1 Yesu, aluma na Mwembo Mosɛnɔke, adonga ta Yolodane ko alɔndɔmɔ na Mwembo ta esobe. 2 Amekama na djabulu maswi tuku inei. Aiya eka ta maswi mia ko, ngɔngɔ djia aoka ndja. 3 Bea djabulu abala na nde boo: «Ekada boo odii Mwana ɔ Ndjambe, bala na mondeke muu boo maimee ipa.» 4 Yesu amosɔmbɛdja boo: «Ɛkomama boo: "Moto atahela etoko na ipa*."»

5 Djabulu akɛɛ na nde ta esika enɔi diko, amoinedja mbala emɔti makumu masusu ma ngondo 6 ko abala na nde boo: «Naopalea kpati hee esusu ko odiheli ba makumu mia: tina ɛ bo ɛpama odii mbai, ko nahɔni opa odii ona odii mbai opala boo namopɛ. 7 Okakwa magunda boso ba mbai, losusu lodalea la wɛ.» 8 Yesu amosɔmbɛdja boo: «Ɛkomama boo: "Okumedjabi Kumu Ndjambe ɔ wɛ ko omosakoabi oko yo buki*."»

9 Ngɔngɔ djia djabulu amolɔndɔ koko ta Yelusalema, amobakea odiko la tepelo ko abala na nde boo: «Okada Mwana ɔ Ndjambe, sadumba donga haa mbunoko onase; 10 tina ɛkomama boo: "Alomabi babwɛndi ba nde bɛngɛɛ ba obanyee." 11 Na koko boo: "Baokaabi ta mabɔ ma bobo na bɔɔ ba bo egbota ɛ wɛ etataa mondeke momɔti."» 12 Yesu amosɔmbedja boo: «Ɛkomama boo: "Pɛpɛ omeka Kumu Ndjambe ɔ wɛ."» 13 Ɔsidja yo omeka Yesu na mida misusu, djabulu asasua ohali na nde ta yambo ɛ ehole ekina.

14 Yesu asɔmbɔ ta Galilai, molumake na ngulu ɛ Mwembo Mosɛnɛke. Gala ɛ nde enangana ta ekenge ena ɛ ngando esusu. 15 Alehaka ta ndako dja miongɔɔnɔ dja Bayuda ko moto mosusu amokumedjaka.

16 Yesu akɛɛ ta Nasalɛta, ta esika ɛbɔkɔmɔ yo. Ta iswi la sabata, aingea ta ndako ɛ miɔngɔɔnɔ ɛ Bayuda moda madjebeana yo okɔ. Aema tina ɛ olanga Makomi 17 ko bamopa buku ɛ motɛli Isaya. Adipoa ta ekenge hee ɛkomama boo:

18 «Mwembo ma Kumu modii diko la mbai,

ahɛngɛni tina ɛ otɔndɔɔ Mwako Mopele odii bakwali.

Alomani tina ɛ odjebedja isiko la bato ba ibuli

ko odii ibagwa miso boo baenɛ,

tina ɛ osɔmi odii bia ibadii onɔngɔmɔ,

19 tina ɛ odjebedja mbua ɔ ndjokwa ɛ Kumu*.»

20 Bea Yesu adipa buku, ayesɔmbɛdja odii mosali ko adaa na manɔkɔ. Bato basusu ibadaka otei ba ndako ɛ miɔngɔɔnɔ ɛ Bayuda batingia miso ma bobo odii yo. 21 Na bea abanga obala na bu boo: «Busabu, ebaeli hee ɛ Ikomi ekokedjami tina ɛ ino ibaokakani.» 22 Bato basusu basepa na Yesu, ko bakamoa na bibaeli bipele ibahulake yo abala. Babala boo: «Hoo titi mwana ɔ Yosepu?» 23 Yesu abala na bu ohuu boo: «Obalaleani na mbai sooti mɛɛnɛ indjɛ dii boo: "Monganga, saheledja wɛ mɛɛnɛ." Obalaleani na mbai koko boo: "Laoka misusu imakɔ wɛ ta Kapalanauma, kokedja koko midjɔ mia misusu haa ta ibonga la wɛ mɛɛnɛ."» 24 Ko abakea boo: «Nabali na nu sooti: pɛpɛ motɛli omɔti ɔɔsɔmɔ opele ta ibonga labotama yo. 25 Naikina, nahɔni odjebedjani sooti boo bali ba ogwa na baami badaka bike ta Isalɛlɛ ta ehole ɛ Elia, ehole ɛ pɛpɛ mbua okwa mbua basato na ekenge ko ndja enɛnɛ ɛkwa ta ngando esusu*. 26 Noko bea Ndjambe ailoma Elia odii mwali ɔ ogwa na moomi omɔti ta ndanda ɛ bobo, endolo oko odii mwali ɔ ogwa na moomi ta Salepeta, ibonga imɔti la Sidona. 27 Ɛdaka koko na bato bike ba mabha ta Isalɛlɛ ta ehole ɛ motɛli Elisa; noko bea pɛpɛ omɔti ɔhela na mabha ma nde dongedjaka oko Namana, moto ɔ Sulia*.»

28 Bato basusu ibadaka ta ndako ɛ miɔngɔɔnɔ ɛ Bayuda, baluma na kɛlɛ ehole ɛoka bo midjɔ mia. 29 Baema, basuala Yesu osokolu ba ibonga ko bakɛɛ na nde ta sɔngɔ ɛ ikoli ta esika epika bo Nasalɛta, bɛngɛ bo bamohilingoanedjae ta esika ɛ pɛpɛ osaika. 30 Endolo anɔɔ ta ndanda ɛ bobo ko akɛɛ.

31 Yesu akɛɛ ta Kapalanauma, ibonga la Galilai, ko alehaka ena maswi masusu ma sabata*. 32 Bato bike bakamoaka na moda ma nde ma oleha, tina ɛ boo abalaka na kpati. 33 Ta ndako ɛ miɔngɔɔnɔ ɛ Bayuda, ɛdaka na moto omɔti ona ɔtungeamaka na mwembo mobe. Agama na moholi mopipo boo: 34 «Aa! Yesu ɔ Nasalɛta, modjɔ ma boso na wɛ nda? Edoi wɛ alobeedja? Naodjebi opele: odii Mosɛnɔke ɔ Ndjambe!» 35 Yesu abala na mwembo mobe na kɛndjɔ boo: «Daa ogoo ko imana odii moto hoo!» Mwembo mobe mamodumba ta kpɔtɔ boso ba bato basusu ko maimana pɛpɛ omokɔ obe. 36 Bato basusu bakamɔa obuke ko basahɔdja boo: «Muu mondumba ma kɔpɛ nda? Adii obengana na kpati ko na ngulu miembo mibe ko maimanaka!» 37 Ko gala ɛ Yesu enangana ta bisika bisusu ba ekenge ɛ ngando ena.

38 Yesu aimana ta ndako ɛ miɔngɔɔnɔ ɛ Bayuda ko akɛɛ ta ndako ɛ Simo. Okio ba Simo o mwali adaka na mosa mopipo ta mokuku ko bahɔdja Yesu bo akoe maa modjɔ tina ɛ nde 39 Yesu asunama odii yo ko, agamea mokuku mosa na ngulu mɛɛnɛ. Mokuku mosa mamokina, oko ena aema ko abanga obakɔmɛdja.

40 Ɔtita busa, bato ibadaka na bato ba bipeko mindumba na mindumba baduaka na bu odii Yesu. Abakeaka mabo diko la omɔti na omɔti ko abaheledjaka. 41 Miembo mibe maimanaka odii bato ba bipeko bike magamaka boo: «Odii Mwana ɔ Ndjambe!» Endolo Yesu abala na bu na opipo ko ababenda matoi boo batabala, tina ɛ ibo badjebaka boo adii Masiya.

42 Ɔya busa, Yesu aimana ta ibonga ko akɛɛ ta esobe. Bato bike babanga omohomba ko ehole ɛimea bo ta esika ɛdaka yo, bapalaka onɛngɛdja na nde bɛngɛɛ asakabakina. 43 Endolo Yesu abala na bu boo: «Eboani na mbai otɔndɔɔ Mwako Mopele ma Okumu ba Ndjambe ta mabonga makina koko, tina ɛlomama na mbai iyena.» 44 Ko alehaka ta ndako dja miɔngɔɔnɔ dja Bayuda dja ngando ena.