1 Ɛdaka ta mbua ɔ doomi na batano ta okumu ba Kaisala Tibɛlɛ; Pɔsi Pilato adaka gupunɛlɛ ɔ Yuda, Elode ta Galilai ko mwanango Pilipo ta Itule na Talakonitide, Lisania ta Abilɛne, 2 Ana nɔbɔ Kaifa badaka banganga ba Ndjambe ibanɛnɛ. Ta ehole ena, ebaeli ɛ Ndjambe ɛpama odii Yoani mwana ɔ Djakalia, ta esobe. 3 Yoani akɛɛ ta mikenge ma ngando misusu ima mbuti na dua ɛ Yolodane. Alehaka boo: «Sɔmbɔtɔnɔni moda ma bono, inamani ko Ndjambe aoyɛleani ta masumu ma boono.» 4 Ɛkokedjama oko moda makoma motɛli Isaya ta buku ɛnde:

«Moholi ma moto ona odii ogama ta esobe:

Bɔngɛdjani ndjia ɛ Kumu,

ninodjani migase ma nde!

5 Lumedjani mimbɔndɔ misusu,

ngomba esusu na ikoli isusu lobukeamabi;

ndjia dja makumba djininodjamabi,

ndjia dja mikulubɔndu ibongɛdjamabi,

6 Ko moto mosusu aenɛbi mohelo imapama na Ndjambe*.»

7 Bato bike baduaka odii Yoani bɛngɛ bo abaine. Abalaka na bu boo: «Mbota dja mabate, ona olakini boo otieni kɛlɛ ɛ Ndjambe ena edii mbuti nda? 8 Inedjani na ndjia ɛ mikɔ ma boono boo osɔmbɔtɔnini mida ko kinani osabaleani boo: "Abalayama adii taata su*" Ta tina hee naodjebedjakani ihuu boo Ndjambe aboani ohekodja ndeke djii boo djaimee bana ba Abalayama! 9 Epondo edii mɛɛnɛ mbuti tina ɛ olena nginga dja mele: mole muu imodii pɛpɛ obota mbuma ipele modii olenama ko otumbama ta mosa.»

10 Bibole ba bato bamohɔdja boo: «Bea oboani so okɔ enao?» 11 Abasɔmbɛdja boo: «Ona odii na bisendja bibae, apɛ emɔti odii ona otakaka, ko ona oopeli eka ɛ oyaka ayekaane.»

12 Baputedjɛli ba puti badoa bɛngɛɛ boo bainame ko bahɔdja Yoani boo: «Molehi, eboani so okɔ nde?» 13 Abasɔmbɛdja boo: «Pɛpɛ oputedjani eka ɛ onɔ diko la mua imaoinedjani bo.» 14 Basoda koko bamohɔdja boo: «Ko iso, eboani so okɔ nde?» Abasɔmbɛdja boo: «Pɛpɛ okatoani falanga odii moto na ngulu kaoko okosa na moto midjɔ, endolo sepani na iputi la boono.»

15 Elengɛɛ ɔdaka bato basusu na elɛndɛ enɛnɛ: moto na moto alɛdjaka boo Yoani ahɔni oda Masia. 16 Bea Yoani abala na ibo asusu boo: «Mbai, nadii oinani na madiba; endolo ona odoake anoini na ngulu: naboaniti noko olodja mikulu ma sapato dja nde. Yo, ainaleani na Mwembo Mosɛnɔke ko na mosa. 17 Ta ebɔ ɛ nde apeli inyongela tina ɛ obɔtɔdja mbuma dja ndongo na ndjani. Aboleabi mbuma dja ndongo ta ebombelo ɛ nde, endolo atumbabi ndjani ta mosa ma pɛpɛ odimea.»

18 Yoani atɔndɔkɔ Mwako Mopele odii bato na obapingedja ta midjɔ mikina minɛnɛ. 19 Noko bea, Yoani apɛlɛ Elode, ona odaka gupunɛlɛ ɔ Galilai, tina ɛ boo aosɔ Elodiade, mwali ɔ mwanango, ko akɔɔ mikina midjɔ mibe mike. 20 Na bea, Elode akɔɔ mokina modjɔ mobe ma onɔ: aisa Yoani ta bɔlɔko.

21 Ngɔngɔ dja oinama ba bato basusu, Yesu koko ainama. Ehole ɛdaka yo aongɔɔnɔ, busa basadipoa, 22 ko Mwembo Mosɛnɛke matita diko la nde elengɛɛ embenga. Ko kɔpɛ eokama donga ta busa boo: «Odii Mwana ɔ mbai ɔ epaeli; nadii na sepi enɛnɛ na wɛ.»

23 Yesu adaka na mbua okimana tuku isato ehole ɛbanga yo elomu ɛ nde. Bato baledjaka bo adaka mwana ɔ Yosepu, ona odaka mwana ɔ Eli, 24 mwana ɔ Matati, mwana ɔ Lewi, mwana ɔ Meleki, mwana ɔ Yanai, mwana ɔ Yosepu, 25 mwana ɔ Matatiasi, mwana ɔ Amosa, mwana ɔ Naume, mwana ɔ Esile, mwana ɔ Nagai, 26 mwana ɔ Maati, mwana ɔ Matatiasi, mwana ɔ Semeine, mwana ɔ Yosɛkɛ, mwana ɔ Yoda, 27 mwana ɔ Yoanana, mwana ɔ Lesa, mwana ɔ Yolobabɛlɛ, mwana ɔ Sealatiele, mwana ɔ Neli, 28 mwana ɔ Mɛlɛki, mwana ɔ Adi, mwana ɔ Kosamɛ, mwana ɔ Elimadama, mwana ɔ Elɛ, 29 mwana ɔ Yesu, mwana ɔ Eliezɛlɛ, mwana ɔ Yolime, mwana ɔ Matati, mwana ɔ Lewi, 30 mwana ɔ Simeona, mwana ɔ Yuda, mwana ɔ Yosepu, mwana ɔ Yoname, mwana ɔ Eliakimi, 31 mwana ɔ Melea, mwana ɔ Mena, mwana ɔ Matata, mwana ɔ Natana, mwana ɔ Davidi, 32 mwana ɔ Yese, mwana ɔ Obede, mwana ɔ Boaza, mwana ɔ Sala, mwana ɔ Nasona, 33 mwana ɔ Aminadaba, mwana ɔ Adimini, mwana ɔ Alani. Mwana ɔ Helesone, mwana ɔ Pelese, mwana ɔ Yuda, 34 mwana ɔ Yakobo, mwana ɔ Isaka, mwana ɔ Abalayama, mwana ɔ Tela, mwana ɔ Naholo, 35 mwana ɔ Selugu, mwana ɔ Leu, mwana ɔ Pelege, mwana ɔ Ebele, mwana ɔ Sela, 36 mwana ɔ Kenane, mwana ɔ Alapasade, mwana ɔ Sɛmɛ, mwana ɔ Noa, mwana ɔ Lɛmɛkɛ, 37 mwana ɔ Metusaleme, mwana ɔ Enoka, mwana ɔ Yelede, mwana ɔ Malaleele, mwana ɔ Kenane, 38 mwana ɔ Enosi, mwana ɔ Seti, mwana ɔ Adama, mwana ɔ Ndjambe.