35 Djake na Yoane, bana ba Djebede, baduaka adi Yesu ko bamosɛngɛkɛ. «Molehi, lodi na posa boo olokokedje esɛngɛ iye.» 36 Yesu abalaka na bu: «Apalaka no nakɔe tina e bino nde?» 37 Bamosɔmbedjaka: «Ehole edabi wɛ ta ekumu e wɛ, dima boo lodae mbuti na wɛ, okina ta ebɔ e bami, okina ta ebɔ e bali.»
41 Ehole eokaka batingami bakina domi meako mimina, baokeaka Djake na Yoane bobe. 42 Na bea Yesu ababeaka bo basusu ko abalaka na bu: wadjebakani boo, ibia baenɛkɛ so elenge bakumu ba bikomi bakakondje ngondo iya; pongono bakondji ba bato bainedjaka bato ba bobo saya. 43 Endolo ta tine e bino, midae pɛ bokɔmɔ bea. Na tina emina ekada omɔti o bino akapala adae moto o gala, abwani adae mosali o bakina, 44 ko yona apalaka adae moto o boso, atungi adae mosali o bato basusu. 45 Tengasa Mwana o Moto aiduaka tine bamosale, endolo aduaka tine bosalea bato ko bopa mohelo mo nde elenge ikabo ta bosikoa bato basusu.
Yesu aheledji Balatimayo
(Endja pongono ta Mat 20, 29-34; Luk 18, 35-43)