1 Edikaka masu mabae boso bo tɛkɛ e pasika ko miɛmbɛ mapɛ ipetu bokɔme*. Bakumu ba banganga ba Ndjakomba ko na balehi ba mobeko bahombaka enɔeli e bopea Yesu ta mbombi bɛngi bamowoe. 2 Tengasa babalaka: «Etakɔmɔ ta ehole ye e tɛkɛ, esakapa wusuwusu adi bato.»

3 Ehole yena edaka Yesu ta Betania, adi Simo, moto o mabha; mwali omɔti akweaka ta ehole edaka bo bayaka, apeaka molangi mokɔmɔkɔ na ibanga ikabe bo abatele*. Molangi momina molumaka na malasi maso e itindi, mokɔmɔkɔ na mele mikabe bo nale baiputoanedja na eka ekina. Malasi ma mina madaka ma motuya monɛnɛ. Abukaka molangi ko asopeaka Yesu malasi ma mina ta molo mo nde. 4 Bato ibadaka ena baisepaka na modjɔ momina ko baimeaka bonunguna: «Abedji malasi tina nda? 5 Eboanaki botɛkisa malasi mamina na motuya moboani na boputa bato mikama misato, ko bopa palanga* imina adi batakeli!» 6 Endolo Yesu abalaka na bu: «Mokinani bogo. Tina ndani wanungunakani tina e nde? Modjɔ mosakɔ yo modi mopele tine mbi. 7 Tengasa odini na batakeli adi no bihole bisusu*, ko obwanini bobakɔmedjani ta bihole bisusu bidi no bopala; endolo oditini na mbi bihole bisusu. 8 Akɔi eka eboanaki na nde bokɔ; asopeini malasi tine bobɔngedja mokuku mo mbi boso bo bogwa*. 9 Okobea, nabalaka na nu, bisika bisusu bitɔndɔkɔbi bo Bwɛndi Bopele ta ngondo esusu, babalakabi pongono tine modjɔ mokɔi mwali yo, ko bamolɛdjɛkɛbi.»

10 Na bea Yudasi Isikaliota, omɔti o bapɔsɔlu domi na babae, akɛkɛ adi bakondji ba banganga ba Ndjakomba, tine bokaba Yesu. 11 Ehole ehokamedjaka bo Yudasi, basepaka ko bamodikanaka bamopɛ palanga. Ko Yudasi ahombaka enɔli epele tine bokaba Yesu.

12 Ta isu i boso i tɛkɛ e miɛmbɛ mapɛ ipetu, busa bowaka bo bana ba bhata tine tɛkɛ e pasika, batingami ba Yesu bamohɔdjɔkɔ: «Apalaka wɛ lokabɔngedja mia ma pasika djɔɔ?» 13 Na bea Yesu alomaka batingami ba nde babae boso ko abalaka na bu: «Kɛni ta ibonga enɛnɛ, wasakanakeni na momi omɔti alwali mbola e madiba. Mokimanani, 14 ko polo akweake yo, balani na moswa ndako: "Molehi abali: adi ekenge e ndako ebwani mbi boyaka mia ma tɛkɛ e pasika engbanga na batingami ba mbi djɔɔ?" 15 Yo ainedjakeni ta egbili, ekenge e ndako enɛnɛ ebɔngedjabo na leka losusu loboani oho diko. Edi oho wabɔngedjakeni no mia ma pasika.» 16 Batingami bakɛkɛ ko baimeaka ta ibonga enɛnɛ; bataneaka misusu oko moda mobalaka Yesu na bu, ko babɔngedja mia ma tɛkɛ e pasika.

17 Ehole eimeaka mɔmɔkɔ, Yesu aimeaka ta polo emina na bapɔsɔlu ba nde domi na babae. 18 Ehole edaka bo ta mesa bayaka, Yesu abalaka: Okobea, «Nabali na nu soti: omɔti o bino, ayaka na mbi, akabakeni*!» 19 Batingami baimeaka na ndjokwa, ko bamohɔdjɔkɔ omɔti ngɔngɔ i okina: «Edi mbi?» 20 Yesu abasɔmbedjaka: «Edi omɔti ta ndanda e bino, omɔti o bino o ba domi na babae, yona wasakanake na mbi ebɔ ta saani*. 21 Soti Mwana o Moto akɛke oko moda mokomama tina e nde*. Endolo ndjokwa adi moto yona na ndjea e nde Mwana o Moto akabamake! Ebɔngɔkɔ boo moto omina adae pɛ bobotama!»

22 Ehole edaka bo bayaka, Yesu atombaka mwɛmbɛ ko ngɔngɔ i bosakoa Ndjakomba, abukaka ko apaka adi batingami. Abalaka na bu: «Tombani, iye edi mokuku mo mbi.» 23 Atombaka naikina kɔbɔ e vino ko, ngɔngɔ i bosakoa Ndjakomba, abapaka, ko bamwaka bo basusu. 24 Yesu abalaka na bu: «Iye edi makia ma mbi*, makia mabwela imasopeami tina e emumu e bato. 25 Okobea, nabalaka na nu: namwɛtebi vino ye naikina, mbunoko busa bomwakabi mbi vino eyanie ta bokumu bo Ndjakomba.»

26 Ngɔngɔ iboemba ndjembo*, bakɛkɛ ta ngomba e Olipa.

27 Yesu abalaka na bu: «Ino basusu watiakenini, tengasa ekomama ta makomi: "Nabomake mobanei, ko bwela bo bhata inanganabi pamba isusu*". 28 Endolo ngɔngɔ ibopusoa bo mbi, nakɛbi boso ambani ta Galilea.» 29 Piɛlɛ abalaka na nde: «Nongo bo basusu bakotia, mbi natotiake.» 30 Na bea Yesu amosɔmbedjaka: «Okobea, nabali na wɛ, busa bu, ta boso bo kɔkɔ akɔkɔle mbala ibae, wɛ winganeakeni mbala isato.» 31 Endolo Piɛlɛ adaka oko abala: «Ekada bogwa na wɛ, lagwake; mbi nitoinganeake!» Ko bo basusu babalaka oko bea.

32 Baimeaka ta polo e kombe Getesemane*, Yesu abalaka na batingami ba nde: «Dani iya, yana akɛi mbi aongɔnɔ.» 33 Na bea abeaka Piɛlɛ, Djake, ko Yoane. Aimeaka booka ndjokwa ko asatungeaka mɛnɛ ta molema. 34 Ko abalaka na bu: «Molema mo mbi molumi na ndjokwa mbuti na bogwa; daani iya ko pɛ bohwɛni!» 35 Asasuaka na bu moobohali, akwaka magbundɔ ta kpɔtɔ ko aongɔnɔkɔ Ndjakomba, ekada bopele, boo ehole ye e saya ekɛe bohali na nde. 36 Abalaka: «Aba, Sange e mbi*, Eboani bokɔ midjɔ misusu; dongedja bohali na mbi kɔbɔ ye e saya. Te bopala bo mbi, endolo bopala bo wɛ.» 37 Ehole ehulaka Yesu Adibo, abataneaka bahwɛli. Abalaka na Piɛlɛ: «Simo, ohwɛli? Odihiti ngulu eboda mosu nongo moo ehole omɔti? 38 Dani mosu ko ongɔnɔni, osakakwani ta bomekama. Molema mo moto modi na posa epipo e bokɔ bopele, endolo mokuku modi na bwɛmbu.» 39 Asasuaka naikina aongɔnɔkɔ ko abalaka oko kɔpi imina. 40 Ngɔngɔ ahulaka ko abataneaka naikina bahwɛli, tengasa miso mahiyɔ mabanɔkɔ. 41 Asɔmbɔkɔ mbala e basato ko abalaka na bu: «Ohwɛlini oko ko osahemedjini? Mosi! Ehole eimei! Mwana o Moto akabami ta mɔmɔ ma bato babe! 42 Angɔni, lokɛni! Endjani moto okabini adi mbuti!»

43 Na mbala emɔti, ehole yena ebalaka Yesu, Yudasi omɔti o bapɔsɔlu domi na babae, aduaka engbanga na emumu e basoda na mipamba ko na mihukuku. Balomamaka na bakumu ba banganga ba Ndjakomba, na balehi ba mobeko ko na basuku ba ibonga. 44 Yudasi, yona okabaka Yesu, abapaka embete: «Momi yona wabhimbake mbi, edi yo. Mopeani ko duani na nde bopele.» 45 Na mbala emɔti baimeaka, Yudasi asabateaka mbuti na Yesu ko abalaka na nde: «Labi!» Ko amobhimbaka. 46 Na bea bakwaka diko i nde ko bamopeaka. 47 Omɔti o batingami odaka ena aiwaka mopamba, alenaka mosali o nganga monɛnɛ o Ndjakomba itoi*. 48 Yesu abalaka na bu: «Odoini apeanini, na mipamba na mihukuku elenge moweli o bato? 49 Masu masusu nadaka na nu ta tepelo, ko nalehaka oiduakani apeanini. Endolo kina boo ekɔme bea bɛngi makomi makokedjame.» 50 Na bea batingami basusu bamosundolaka ko batiaka*. 51 Mwenga momi omɔti akimanaka Yesu, alwoaka esendja e mbendja. Bamopeaka, 52 endolo abasundolaka mbendja emina, atiaka mbundu.

53 Bakɛkɛ na Yesu adi nganga monɛnɛ o Ndjakomba, oho adaka bakumu basusu ba banganga ba Ndjakomba, basuku ko balehi ba mobeko baputoanaka. 54 Piɛlɛ amokimanaka bohali ko akweaka ta bopango bo ndako e nganga monɛnɛ o Ndjakomba. Oho adaka engbanga na babanei ko baokaka mosa. 55 Bakondji ba banganga ba Ndjakomba ko na ibolea inɛnɛ i basuku ba bayuda, bahombaka tati ebe tine Yesu bɛngi bamolome ta bogwa, endolo baimodiaka na yu. 56 Bato banɛnɛ babalaka boloa tina e nde, endolo tati i bobo ibwanaka idaka ibe. 57 Bato bakina bangɔkɔ tine bobala meako mi boloa tina e nde: 58 «Lomokaka bobala: "nabukake tepelo ye etonga bato, ko ngɔngɔ imasu masato, natongake ekina edi pɛ botongama na mɔmɔ ma bato*."» 59 Nongo ta mibalo mia tati i bobo ibwanaka idaka ibe. 60 Na bea nganga monɛnɛ o Ndjakomba asangɔdjɔkɔ ta ndanda emumu e bato ko ahɔdjɔkɔ Yesu: «Otasɔmbedjaka nongo kɔpi ta pundi idjabalaka bato na wɛ?» 61 Endolo Yesu adikaka bogo, aisɔmbedjaka nongo kɔpi. Nganga monɛnɛ o Ndjakomba amohɔdjɔkɔ naikina: «Wɛ odi Kilito, Mwana o Ndjakomba yona modjongoamake?» 62 Yesu asɔmbedjaka: «Soti, edi mbi. Ko oenɛbini Mwana o Moto adi ta ebɔ e bami e Ndjakomba o sueya odi ta diko i losusu; omoenɛbini bodua ta matute ma busa*.» 63 Na bea mokondji o banganga ba Ndjakomba alakaka bisendja bi nde ko abalaka: «Loditi naikina na posa e batemo! 64 Okini yo mɛnɛ moda masingaka yo Ndjakomba. Alɛdjɛkɛno naikina nde?» Basusu badimedjaka boo adi mobe ko bamoleneaka etumbo e bogwa*. 65 Bakina babangaka bomotuea masɔi ta boso, bamonangaka esendja ta boso, bamoindaka ndumɔ ko bamohɔdjɔkɔ: «Elɛ bonganga!» Ko babanei bamotombaka badaka bomoboma*.

66 Ehole edaka Piɛlɛ adi na mobondo ta ikanga i ndako, mosali mwali omɔti o nganga monɛnɛ o Ndjakomba aimeaka. 67 Aenɛkɛ Piɛlɛ adaka booka mosa, amokokoledjaka ko abalaka: «Wɛ pongono, odaki engbanga na Yesu, moto o Nasaleta.» 68 Endolo amoinganeaka ko abalaka: «Natamodjebaka, natasipoaka eka apalaka wɛ bobala.» Ngɔngimina aimaka bɛngi akɛ ta ikanga i ndako, [oko ta ehole emina, kɔkɔ akɔkɔlɔkɔ*.] 69 Mosali mwali amoenɛkɛ naikina ko asɔmbɔkɔ bobala na bia ibadaka ena: «Momi yo adi omɔti o bobo!» 70 Ko Piɛlɛ amoinganeaka naikina. Ngɔngɔ i moo ehole, ibadaka ena babalaka pongono na Piɛlɛ: «Soti mɛnɛ, odi omɔti o bobo, tengasa, wɛ odi mogalilea.» 71 Endolo Piɛlɛ agamaka: «Kina boo Ndjakomba apɛni etumbo ekada boo nakosaka! Nakataka seleka, natadjebaka moto yona wabalaka no!» 72 Oko ta ehole emina, kɔkɔ akɔkɔlɔkɔ mbala e babae, ko Piɛlɛ asɔmbedjaka malɛi ta kɔpi ebalaka Yesu na nde: «Boso bo kɔkɔ akɔkɔle mbala ibae, wainganeakeni mbala isato.» Na bea, abangaka boyea*.