1 Bapalusai na balehi ba mobeko bahulaka ta Yelusalɛmɛ, baputoanaka mbuti na Yesu. 2 Baenɛkɛ batingami bakina bayaka mia na mɔmɔ pita, etingodji boo pɛ bososa mɔmɔ. 3 Enakobea, bapalusai na basuku ba Bayuda basusu baboaniti boyaka oko basose mɔmɔ, bokimana bokɔkɔ bo bobo*. 4 Ko bakahula ta polo i bhuda, bayake boso pɛ bosasɛnodja. Bakasume bonɔ mibeko mikina mi bokɔkɔ, elenge bososa kɔbɔ, poke, masasu ma bibende [ko kiti i matala]*. 5 Basuku ba bapalusai na balehi ba mobeko bahɔdjɔkɔ Yesu: «Tina ndani batingami ba wɛ bakayake pɛ bososa mɔmɔ, ta mwɛngi mo bokɔkɔ?» 6 Yesu abalaka na bu: «Isaya atɔndɔkɔ bopele mɛnɛ tine bobo! Elenge ekomama tine bobo! Ndjɔ ba melo mibae, na bea mbaeli o Ndjakomba akomaka:

"Bato bi bakakumedjeni oko na mibalo,

endolo milema mi bobo bohali na mbi;

7 Edi oko ngasa bakaongɔneni,

bileho bi bobo bidi oko mibeko mi bato*."

8 Okahɛngeni mobeko mo Ndjakomba, okasapɛni na makɔkɔ ma bato.» 9 Abalaka na bu naikina: «Okadumbeni mɛnɛ mobeko mo Ndjakomba, tine bosapa na makɔkɔ ma bino. 10 Tengasa Mose abalaka: "Suma sange e wɛ na nange e wɛ", ko pongono "yona abalaka bobe na sange e nde kaoko na nange e nde atungi na bogwa*." 11 Endolo ino, okabaleni: moto akabala na sange e nde kaoko na nange e nde: "Eka epalaki mbi nopɛ bɛngi eokamoe, edi Kolobani*" etingodji "Ikabo i Ndjakomba". 12 Na bea, topakeni moto nongo enɔeli akɔe moeka tine sange e nde kaoko tine nange e nde. 13 Edi na moda mua, walonakani mobalo mo Ndjakomba tine bolongedja bokɔkɔ ibokineani bo. Ko wakɔkɔni meako minɛnɛ mikina na bokokana.»

14 Ngɔngɔ Yesu abeaka naikina emumu e bato ko abalaka na bu: «Hokamedjanini ko sipoani bopele: 15 Pɛ eka emɔti esokolu ekakwe adi moto ekamoimedje pita; endolo yena ekime adi moto, ekamoimedje pita. 16 [ Okani bopele, odi na matoi ma boka, aoke*!]»

17 Ehole esɔmbɔkɔ Yesu ta ndako, bohali na emumu e bato, batingami ba nde bamohɔdjɔkɔ tine e isɛ imina. 18 Abalaka na bu: «Ino pongono otakini bowɛi? Otadjebakani eka emɔti esokolu ekwei ta tei e moto eboaniti bomoimedja pita? 19 Tengasa iyena ekadae pɛ bokwea ta molema mo nde, endolo ta sɔpɔ ko ekɛi aima ta ndima.» Na bea Yesu ainedjaka boo mia masusu ma boyaka madi masɛnɔke*. 20 Abalaka naikina: «Edi eka ekime adi moto ekamoimedje pita. 21 Tengasa edi ta tei e molema mo moto, edi malɛno mabe makamolome ta bɔɔli, iba, bowa, 22 bɔɔli, ndukeli, bobila, bolowa, bohelama ta wusuwusu, ikuwa, bobala bobe tina e bakina, molumba ko basadaledjaka elenge moto otaka e bowɛi. 23 Midjɔ mia misusu mibe boimaka ta tei e moto ko bobedjaka moto.»

24 Yesu adongaka ena ko akɛkɛ ta ibonga i Tula. Akweaka ta ndako emɔti ko aipalaka moto adjebe, endolo aidikaka ta mbombi. 25 Na bea, mwali omɔti adaka na mwana o nde mwali yona oyekeamaka na mwembo mobe. Yana amotɔndeaka bo gala e Yesu; mbala emɔti aduaka asadumba ta mako ma nde. 26 Mwali omina adaka mogɛlɛki, o ibonga i Penisi e Sulia. Aongɔnɔkɔ Yesu boo abengane mwembo mobe adi mwana o nde. 27 Endolo Yesu abalaka na nde: «Kina boso bana bagole; tengasa editi bopele botomba mia ma bana ba bato ko bopa na mbwa.» 28 Endolo mwali omina amosɔmbedjaka: «Edi oko bea Kumu, mbwa, akayake mbumbu djikadumbe bana.» 29 Na bea Yesu abalaka na nde: «Na tina ekɔpi yena, kɛɛ: mwembo mobe moimi adi mwana o wɛ.» 30 Ehole eyanaka yo ta ndako e nde, ataneaka mwana asambi ta esambe: mwembo mobe moimaka.

31 Yesu akinaka ibonga i Tula, anɔkɔ ta ibonga i Sidona ko aimeaka ta ibeke i Galilea, ta ndjea enɔkɔ ta ibonga i Dekapolo. 32 Baduaka na moto o emimi ko baongɔnɔkɔ Yesu boo amobake ebɔ adaka na kpɔkɔsɔ e bobala. 33 Na bea Yesu amotombaka yo mɛnɛ, mootɔtɔkɔ na bato; amoisaka sapi ta matoi, atsweaka masɔi ta sapi i nde ko apeaka yemi e emimi. 34 Ngɔngimina Yesu angɔdjɔkɔ miso ta busa, asopaka mohemano ko abalaka: «Epata!» Etingodji: «Dipoama!» 35 Na mbala emɔti, matoi ma nde madipoamaka, ko yemi e nde etatoaka ko aimeaka bobala bopele. 36 Yesu apingedjaka bato ibadaka ena boo badae pɛ botɔndea bato gala emina. Nongo adakayo abasia bobala, endolo bato badaka oko babala gala emina. 37 Ko bato badaka na bokamoa bonɛnɛ; babalaka: «Misusu makɔkɔ yo, mikadae seko mipele mɛnɛ! Aokedjaka nongo bato bagwa matoi ko bobaledja bimimi!»