1 Yesu abala na batingami ba nde boo: «Midjɔ ma okwedja moto ta masumu mitataka, endolo ndjokwa odii ona odii oko boo baminande bakwae ta masumu! 2 Enɔi na opele tina ɛ nde boo bamotingee mondeke monɛnɛ ta dɔli ko bamomae ta ibeke ilinɔi na onɛnɛ, ta esika ɛ boo akwedjae ta isumu omɔti ɔ bii ibakɛkɛkɛ. 3 Angatanani ta eloke ɛ boono mɛɛnɛ!

Ekadaa mwangwao moomi akaokɔmɛɛ modjɔ mobe, mopɛlɛ na ngulu mɛɛnɛ. Ko ekada boo asapɛli ta ibunga la nde, moyɛɛ. 4 Ekadaa boo aokɔmei obe mbala saambo ta busa bomɔti ko engi mbala adoi abala na wɛ boo: "Naokɔmɛi obe", omoyɛlea.»

5 Busa bomɔti Bapotele babala na Kumu boo: «Kandodja edhimeli ɛ boso!» 6 Kumu abasɔmbɛdja boo: «Ekada bo odini na edhimeli elengɛ mombuma ma sinapi, obalaleani na mole mu boo: "Sabikoa ko kɛɛ asaone ta ibeke ilinoi na onɛnɛ", ko mo osumalea.»

7 «Ekadaa boo: omɔti ta ndanda ɛ boono adii na mosali ona okaone kaoko ona okabanee meela ma bingbɛndɛ. Akamoɛnɛ ahule ta gue, abalalea na nde boo: "Dua pɛpɛlɛ adae ta mesa?" 8 Titi bea, abalalea na nde wɛte boo: "Bongɛdja mia ma mbai, ngɔngɔ djia sɔmbɔtɔnɔ bisendja ko dua abɔngedjae mesa tina ɛ mbai; ehole esidjalea mbai oya, wɛ koko, oyalea ko omwalea." 9 Aboaniti osɔmbɛdja misakoa odii mosali ɔ nde tina ɛ boo akokedjai imamohɔdja yo boo akɔe? 10 Edii oko moda momɔti tina ɛ boono: ehole ekokedjalea no misusu imihɔdjami odii no, balani boo: "Lodii basali ba pɛpɛ gala; lokokedjai oko elomu ɛ booso."»

11 Ta mwɛngo ma nde ta dɔngɔ la Yelusalema, Yesu anɔɔ ta mokpɛngɔ ma si Samalia na Galilai. 12 Ehole ɛingea yo ta ngando emɔti bato ba mabha doomi badua asaka na nde. Baema ohali 13 ko babanga ogama na ngulu boo: «Yesu, Molehi, lookea ndjokwa!» 14 Yesu abaenɛ ko abala na bu boo: «Kɛɛni asainedjeni odii banganga ba Ndjambe.» Oko ta ehole ɛdaka bo bakɛɛ, basɛnɔdjama na mabha ma bobo. 15 Omɔti ta ndanda ɛ bobo, oenɛ yo boo aheli, asɔmbɔ ngɔngɔ ena asakoe Ndjambe na moholi diko. 16 Akwa magunda ta mako ma Yesu, mbanda esuni ta kpɔtɔ, ko amosakoa. Ena bea moto ona adaka Mosamalia. 17 Bea Yesu abala na nde boo: «Bato ba mabha doomi basɛnɔdjamiti? Bakina ibwa bado? 18 Pɛpɛ noko moto omɔti osɔmbi asakoa Ndjambe? Omisɔmbɔ oko mokɛndɛli hoo?» 19 Bea Yesu abala na nde: «Emaa ko kɛɛ; edhimeli ɛ wɛ eoheledjai.»

20 Busa bomɔti Bafalisai bahɔdja Yesu ehole ndani eduabi Okumu ba Ndjambe. Abasɔmbɛdja boo: «Okumu ba Ndjambe botadoa na bimbete ba oenɛmɛ ohuu. 21 Babaletebi boo: "Hokea, bodii haa!" kaoko boo: "Bodii boo!" Tina ɛ boo, djebani, Okumu ba Ndjambe bodii ta ndanda ɛ boono.»

22 Na bea abala na batingami ba nde boo: «Maswi maduake odabini na posa ɛ oenɛ noko iswi imɔti la Mwana ɔ moto, endolo olienɛtebini. 23 Babalabi na nu boo: "Hokeani boo!" kaoko boo: "Hokeani haa!" Endolo pɛpɛ okɛni, pɛpɛ opetani. 24 Elengɛ mokaikai okangɛngɛ mo ta ehole ekakatise mo dɔngɔ na dɔngɔ la busa, edabi moda mua ta maswi ma Mwana ɔ moto. 25 Endolo eboani boso mɛɛnɛ boo aoke saya enɛnɛ ko adumbame na yangola hee. 26 Moda imanɔmɔ ta ehole ɛ Noa monɔmɔbi oko moda mua ta maswi ma Mwana ɔ moto. 27 Ta ehole ena bato bayaaka ko bamwaka, baosɔnɔkɔ ko babaledjaka bana ba bobo mbunoko busa ibaingea Noa ta masua: na bea pela enɛnɛ edoa ko ɛ baowa ibo basusu. 28 Edabi oko bea elengɛ ta ehole ɛ Lɔtɔ: bato bayaaka ko bamwaaka, basombaka ko batɛkɛkɛ, baonaka gue ko bapikaka ndako; 29 endolo busa ibakina Lɔtɔ, Sɔdɔmɔ, mbua ɔ mosa ko ɔ sufele akwa donga busa ona ɔbaowa ibo basusu. 30 Edabi moda momɔti ta busa iboenɛmɛbi Mwana ɔ moto.

31 Ta busa bua, ona odabi ta yoka ko odabi na leka la nde otei ba ndako ɛ nde, ataingea alotomba! Moda momɔti, odii ona odabi ta gue ɛ nde, atasɔmbɔ ta ndako ɛ nde! 32 Lɛdjani mua imakɔmɔ na mwali ɔ Lɔtɔ! 33 Moto ona oohombabi abanee mohelo ma nde amobungedjabi, endolo ona oobungedjabi mohelo ma nde, amobaneabi. 34 Nabali na nu ohuu boo, ta bulu bua, bato babae badabi basambi ta bwako bomɔti: omɔti atombamabi ko okina adikabi. 35 Bali babae badabi bainda ndɔngɔ esika emɔti: omɔti atombamabi ko okina adikabi. [ 36 Baami babae badabi ta gue, omɔti atombamabi ko okina adikabi.]» 37 Batingami bamohɔdja boo: «Kumu, mua onɔbi mo hɔ?» Ko asɔmbɛjda boo: «Esika edabi ndjemba, edii oko ena esika ebolamabi popo.»