo nango alwae deemi la nde.

22 Ngɔngɔ djia ehole ɛimea tina ɛ Yosepu na Malia okokedja bibongɛdjɛli ba osɛnodjama, okimana na mobeko ma Mose*. Bakɛɛ na mwana ta tepelo ɛ Yelusalɛmɛ ta tina ɛ omobudjea odii Kumu, 23 tina ɛkomama ta mobeko ma Kumu boo: «Sɔmi moomi mosusu adii obudjeama tina ɛ Kumu.*» 24 Okokana na mobeko mua, badaka na elomu ɛ Kumu opaa koko tina ɛ mbeka bidoa babae mwali na moomi kaoko bana ba bimbenga* babae. 25 Bea ta Yelusalɛmɛ ɛdaka na moomi omɔti kombe ɛ nde Simeona. Adaka moto ɔ odjoo ko na isuma, adaka ta yambo ɛonɛ ona ɔboanaka osikoa Isalaɛlɛ. Mwembo Mosɛnoke madaka na nde 26 ko mamodjebedja boo atagwa boso ba oenɛ Klisto ona olomama na Kumu. 27 Mwembo Mosɛnoke malɔndɔ Simeona ta tepelo, ta ehole ena ɛdoa baboti ba Yesu nande tina ɛ okokedja eka eboanedja mobeko, 28 Simeona amotomba ta mabɔ ma nde ko asakoa Ndjambe na bibaeli bii:

29 «Hadɛdi, Kumu, okokedjai mbuno ɛwɛ:

oboani okina mosali ɔ wɛ agwɛ na ogoo.

30 Tina ɛ boo naeni na miso ma mbai mɛɛnɛ, moheledja,

31 mohelo mua imabɔngedja wɛ boso ba bato basusu:

32 edii ohuu bua bokɔlea boo ɔdjebame ta mabota ma ngondo esusu ko ibua bodalea ekumu ɛ Isalɛlɛ bato ba wɛ*.»

33 Sango nɔbɔ nango badaka bakamoa ta midjɔ mia imidaka Simeona abala diko la nde. 34 Simeona abadjongoa ko abala na nango Malia boo: «Ndjambe ahɔɔ mwana hoo tina ɛ ɔdumba kaoko ongangodja bato banɛnɛ ba Isalɛlɛ. Adalea embete ɛ Ndjambe ena etakedjalea ookana odii bato, 35 ko malɛi imabombamaka ta milema ma bato banɛnɛ madjebamabi. Ko wɛ, Malia, ookalea saya oko elengɛɛ saya ɛ mopata okatobanemo molimo ma moto.»

36 Ɛdaka koko na motɛli mwali, ɔ kombɛ Ana, ona odaka mwa mwali ɔ Penuɛlɛ, ɔ ekomi ɛ Asele. Adaka mobange mɛɛnɛ. Anɛngɛdja mbua saambo yo nɔbɔ moomi ɔ nde ona obalana na nde donga bwɛngɛ ba nde, 37 na bea, anɛngɛdja mwali ɔ ogwa na moomi mbua tuku mwambe na banɛi. Adaka seko ta tepelo, asaleaka Ndjambe bulu na moi: na osabekea ko na miɔngɔɔnɔ. 38 Aimea oko ta ehole ena ko asɔmbɛdja misakoa odii Ndjambe. Ko abala tina ɛ mwana odii bato basusu ibaombaka isiko la Yelusalɛmɛ.

39 Ɔsidja baboti ba Yesu okokedja misusu moda imahɔdjaka mobeko ma Kumu, bayana na nde ta Galilai, ta ibonga la bobo la Nasalɛtɛ. 40 Mwana akandoaka ko asapingedjaka. Aluma na owɛi ko ndjokwa ɛ Ndjambe edaka diko la nde.

41 Baboti ba Yesu, bakɛkɛ tu mbua ta Yelusalɛmɛ tina ɛ tɛkɛ ɛ Pasika. 42 Ɔkokedja Yesu mbua doomi na babae, bakɛɛ na nde engbanga okimana na okɔkɔ* ba bobo. 43 Ɔsia tɛkɛ, bayana, endolo mwana Yesu adika ta Yelusalɛmɛ pɛpɛ baboti ba nde odjeba. 44 Balɛdjaka boo Yesu adaka engbanga emɔti na bato ibadaleanaka na bu ta mwɛngɔ ena bamakɔɔ iswi imɔti la mɔndɔ. Bamohomba ta ndanda ɛ bato ba ibota na badjebaneli ba bobo, 45 endolo baimodiha. Basɔmbɔ ta Yelusalɛmɛ ta ihombi la nde. 46 Ta iswi la basato, bamotanea ta tepelo: adii na mobondo ndanda ɛ bato ba edjebeli ɛ mibeko, abahokamedja ko abahɔdja mahɔdja. 47 Bato basusu iba mohokamedjaka badaka bakamoa na owɛi ba nde ko na misɔmbedja imapaka yo. 48 Ta ehole ɛmoenɛ baboti ba nde, bakamoa obuke ko nango abala na nde boo: «Mwana ɔ mbai, tina elokɔi wɛ bea nda? Mbai nɔsɔ sangwao, losatungei obuke mɛɛnɛ ta ihombi la wɛ.» 49 Abasɔmbɛdja boo: «Tina ɛhombakanini na nu nda? Otadjebakani boo eboani na mbai oda ta ndako ɛ Tata?» 50 Endolo baisipoa tina ɛ midjɔ mabalaka yo na bu. 51 Yesu ayana koko na bu ta Nasalɛtɛ. Abasumaka. Nango abaneaka midjɔ mia misusu ta molema. 52 Yesu akandoaka, na oyai, na owɛi ko asepedjaka Ndjambe ko na bato*.