1 Ta tepelo, Yesu ahokeaka na okeba bosusu dɔngɔ na dɔngɔ la nde ko aenɛ badiheli ibadaka baisa bipeeli ta esika eboanedjamaka tina ɛ bu. 2 Aenɛ koko mwali ɔgwa na momi ona ɔdaka mokwali aiisa falanga ibae dja pɛpɛ motwuia monɛnɛ. 3 Na bea Yesu abala boo: «Nabalaka na nu sooti: mwali ho mokwali ɔɔgwa na moomi api onɔdja bato basusu. 4 Tina ɛ boo bato basusu bapi falanga idaki na bu pɛpɛ oda na tina na dju, endolo ta okwali ba nde, api falanga dja nde isusu ibɔngɔki na nde ohela.»

5 Bato bakina babalaka tina ɛ tepelo na moda mayepika bo na ndeke dja omwenga ko na bipeeli ibapama odii Ndjambe. Endolo Yesu abala na bu boo: 6 «Maswi maduake pɛpɛ noko mondeke momɔti modikabi mobaki diko la mokina moda maenɛkɛ no; esusu ebukeanabi.»

7 Na bea bamohɔdja boo: «Molehi, lodjebedja ehole ndani ekokedjamabi mo? Embete ndani eloinedjabi midjɔ mia?» 8 Yesu asɔmbɛdja boo: «Kebani, pɛpɛ odimani bo ɔkoseameni. Tina ɛ boo bato bike baduabi na kombe ɛ mbai ko babalabi boo: "Iso Masiya!" ko: "Ehole eimei!" Pɛpɛ obakimanani. 9 Ehole eokabi no ngilimo dja bila na dja bato otɔmbɔ, pɛpɛ obangani; eboani boso bo midjɔ mia makokedjame, endolo ena editi bo suka eimei ta mbuku.»

10 Ngɔngɔ djia Yesu abakea boo: «Mbota emɔti eonedjabi mbota ekina, ko ekumu emɔti eonedjabi ekumu ekina; 11 mikumano mipipo ma kpɔtɔ ko, ta bikenge ba ngondo otikoana, makeli manɛnɛ ko na bigo ba moyao; edabi koko na midjɔ ma bɔɔ ko bimbete ba okamoa bidongabi ta busa.»

12 «Endolo boso ba mia misusu, baopeabini, baonɔngedjabini, baokababini tina ɛ osambedjama ta ndako dja miongɔnɔ ma Bayuda ko baomabini ta bɔlɔkɔ; baosambedjabini boso ba bakumu na ba gupunɛlɛ ta tina ɛ kombe ɛ mbai. 13 Edalea odii no ehole ɛ obala sooti diko la mbai. 14 Pɛpɛ osatungeani ta moda moboani no osamba. 15 Tina ɛ boo mbai mɛnɛ naopabini bibaeli ko na owɛi ba boo pɛpɛ omɔti ɔ baloni ba boono oboani ohɔnɔ oema kaoko ohekodja bibaeli ba boono. 16 Okabamabini noko na baboti ba boono, basangwanu, bangwanu, banangwanu, mbota ko na badjebaneli ba boono; bamaabi bike ta bɔlɔkɔ mbunoko ogwa. 17 Olonamabini na bato basusu tina ɛ mbai. 18 Endolo obungedjaetebini noko moswee momɔti ma molo ma boono. 19 Dani na ingbangba: na moda mua oheledjabini miembo ma boono.»

20 Na bea Yesu abali boo: «Ehole enɛbi no Yelusalema ehikami na bibole ba basoda, djebani boo, obeha ba yu boimei mbuti. 21 Na bea, bia ibadabi ta Yuda batiabi dɔngɔ la ngomba; bia ibadabi otei ba Yelusalema basasuabi, ko bia ibadabi ta gue basɔmbetebi ta ibonga. 22 Tina ɛ boo edabi maswi ma esambi, tina ɛ okokedja mia misusu imabalaka Makomi ohuu. 23 Ndjokwa ndani edabi ta maswi mia, tina ɛ bali ba meemi ko tina ɛ bia ibanungeabi bana! Tina ɛ boo saya enɛnɛ edabi ta ngando ko kɛlɛ ɛ Ndjambe enɛmɛbi odii bato bia. 24 Baowamabi na mopata, bakebi ibuli ta mabota masusu ma ngondo ko bapagano baminakakabi Yelusalema na mako mbunoko ta onɔ ba ehole ɛpama na bu.»

25 Bea Yesu abala boo: «Bimbete bienɛmɛbi ta diso la busa, ta songe na ta ndjɔtɔ. Ta kpɔtɔ, mabota makɛsɛlɛbi obuke, masatungeabi tina ɛ kilingo epipo mɛnɛ ɛ ibeke ilinɔi na onɛnɛ ko na dja mula. 26 Bato bagwabi na bɔɔ bakalɛdjana midjɔ mikɔmɔbi ta ngondo esusu, tina ɛ boo ngulu dja busa ikumanabi.

27 Bea baenɛbi Mwana ɔ moto odua diko la itute, na ngulu enɛnɛ ko na ekumu. 28 Ehole ebangabi midjɔ mia okɔmɔ, emani odjoo ko ngangodjani melo ma bono, tina ɛ boo ehole ɛ isiko la boono edabi mbuti.»

29 Ngɔngɔ djia Yesu abala na bu indjɛ dii boo: «Hokeani mole ma figi ko mele mikina misusu: 30 ehole eeni no kasa dja tɛtɛli oimana ta bitape ba mele, odjebeni boo edidi epele ebatami. 31 Oko moda mua, ehole eenɛbi no midjɔ mia mikokedjami, djebani boo okumu ba Ndjambe bobatami. 32 Nabali na nu sooti: bato ba yangola hee bagwɛtebi ibo basusu boso ba okokedjama ba midjɔ mia misusu. 33 Busa na kpɔtɔ idimoabi, endolo bibaeli ba mbai bitadimoa noko osinɛɛ.»

34 Bea Yesu abala boo: «Kebani! Pɛpɛ onodjani ehole ɛ boono esusu ta tɛkɛ, ta ilangwa la mana, ta matungea ma mohelo muu, esaka daa boo iswi la esambi lokundumodjeni, 35 elengɛ nduka; tina ɛ boo esambi edabi tina ɛ bato ba ngondo esusu. 36 Pɛpɛ ohwɛni hio, ongɔɔnɔni ehole esusu; bea odihaleani ngulu ɛ olonga midjɔ misusu mibwani otaneani ko ohɔnini oema boso ba Mwana ɔ moto.»

37 Na busa, Yesu alehaka ta tepelo; endolo, mɔkɔmɔkɔ, akɛkɛ ahwɛ diko la ikoli ilikabee bo ngomba ɛ mele ma Olive. 38 Ko bato basusu baduaka odii yo sɔɔ mɛɛnɛ ta tepelo tina ɛ omohokamedja.