1 Ngɔngimina, Yesu aimeaka bobala na bu na masɛ: «Momi omɔti aonaka gbie e mele mi vino; aehikaka na ihiko, atɔɔkɔ mombɔndɔ ta ibanga tine bosiana mbuma i vino* . Ngɔngimina, atongaka naikina egbili oho, apaka gbie emina na basali ko akɛkɛ mwɛngɔ. 2 Ehole ebwanaka bodidi bo botswa mbuma, alomaka mosali omɔti adi basali ba gbie bɛngi bamolome i nde ibondo i mbuma. 3 Endolo basali ba mina bapeaka mosali omina, bamobomaka ko bamoyanedjaka mɔmɔ ngasa. 4 Na bea, moswa gbie alomaka okina mosali; basali bamina bamobomaka ta molo ko bamokedjaka sɔni. 5 Moswa gbie alomaka okina mosali, iyo pongono bamowaka. Moswa gbie alomaka naikina basali bakina banɛnɛ; banɔngedjaka bakina ko boawaka bakina. 6 Adikaka oko na mwana o nde omɔti oepaeli. Abalomeaka moto osuka, tengasa asabaleaka: "Basumake mwana o mbi." 7 Endolo basali ba gbie basabaleanaka: "Endjani motitani! Duani, lomowoeni, ko bodieli bodikake bo biso!" 8 Na bea, bapeaka mwana bamowaka ko bamodumbaka sokolu e gbie e vino.

9 «Moswa gbie e vino akɔke yo nde? Ihɔdjɔ i Yesu. Aduake, aowake basali bia ba gbie ko apake gbie emina adi basali bakina. 10 Oilangani ikomi di:

"Edi ibanga idumbaka batongi,

imei ikwe i ndonga.

11 Imua madongaka adi Kumu,

edi modjɔ mo bokamoa ta miso ma biso*!"»

12 Bakondji ba bato, bakondji ba banganga ba Ndjakomba ko balehi ba mibeko bahombaka enɔli ebomopea, endolo babangaka emumu e bato. Tengasa basipoaka boo abalaka isɛ imina tine bobo. Endolo bamokinaka boo akɛ.

13 Balomaka bapalusai na bato ba pamba Elode*, tine bohɔdjɔ Yesu ihɔdjɔ ibomomeka. 14 Baduaka bomotɔndea: «Molehi, ladjebaka boo wɛ okabale soti ko oditi na bɔɔ na moto; toendjake mbanda i bato, endolo okalehe soti ta ndjea e Ndjakomba. Eboani boo lopute puti e kumu monɛnɛ Sedjale? Lotungi boputa kaoko ngasa?» 15 Endolo elenge adjebaka yo boo badi ndjɔ ba melo mibae, abasɔmbedjaka: «Tina nda wapikeakanini elambo? Lwɛnini pata emɔti boo nayenɛ.» 16 Bamolwɛkɛ pata emina. Abahɔdjɔkɔ: «Ta pata ye, edi na boso ko na makomi ma nda?» Bamosɔmbedjaka: «Edi e kumu monɛnɛ Sedjale.» 17 Na bea Yesu abalaka na bu: «Pani kumu monɛnɛ Sedjale leka lobwani na nde, ko leka lo Ndjakomba lobwani na nde.» Ko bakamoaka mɛnɛ na mosɔmbedja mo mina.

18 Basadokai, bo bobalaka bopusoa boditi*, baduaka ahɔdjɔ Yesu: 19 «Molehi, endja meako milokomeaka Mose: "Ekadabo momi agwi pɛ bokina bana, akinaka mwali; mwange e nde asɔke mwali yona ko asɔmbedjake denga i mowei*. 20 Enakobea edaka na bana bami sambo. O boso amoasɔkɔ ko agwaka pɛ bobota. 21 O babae amoasɔkɔ ko agwaka pɛ bobota. Ekɔmɔkɔ pongono na o basato 22 mbunoko o sambo, ngɔngɔ ibo basusu, mwali agwaka pongono. 23 Ta bopusoa, ehole epusoabi bago, mwali omina adabi o nda? Tengasa basusu sambo bamoasɔkɔ."»

24 Yesu abalaka na bu: «Endja tine ibunga i bino; otadjebakani nongo makomi, ko nongo na sueya e Ndjakomba. 25 Na bea, ehole epusoabi bago, bamina bali basɔnetebi, endolo bahelamabi elenge babwɛndji ta busa. 26 Ta tine bago ko bopusoa, oilangani ta buku e Mose, eka ebalaka Ndjakomba na nde ta ipumba ibwanaka ko pɛ bodimea? "Mbi nadi Ndjakomba o Abalayama, Isaka ko Djakobo*." 27 Ndjakomba aditi Ndjakomba o bago, endolo Ndjakomba o bato ba bomɔ. Odini mɛnɛ naibunga!»

28 Omɔti o balehi ba mobeko abaokaka basabaleana. Elenge asipoaka yo boo Yesu abasɔmbedjaka bopele, aduaka amohɔdjɔ: «Mobeko monɔi na motuya nda?» 29 Yesu amosɔmbedjaka: «Endja mobeko monɔi na tina: "Hokamedja Isalɛlɛ! Kumu Ndjakomba o biso adi Kumu okoyo*; 30 Pala Kumu Ndjakomba, o wɛ na molema mo wɛ mosusu, na mwembo mo wɛ mosusu, na bowɛi bo wɛ bosusu ko na ngulu e wɛ esusu*. 31 Mo babae mu: Pala mwange e wɛ elenge akasapale wɛ mɛnɛ*." Pɛ mobeko mokina monɔi mibeko imi mibae na motuya.» 32 Molehi o mobeko abalaka na Yesu: «Molehi edi bopele! Eka e bali wɛ edi soti: Kumu adi Ndjakomba okoyo mɛnɛ pɛ okina aditi oko yo mɛnɛ*. 33 Ko bomopala na molema mo wɛ mosusu, na bowɛi bo wɛ bosusu, ko na ngulu e wɛ esusu; ko pala mwange e wɛ elenge wɛ mɛnɛ. Enɔi na makabo masusu ko na mbeka isusu, ko bopala mwange e wɛ oko elenge ekasapale wɛ mɛnɛ, enɔi makabo ko na mbeka isusu*.» 34 Yesu aenɛkɛ ko asɔmbedjaka na bowɛi; abalaka na nde: «Oditi bohali na bokumu bo Ndjakomba.» Pɛ moto ohɔdjɔkɔ Yesu ihɔdjɔ naikina.

35 Yesu adaka aleha ta ikanga i tepelo ko ahɔdjɔkɔ: «Ndenge nda balehi ba mobeko baboani bobala boo Masiya adi mwana o Dapiti? 36 Dapiti yo mɛnɛ, na ndjea e Mwembo Mosɛnɔke, abalaka:

"Kumu abalaka na Kumu o mbi:

Daa ta ebɔ e mbi e bami,

mbunoko naise baloni ba wɛ ta nase i bigbota bi wɛ*."

37 Dapiti yo mɛnɛ amobeaka "Kumu": moda nda? Masiya abwani adae naikina Mwana o Dapiti?»

38 Yesu abalaka na bu ta bileho bi nde: «Dani na edinga na balehi ba mobeko, bakapale bodala na mikoto miyai, bodimaka ndese i ekumu ta polo i bhuda; 39 bohɔkɔ bidie bi boso ta ba sinagoga ko polo i gala ta tɛkɛ inɛnɛnɛ. 40 Boyeaka bali bagwa na bami ko bobakoseaka, na miongɔnɔ miyai, bɛngi basinedje boo badi bato bapele. Badiabi esambi epipo mɛnɛ.»

41 Yesu adaka adi ta boso bo sanga e bipeli, aendjaka moda modaka emumu e bato baisa palanga. Badieli baisaka bibende bi pata. 42 Aenɛkɛ pongono mwali ogwedjaka momi, motakeli aisaka bibende bi pata ibae bikɛkɛ bi motuya mokɛkɛ mɛnɛ*. 43 Na bea Yesu abeaka batingami ba nde ko abalaka na bu: «Nabali na nu okobea, edi soti: mwali yo ogwedjaka momi motakeli aisi makabo ta sanga bonɔ bato basusu. 44 Tengasa, bato basusu bakabaka leka lodaka na bu napɛ posa ta bodieli bo bobo, endolo yo, akabi losusu lodaka na nde, tine bohelama.»