1 Yesu abala na batingami ba nde boo: «Moto omɔti modiheli adaka na mobanei ɔ leka la nde ko bato bike bamotɔndɔɔ boo apundjaka leka la nde. 2 Moswa leka amobea ko abala na nde boo: "Mɔdjɔ maokaka mbai diko la wɛ nda? Inedjani moda masala we mosala ma wɛ, tina ɛ boo owetelea daa koko mobanei ɔ leka la mbai." 3 Mobanei ɔ leka la nde asabelea yo mɛɛnɛ boo: "Moswa mbai, adoi adongedjani ta mosala. Ɔkɔkɔ mbai enao? Naditi na ngulu enɛnɛ tina ɛ olia gue ko nadalea na sɔni oimea moto ɔ esɛngɛ. 4 Nadjebi modjɔ mokolea mbai! Ko ta ehole ebungedjalea mbai esika ɛ mbai ɛ mosala, bato baosɔleani ta ndako dja bobo!" 5 Na bea abea bato basusu ibadaka na nyongo dja moswa nde omɔti na omɔti. Abala na ɔ boso boo: "Odii na nyongo ɛ moswa mbai motwuia nda?" – 6 Amosɔmbɛdja boo: "Mimbonda ma minɛ mokama". Mobanei ɔ leka abala na nde boo: "Hokea motwuia ma nyongo ɛ wɛ; daa haa pɛpɛlɛ; ko koma tuku itano." 7 Oko bea abali na okina boo: "Ko wɛ odii na nyongo motwuia nda?" Amosɔmbɛdja boo: "Ngɔtɔ dja mbuma dja elengɛɛ lɔso mokama". Mobanei ɔ leka abali na nde boo: "Hokea nyongo ɛ wɛ; koma ngɔtɔ tuku mwambe." 8 Na bea, moswa leka asakoa mobanei ɔ leka ɔ owɛi bobe tina ɛ kaso ɛ nde ɛ obɔngedja midjɔ. Tina hee, bato ba ngondo hee badii na kaso ta ndanda ɛ bobo onɔdja bato ibadi bana ba ohuu.»

9 Yesu abakea boo: mbai nabali na nu, kɔɔni imbati na madiheli ma okosa ma ngondo hee, bɛngɛ boo ta ehole edimoabi mo tina ɛ boono baosɛni ta madie ma kɔbili. 10 Ona odii na isuma ta midjɔ mikɛkɛ, adii koko na isuma ta midjɔ minɛnɛ. Ona otaki isuma ta midjɔ mikɛkɛ ataki koko isuma ta midjɔ minɛnɛ. 11 Ekadaa bea boo oditini na isuma diko la odiheli ba okosa ba ngondo hee, ona opabini madiheli ma sooti nda? 12 Ko ekadaa boo otakini isuma ta obanea leka la bato bakina, ona oboani opani ila bono mɛɛnɛ nda? 13 «Pɛpɛ mosali omɔti okoki osalea ba kumu babae: kaoko alonalea ɔ boso apalalea okina; kaoko akatanalea na ɔ boso kaoko aɛnɛlea okina ngasa. Otahɔnɔni osalea Ndjambe na ikondja koko.»

14 Bafalusai, ibapalaka makondja, baokaka midjɔ mia misusu ko bataaka Yesu. 15 Yesu abala na bu boo: «Ino odini ibia basaenɛmɛdjaka bato ba mikɔ mipele ta miso ma bato, endolo Ndjambe adjebaka milema ma boono. Tina ɛ boo mua mokaenɛ bato modjɔ ma kito Ndjambe adii omoenɛ ngasa.

16 Mua imakomama ta mobeko ma Mose na buku dja Batɛli manɛngɛdja mbunoko Yoani Mobatisi. Donga ehole ena Mwako Mopele ma Okumu ba Ndjambe matɔndɔmɔ ko moto na moto akɔkɔ na ngulu bo aingee. 17 Busa na kpɔtɔ lohɔni odimoa na pɛpɛ embamba, endolo titi ikomi inɔi na okɛkɛ la Mobeko.

18 Ekadaa boo moto odongedjai mwali ɔ nde ko aosi okina akwi ta bɔɔli, ko ona oosi mwali odongedjami akwi koko ta bɔɔli.

19 Ɛdaka na moto omɔti modiheli ona olwaka bisendja ba yumu ko na motwuia monɛnɛ ko ona, engi busa, ayaaka opelɛ. 20 Edaka koko na moto okina ɔbiaka bo Ladjalo, mokwali, adaka asambi engi busa boso ba edipako ɛ ndako ɛ modiheli. Mokuku ma nde madaka molumake na pola. 21 Adaka na posa ɛ osagoledja na mbumbu dja mia idjakwaka ta nase dja mesa ɛ modiheli ehole ɛyaka yo. Noko na mva baduaka aombuta pola dja nde. 22 Mokwali agwa ko babwɛndi bakɛɛ na nde mbuti na Abalayama. Modiheli agwa koko ko bamopusea. 23 Anɔngɔmɔ obuke mɛɛnɛ ta ngondo ɛ bato bago; ɔngangodja yo miso, aɛnɛ ohali Abalayama ko Ladjalo mbuti na nde. 24 Na bea agama boo: "Tata Abalayama, okeani ndjokwa! Loma Ladjalo atupee sɔngɔ ɛ mosapi ma nde ta madiba tina ɛ otitimedjani elemi, tina ɛ boo naokaka saya enɛnɛ ɛ mosa muu." 25 Abalayama amosɔmbɛdja boo: "Mwana ɔ mbai, lɛdjana mapele madiha wɛ ta ehole ɛdaka wɛ ta mohelo ma wɛ, endolo Ladjalo aenɛ saya enɛnɛ. Hadɛdi, Ladjalo ahemi, endolo wɛ odii ta saya. 26 Na onɔ, mombɔndɔ ma mbɛngɛ modii ta ndanda ɛ booso na nu; bea, bato ibapalaka openda donga haa odii so mbunoko oho odii no batahɔnɔ ko moto odii ono odii so atahɔnɔ noko osinɛ openda donga ono mbunoko ta esika edii wɛ." 27 Modiheli abala boo: "Naongɔɔni, tata, loma Ladjalo ta ndako ɛ tata, 28 oho odii mbai na banainga baami batano. Akɛɛ abakebedja, bɛngɛ boo ibo koko basaka dua ta esika hee ɛ monɔngɔ." 29 Abalayama asɔmbɛdja boo: "Bana ba ngwao baami badii na Mose na Batɛli tina ɛ obakebedja: yɛɛ boo babaoke!" 30 Modiheli abala boo: "Pɛpɛ, eboaniti bea, tata Abalayama. Endolo ekadaa boo moto adongi odii ibagwa ko akɛi abatanea, bea basɔmbɔnɔtɔlea moda." 31 Endolo Abalayama amosɔmbɛdja boo: "Bamiti oka Mose na Batɛli, batadimea noko na mogo akapusoa."»