1 Yesu asɔmbɔkɔ boleha ta mokula mo ibeke. Emumu e bato eduaka amohika, na tina emina akweaka ta bwato ko asadedjaka. Emumu e bato edaka o ngondo mbuti na ibeke. 2 Abalehaka ekoka mɛnɛ na masɛ. Endja midjɔ mibalaka yo na bu ta bileho bi nde: 3 «Hokamedjani! Busa bomɔti, moneli akɛkɛ ta gbie e nde tine bona. 4 Enakobea ehole edaka yo amɛsɛ mbuma, ikina ikwaka ta yɔngɔ e ndjea; na bea mbulu baduaka ko badjikomaka. 5 Ekenge ekina e mbuma ekwaka ta polo e mabanga, yana mokpɔtɔ moidaka motutu. Mbuma ikandoi pɛpɛlɛ tine mokpɔtɔ moidaka motutu. 6 Endolo ehole eimaka moi, mokakanedjaka kona imina: tine djidaka na nginga. 7 Ikina mbuma ikwaka ta polo e ndjubɛ. Ndjubɛ ikandoaka, imbambamedjaka ko ibotaka mbuma. 8 Endolo ekenge ekina e mbuma ekwaka ta mokpɔtɔ mopele; kona itɔkɔ, ikandoaka ko ibotaka mingbɔndu: ikina ibotaka tuku isato, ikina tuku isamano, ikina mokama.» 9 Ko Yesu abalaka: «Odi na matoi ma booka, aoke!»

10 Ehole edikaka Yesu yo mɛnɛ, ibalamaka bomokimana na batingami domi na babae bamohɔdjɔkɔ tine masɛ. 11 Yesu abasɔmbedjaka: Adi no odiani mbombi e bokumu bo Ndjakomba; endolo adi bia ba sokolu, misusu mikabalame oko na masɛ; 12 tine boo nongo

«baendjaka, bataenɛkɛ;

baokaka, batadjebaka;

esakada boo basɔmbe adi Ndjakomba ko Ndjakomba abayɛbi*!»

13 Ngɔngɔ Yesu abalaka na bu: «Otasipwoakani isɛ di? Na bea obwanini bosipoa masɛ makina bo? 14 Moneli aonaka mobalo mo Ndjakomba. 15 Bato bakina badi elenge kona eonami ta yɔngɔ e ndjea, edi polo ekwi mobalo: ehole emoki bo, satana adoi akatoa mobalo momina amilema mi bobo. 16 Bato bakina badi elenge kona eonami ta polo e mabanga: ehole eoki bo mobalo, bamoasɔi na mongandi. 17 Endolo baditi na nginga ta tei e bobo, bakaite oko mo ehole mokɛkɛ. Ko ehole edoi minɔngɔ na saya ta tine e mobalo, bakini edimeli. 18 Bato bakina badi elenge kona eonami ta polo e ndjubɛ: edi bia baoka mobalo, 19 endolo makɛsɛdji ma ngondo, na ekoseakosea e madieli ko na posa djikina, djabedjaka mobalo ko motaki bobota. 20 Bato bakina badi elenge kona eonami ta kpɔtɔ ipele: edi bia baokaka mobalo, bamoasɔi ko moboti mbuma, okina tuku isato, okina tuku isamano ko okina mokama.»

21 Yesu abalaka na bu: «Moto abwani bodua na molinda tine bomoisa ta katini kaoko ta nase i esambe? Editi bomosɛpea ta esɛpei e molinda*? 22 Tengasa misusu i mibolama mienɛmɛbi ta bhuda, ko misusu mi mbombi mienɛmɛbi bohu. 23 Moto odi na matoi ma booka, aoke!» 24 Yesu abalaka na bu naikina: «Tomadani na edinga na midjɔ mokakano! Oko na mwɛngi mua moengɛkɛ na wɛ, boengɛbi oko moda momina; ko baobakeabi naikina tina e wɛ*. 25 Tengasa yona odi na moeka bamopabi lonɛnɛ; endolo yona odi pɛ boda naeka, bamokatoabi moeka odaki na nde.»

26 Yesu abalaka naikina: «Bokumu bo Ndjakomba bobwani na moda mu: Moto omɔti amɛsɛkɛ mbuma ta mokpɔtɔ. 27 Ngɔngimina, na yo ahwɛ bulu bosusu na adɛe pɛ bohwɛ, kona djatɔkɔ ko djakandoaka, atadjebaka nongo eka anɔkɔ. 28 Mokpɔtɔ mo mɛnɛ motɔedji mbuma: mbangi ndjani, ngɔngɔ mongbɔndu, mbunoko mbuma i bule ilumi ta mongbɔndu. 29 Ko ehole epingi mbuma, moto asaisa ta mosala na mbɛli e nde, tengasa ehole e bobuka eimei*.»

30 Yesu abalaka naikina: «Lobwani bokokanedja Bokumu bo Ndjakomba na ye? Na isɛ nda? Ibwani so lobale? 31 Edi elenge mbuma e motade*; ehole eoni bo ta kpɔtɔ, edi mbuma enɔi na bokɛkɛ mɛnɛ ta mbuma djisusu i ngondo. 32 Endolo ta boona, ekandoi ko eimei kona enɛnɛ bonɔ kona isusu i ndjuwa i gbie. Ekandodji tape djinɛnɛ ibwani na mbulu ba busa botonga mopo ma bobo nase i esi.»

33 Na bea, edi na masɛ manɛnɛ imadaka yo abaleha mobalo mo Ndjakomba, bobwana na bosipoa bo bobo. 34 Abalaka na bu oko na masɛ; endolo akadika yo mɛnɛ na batingami, abatingodjeaka midjɔ misusu.

35 Mɔmɔkɔ mo busa bomina, abalaka na bu: «Lomeleni ta mokula mo ibeke.» 36 Ngɔngɔ iboyanedja emumu e bato; batingami batiteaka ta bwato. Edaka yana pongono mato makina mbuti na nde. 37 Gbundumo, lungu epipo mɛnɛ ebangaka bokumba, bibuku bi madiba bikweaka ta bwato mbunoko bolumaka na madiba. 38 Ta ehole emina, Yesu ahwɛkɛ ta mbaka e bwato e sangɔngɔ, molo mobaki ta monyuku. Batingami ba nde bamosisodjaka ko bagamaka: «Molehi logwi! Etobaleaka nongo eka emɔti?» 39 Yesu asisoaka, agameaka lungu ko abalaka na ibeke: «Bogo! Pɔpɔnɔ!» Na bea lungu ekinaka bokumba ko losusu lopɔpɔnɔkɔ. 40 Ngɔngɔ Yesu abalaka na batingami ba nde: «Tina ndani wabangakani? Oditini na bodima?»

41 Endolo batingami badaka na bɔɔ bonɛnɛ ko basabaleanaka: «Iyo moto nda, bɛngi lungu na mbonge losusu lomosume*?»