1 Ta ehole ena, bato basangana nkoto na nkoto, mbuti na osaminakaka na mako. Yesu abala boso mɛɛnɛ na batingami ba nde boo: «Angatanani na nɛngɛ mapa ma Bafalusai, edii wɛte owɛi ba bobo bobe. 2 Misusu imikundi mienɛmɛbi ohuu, ko misusu ma mbombi midjebamabi. 3 Na tina hee misusu mibalabi no ta modidi miokamabi ta ihuu la busa, ko imihɔlɔkɔnɔbi no ta matoi bato bakina ta ekenge ɛ ndako edipamake mibalamabi na moholi mopipo diko la bitondo.»

4 Nabali na nu, odii no bapalani ba mbai: pɛpɛ obangani ibia ibadii owa mokuku endolo bia, ngɔngɔ, batahɔnɔ okɔ imonɔi. 5 Napalaka naoinedjaeni ona oboani no obanga: bangani Ndjambe ona ɔ boo, ngɔngɔ dja ogwa, adii na kpati tina ɛ odumbani ta ipelu. Sooti, nabali na nu, edii yo ona oboani no obanga! 6 Te batɛkɛ basoketele batano na baa falanga bakɛkɛ? Endolo, Ndjambe tabosae noko omɔti ɔ bobo. 7 Ko noko na swee dja molo ma wɛ idii ilangamake. Bea pɛpɛ odani na bɔɔ: ino onɔini basoketele bike na motwuia!

8 «Nabali na nu boo: ona obalabi ohuu boso ba bato boo: adii ɔ mbai, Mwana ɔ moto abalabi koko ohuu boo: adii ɔ mbai boso ba babwɛndi ba Ndjambe; 9 endolo ona oinganabini boso ba bato boo: tadjebeni, Mwana ɔ moto adimabi koko boso ba babwɛndi ba Ndjambe boo: tamodjebe. 10 Ona obalabi ebaeli ebe tina ɛ Mwana ɔ moto, ayɛɛmɛbi; endolo ona osingabi Mwembo Mosɛnoke, ayɛɛmetebi.»

11 «Bakakɛɛbi na nu tina ɛ osambedjani ta ndako dja miɔngɔɔnɔ ma Bayuda, kaoko boso ba bakumu, pɛpɛ okɛsɛlɛni na moda mosambalea no kaoko modjɔ mobalalea no, 12 tina ɛ boo Mwembo Mosɛnɔke aodjebedjabini ta ehole ena eka eboani no obala.»

13 Moto omɔti ta emumu ɛ bato abala na Yesu boo: «Molehi, bala na mwaninga akaane na mbai ikwa la boso.» 14 Yesu amosɔmbɛdja boo: «Mopalani ɔ mbai, oimedjaini judji ɔ osambedja midjɔ ma boono kaoko okabana leka la boono nda?» 15 Ngɔngɔ djia abali na ibo basusu boo: «Tomangatanani! Sabaneani na epaeli ɛ odiheli, tina ɛ bo mohelo ma moto motingiti na leka ilodii na nde, noko akada modiheli monɛnɛ.»

16 Bea abala na bu indjɛ imɔti bo: «Modiheli omɔti adaka na kpɔtɔ idjamoboteaka mbuma ipele inɛnɛ. 17 Alɛdjanaka ko asahɔdjaka boo: "Eboani mbai okɔ ye? Naditi na esika ekoki ɛ obolea mbuma dja mbai isusu." 18 Bea abakea boo: "Hokea moda mokɔlea mbai: nabukalea bibombelo ba mbai ibiyou bisusu, napikalea ibinɔi na onɛnɛ, nabolealea mbuma dja mbai djisusu dja elengɛ lɔsɔ na leka la mbai lokina. 19 Ngɔngɔ djia, nasabalealea mbai mɛɛnɛ boo: Molimo ma mbai, odii na leka lonɛnɛ ta mbombi tina ɛ mbua bike; hema, yaka, mwa ko sepa na mohelo." 20 Endolo Ndjambe abala na nde boo: "Endanga! Oko ta bulu bu mɛɛnɛ ogwalea. Ko na bea, leka lua losusu lobolei wɛ, lodalea la nda?"» 21 Yesu abakea boo: «Na bea edii moda momɔti na moto ona ɔboleaka madiheli tina ɛ nde mɛɛnɛ, endolo aditi modiheli ta miso ma Ndjambe.»

22 Ngɔngɔ djia Yesu abala na batingami ba nde boo: «Hokeani tina ebali mbai na nu boo: pɛpɛ osatungeani tina ɛ mohelo ma boono, diko la eka eyakaleano ko tina ɛ mokuku ma boono, diko la eka elwaleano. 23 Tina ɛ boo mohelo monɔi mia ko mokuku monɔi bisendja. 24 Hokeani baanganga: tebaone ko tebabuke mbuma, baditi na esika ɛ obomba leka la oyaka, endolo Ndjambe akabayakedjae! Ino onɔini mbulu na motwuia monɛnɛ mɛɛnɛ! 25 Ona ndani ta ndanda ɛ boono ohɔni ta tina ɛ osatungea ba nde okandodja maswi ma mohelo ma nde? 26 Ekada boo otahɔnɔni noko osinɛɛ mua imodii mokɛkɛ, tina ndani odini osatungea diko la mia imidikai? 27 Hokeani moda mokatɔe fulɛlɛ dja gue: te djisale ko te djiyoe bisendja. Ekahia, nabali na nu, noko na Sɔlɔmɔ, ta ekumu ɛ nde esusu, aidiha bisendja ba omwenga onɔ fulɛlɛ emɔti ɛ gue. 28 Ekada boo Ndjambe alwɛdjai mondjani modi ta gue busabu ko puma modumbamalea ta mosa: na onɔ aolwɛdjɛteleani, ino bato ba edhimeli ekɛkɛ! 29 Na bea pɛpɛ osatungeani ehole esusu ohomba eka eyakalea no ko emwalea no. 30 Edii bato ba pɛpɛ odjeba Ndjambe badii ohomba na pɛpɛ iheme mia misusu. Endolo ino, odini na Sɛngɛ ɛ moto ona ɔdjebaka imatakaka no. 31 Hombani boso okumu ba Ndjambe ko Ndjambe aopaleani koko mia imidikai.

32 Ino ibadi elengɛ bwela ba ingbɛndɛ bokɛkɛ, pɛpɛ obangani! Tina ɛ boo Sangwanu asepa boo aopɛni Okumu. 33 Tɛkɛni leka la boono ko pani falanga odii bakwali. Tombani tɔmbi idja pɛpɛ obeha, boleani madiheli ta busa, oho ta esika edabi mo pɛpɛ odimoa: esika edabi baibi pɛpɛ obatama na sɛɛ obeedja. 34 Tina ɛ bo esika edi odiheli bawe, edii oko ena esika edalea molema ma wɛ.

35 Saboanedjani tina ɛ osala, mosenge monangamake ta bongo ko miinda ma boono miyodjamake. 36 Daani elengɛ basali ibadii ta yambo ɛ moswa bu ta ehole ehulalea yo ta tɛkɛ ɛ moki, bɛngɛ bamodipoe edipako ena oimealea yo ko obomalea yo. 37 Sepi ɛ basali ibatanealea moswa bu, ta oimea ba nde, mɔsu! Nabali na nu ohuu, edii sooti: alwalea bisendja ba mosala, abadedjalea ta mesa ko adualea abakaanea mia. 38 Sepi odii bo ekada boo aimei ta ndanda ɛ bulu kaoko ta eyɛ ɛ busa, abatanei mɔsu!

39 Sipoani opele modjɔ muu: ekada boo moswa ndako akadjeba ehole eboani moibi odoa, ata mopa enɔli oingea ta ndako ɛ nde. 40 Ino koko, sɛndjɛlɛni, tina ɛ boo Mwana ɔ moto adualea ta ehole edii no pɛpɛ olɛdja.»

41 Bea Piɛlɛ ahɔdja boo: «Kumu, ebali wɛ indjɛ dii oko tina ɛ boso kaoko tina ɛ bato basusu?» 42 Kumu amosɔmbɛdja boo: «Ona mosali obɔngi obakea molema ko na owɛi nda? Edii ona ɔkapɛ moswa nde mandi ma ɔbanea ndako ko opa odii basali bakina mabondo ma bobo ma mia na ehole eboani. 43 Sepi odii mosali ona ekada ta ihule la moswa nde amotanei oko ta mosala mua. 44 Nabali na nu ohuu, edii sooti: Moswa nde amopalea mandi ma obanea leka la nde losusu. 45 Endolo mosali akasabalea boo: "Moswa mbai atahula hadɛdi", ekada boo abangi oboma basali bakina baami ko na bali, oyaka, omwa ko olangoa, 46 moswa mosali hoo ahulalea iswi idii mosali pɛpɛ omolɛndɛ ko ta ehole ɛ nde ɛ pɛpɛ odjeba; abenganalea mosali ko amoisalea ta engbanga ɛ bato ibataki osuma Ndjambe. 47 Mosali odjebi eka ekapale moswa nde, endolo aditi mbuti tina ɛ oyekɔ, abomamalea obuke. 48 Endolo, mosali ona odii pɛpɛ odjeba olulea ba moswa nde ko akɔi midjɔ mikoki na etumbu, atabomama obuke. Odii ona opi bo obuke, ahɔdjamalea obuke; odii ona opami obuke onɔ, ahɔdjamalea koko obuke onɔ.

49 Nadoi aisa mosa ta ngondo ko posa ɛ mbai edii boo mayodjame! 50 Naboani onɔngɔmɔ ko na mbambami mbunoko okokedjama ba muu! 51 Olɛdjaini boo nadoi apa ogoo ta ngondo? Pɛpɛ, nabali na nu, endolo obɔtɔnɔ! 52 Donga hadɛdi, ibota la bato batano libɔtɔlea, basato baokanalea ko babae baokanetelea na basato 53 Sɛngɛmoto aokanetelea na mwana ɔ nde momi ko mwa moomi aokanetelea na sango, nɛngɛ moto abokanetelea na mwana ɔ nde mwali ko mwana mwali aokanetelea na nango, okio mwali aokanetelea na mwali ɔ mwana ɔ nde, ko mwali ɔ mwana aokanetelea na okio ba nde mwali.»

54 Yesu abala koko na emumu ɛ bato boo: «Ehole eeni no itute idongi ta dɔngɔ likahwɛ diso la busa, obalini ta mbuku bo: "Mbua akwalea", ko edii okɔɔmɔ oko bea. 55 Ko ehole eoki no epoipoi edongi ta sudi, odi obala bo: "Edjungu edalea", edii oda oko bea. 56 Bato ba owɛi bobe! Ɔdjebakani otikoanedja bimbete ba kpɔtɔ na ba busa; bea, tina ndani oditi odjebani otikoanedja midjo imidii onɔ ehole hee edii so hadɛdi?»

57 «Tina ndani oditini odjeba ino mɛɛnɛ moda mopele ma okɔ? 58 Okada na modjɔ ma osamba na moto ko okɛini engbanga ta esika ɛ esambi, kɔɔ na ngulu ɔɔkaneni nɔnɔ nde ena ɔdalake no na ndjia. Olonalea boo moto odii na wɛ na ikambo ata oimedja boso ba djudji, boo djudji asaka opa ta mabɔ ma pɔlisi ko pɔlisi asaka omaa ta bɔlɔkɔ. 59 Nabali na wɛ boo, oimwanetelea ena mbunoko okaputa nyongo esusu.»