1 Ta ehole ena, bato bakɛɛ atɔndɔ Yesu moda imaowa Pilato Bagalilai ta ehole ɛnɔdjaka bo mbeka odii Ndjambe. 2 Yesu abasɔmbɛdja boo: «Ɔlɛdjakani bo Bagalilai bia baowama bea tina ɛ boo badaka bato ba masumu manɛnɛ onɔ Bagalilai bakina basusu? 3 Titi bea, nabali na nu; endolo ino omiti sɔmbɔtɔnɔni moda ogwaleani ino basusu elengɛ ibo. 4 Kaoko bato bii doomi na mwambe ibagwa ehole ɛbukeana ko ɛkwa ndako eyai ɛ Siloe, olɛdjaini boo badaka babe onɔ bato basusu ba Yelusalɛme? 5 Titi bea, nabali na nu; endolo omiti sɔmbɔtɔnɔni moda, ogwaleani ino basusu oko elengɛ ibo!»

6 Ko Yesu abala na bu indjɛ dii boo: «Moto omɔti aona mole ma figi ta gue ɛ nde ɛ vino. Akɛɛ ahomba mbuma dja figi, endolo aidjitanea. 7 Bea abala na mosali ɔ nde boo: "Hokea: enɔi mbua basato nakadoe ahomba mbuma ta mole muu ma figi ko tedjidihe. Na bea, mokwɛlɛ! Tina ndani modii olumedja mokpɔtɔ oko ngasa?" 8 Endolo mosali ɔ nde amosɔmbɛdja boo: "Kumu, peta mokina koko ta mbua hoo; nalongealea kpɔtɔ mbuti mbuti ko nadumbalea dusa. 9 Na bea, ehole ekina, mobotalea mbuma ta mbua ɔ ngɔngɔ; emiti daa bea, mokekamalea."»

10 Busa bomɔti ba sabata, Yesu adaka aleha ta ndako ɛ miɔngɔɔnɔ ɛ Bayuda. 11 Mwali omɔti ɔ epeko adaka ena, anɛngɛdja mbua doomi na mwambe, mwembo mobe momɔti mamoyeyodja mokɔngɔ moimbi ko aihɔnɔkɔ noko osinɛɛ osaninodja. 12 Ehole ɛenɛ Yesu mwali ona, amobea ko abala na nde boo: «Mwali, oheli na epeko ɛ wɛ.» 13 Amobakea mabɔ ko, oko ena ambuku, asaninodja ko abanga okumedja Ndjambe. 14 Endolo kumu ɔ ndako ɛ miɔngɔɔnɔ ɛ Bayuda, aoka obe ɛlɔkɛ boo Yesu aheledja mwali ona ta busa ba sabata. Na bea abala na emumu ɛ bato boo: «Lodii na maswi masamano maboani na osala; duani ko saheledjani ta maswi mia endolo titi ta busa ba sabata!» 15 Yesu amosɔmbɛdja boo: «Ino bato ba owɛi bobe! Ta busa ba sabata, moto na moto akatingoe ngɔmbɛ ɔ nde ta esika ɛ nde ɛ oyaka kaoko punda* ɔ nde okɛ amomusa madiba, editi bea? 16 Ko mwali hoo, ɔ mbota ɛ Abalayama, ona ɔnanga Satana mbua doomi na mwambe, eboanakiti omolena mbɔti ta busa ba sabata?» 17 Esɔmbɛdjɛli ɛ Yesu ɛpa sɔni enɛnɛ odii baloni ba nde; endolo emumu ɛ bato bike basepa tina ɛ misala minɛnɛ mipele makɔkɔ yo.

18 Ngɔngɔ djia, Yesu abala boo: «Ekoani na Okumu ba Ndjambe nde, ko nabokokanedjalea na eka nda? 19 Bodii elengɛ mbuma ekɛkɛ ɛ sinapi ena ɛtomba moto omɔti ko ayooni ta gue ɛ nde: etɔi, eimei mole ko mbulu bayoi moopu ta bitape ba mu.»

20 Yesu abala koko boo: «Nakokanedjae Okumu ba Ndjambe na ye? 21 Bokoani na nɛngɛ mapa ɛtomba mwali omɔti ko ayenyɔmi esika emɔti na falini enɛnɛ, mbunoko ohalodja pɔtɔpɔtɔ esusu.»

22 Ta ikɛ la Yesu ta Yelusalema, alehaka ta mabonga na ngando. 23 Moto omɔti amohɔdja boo: «Kumu, editi oko bato bakɛkɛ bahelabi?» Yesu abasɔmbɛdja boo: 24 «Kɔɔni na ngulu esusu tina ɛ oingea ta edipako ekɛkɛ; tina ɛ boo, nabali na nu ohuu boo, bike bamekabi boo baingee ko bahɔnetebi.»

25 «Ehole eemalea moswa ndako ko akadipalea edipako, otaneamaleani sokolu, obomaleani ekukɛ ko na obala boo: "Kumu, lodipoa!" Aosɔmbɛdjaleani boo: "Nataodjebakani!" 26 Bea, obalaleani na nde boo: "Layaka ko lamwaka na wɛ, ɔleha ta ndjia dja mabonga ma boso." 27 Abalabi naikina na bu bo: "Nataodjebakani! Sasuani na mbai, ino bato ba mikɔ mibe!" 28 Oho edii esika eyeabi no bie ko ekpɛkɛnɛbi no mino, ta ehole enɛbi no Abalayama, Isaka, Yakobo ko batɛli basusu ta Okumu ba Ndjambe ko ino odumbamabini sokolu! 29 Bato badongabi dɔngɔ likaimane diso la busa na likahwɛ lo, ta nɔlɔ ko sudi ko badabi ta mesa ɛ Okumu ba Ndjambe. 30 Ko na bea, bakina ibadi hadɛdi bato ba ngɔngɔ baimeabi bato ba boso ko bakina ibadi hadɛdi bato ba boso baimeabi bato ba ngɔngɔ.»

31 Ta ehole ena, Bafalusai bakina babatama na Yesu ko babala na nde boo: «Donga haa, kɛɛ dɔngɔ ikina, tina ɛ boo Elode apalaka aowoe.» 32 Yesu abasɔmbɛdja boo: «Kɛɛni adjebedjɛni ebanga ona boo: "Nabenganaka miembo mibe ko nakokedjaka mosala ma oheledja bato ba bipeko busabu na puma, ko busa ba basato nasukedjalea elomu ɛ mbai." 33 Endolo eboani boo nakokedjae mɔndɔ ma mbai busabu, puma na puma sɛnɛ, tina ɛ eboani boo motɛli aowame oko ta Yelusalema.

34 Yelusalema, Yelusalema, wɛ ona okaowoe batɛli ko ona okaowoe na ndeke balomami ba Ndjambe! Mbala djeka napalaka boo naputoanedjae bana bawɛ mbuti na mbai, moda mokaputoanedjae kɔkɔ bana ba nde nase dja mapapulapu ma nde, endolo oipala! 35 Na bea, ndako ɛ bono esundolamalea. Nabali na nu: owetelea enɛnini koko mbunoko ta ehole ebalalea no boo: "Yɛɛ boo Ndjambe adjongoe ona odoi ta kombe ɛ Kumu!"»