1 Ehuma mɛnɛ, bakumu ba banganga ba Ndjakomba babolamaka ta ibolea inɛnɛ i basuku ba bayuda, na balehi ba mobeko ko na esambi esusu e Bayuda. Ngɔngɔ ibonanga Yesu mbɔti, bakɛɛ na nde amokina ta mɔmɔ ma Pilato. 2 Pilato amohɔdjɔkɔ: «Wɛ odi mokondji o Bayuda?» Yesu amosɔmbedjaka: «Edi wɛ moto obali*.» 3 Bakumu ba banganga ba Ndjakomba bapundaka Yesu na midjɔ minɛnɛ. 4 Na bea, Pilato ahɔdjɔkɔ Yesu naikina: «Otasɔmbedjaka nongo kɔpi? Otokaka midjɔ minɛnɛ mopundaka bo!» 5 Endolo Yesu aisɔmbedjaka nongo kɔpi, ekamodjaka Pilato.

6 Engi tɛkɛ e pasika, Pilato adaka aimedja mobɔlɔkɔ omɔti, yona ohɔdjɔkɔ bato. 7 Enakobea, momi omɔti kombe e nde Balabase adaka ta bɔlɔkɔ engbanga na bato ibalemoaka, ta bolemo bo bobo moto omɔti agwaka. 8 Emumu e bato baduaka ta ndako e Pilato ko bamohɔdjɔkɔ akɔe tina e bobo elenge elama yo bokɔ. 9 Pilato abasɔmbedjaka: «Opalini notingoeni Mokondji o Bayuda?» 10 Endolo adjebaka bopele mɛnɛ boo, bakumu ba banganga ba Ndjakomba batɛkɛkɛ Yesu na swɛ. 11 Endolo bakumu ba banganga ba Ndjakomba basumedjaka emumu e bato, boo bahɔdje adi Pilato abatingoe Balabase. 12 Pilato abahɔdjɔkɔ naikina: «Apalaka no nakɔe na yona okabe no Mokondji o Bayuda nde?» 13 Bamosɔmbedjaka na bogama: «Mobaka ta ekulusu!» 14 Pilato abahɔdjɔkɔ: «Bobe bokɔi yo nda?» Endolo bo basusu bagamaka naikina na ngulu: «Mobaka ta ekulusu!» 15 Pilato adimaka bosepedja bato ko abatingoaka Balabase; ngɔngɔ alomaka boo bakɛsɛkɛke Yesu mbalake ko amopaka ta mɔmɔ ma bobo, bɛngi bamobake ta ekulusu.

16 Basoda bakɛkɛ na Yesu ta ikanga i ndako e gupɛnɛlɛ ta polo ekasambedje bo midjɔ ko abeaka ebole e basoda. 17 Bamolwoadjaka esendja ekpetu* ko bayoaka egbala e ndjubɛ bamobakeaka ta molo. 18 Ngɔngɔ badaka bamoisea: «Mokondji o Bayuda, bwanda!» 19 Bamokɛsɛkɛkɛ na mososongo, bamotwiyaka masɔi ko bakwaka magbundɔ ta boso bo nde na bomota elenge adi kumu. 20 Ngɔngɔ ibomosɛkɛ, bamoiwaka esendja ekpetu ko bamolwoadjaka bisendja bi nde. Ngɔngɔ baimaka na nde sokolu bɛngi bamobake ta ekulusu.

21 Momi omɔti kombe nde Simo o ibonga i Kulɛnɛ, sange e Alekidjandele na Lupusu*, anɔkɔ ena adaka ahule ta gbie. Basoda bamopeaka na ngulu bɛngi atombe ekulusu e Yesu. 22 Bakɛkɛ na Yesu ta polo ekabe bo Gologota, etingodjaka: «Polo e egɔgɔlɔ e molo». 23 Bamopaka mana ma vino mabongoanedjabo na kasa i boyo, endolo Yesu aimwaka. 24 Ngɔngɔ bamobakaka ta ekulusu ko bakabanaka bisendja bi nde, na boboma djonga, bɛngi badjebe eka adiake moto*. 25 Edaka ehole e ibwa ehuma, emobakaka bo ta ekulusu. 26 Ikomi inedjaka tina ebogwa bo nde, edaka na makomi mi: «Mokondji o Bayuda». 27 Bamobakaka engbanga na batɔmbi babae ta ekulusu: omɔti ta ebɔ e bami okina ta ebɔ e bali. 28 [Edi ekokedjeli e ikomi ibalaka: «Alangamaka ta molɔngɔ mo boawoi ba bato*.»] 29 Bato ibanɔkɔ ena badaka bomosinga ko bogbɔkea melo; ko babalaka na nde: «E! Wɛ moto okabuke tepelo ko botokangaka ngɔngɔ i masu masato*, 30 saheledja ko tita ta ekulusu!» 31 Bakumu ba banganga ba Ndjakomba ko na balehi ba mobeko basɛkɛkɛ Yesu babalaka: «Aheledja bakina ko aboaniti bosaheledja yo mɛnɛ! 32 Kina boo Kilito, Mokondji o Isalɛlɛ, atite edɛdi ta ekulusu! Lokenɛdea bea, yana lamodimeake!» Bato ibabakakabo na Yesu ta ekulusu bo pongono badaka bamosinga.

33 Ta ehole e midi, modidi mokɔmɔkɔ ta ngondo esusu ko moyeyoaka mbunoko bihole bisato ngɔngɔ i midi. 34 Ta ehole e basato, Yesu agamaka na ngulu: «Eloyi, Eloyi, lamasabakatani?» –

Etingodji: «Ndjakomba o mbi, Ndjakomba o mbi, okinini tina nda?*» 35 Bato ibadaka ena bamokaka ko bagamaka: «Okani, abei Elia!» 36 Omɔti o bobo apotaka ko abokeaka imbusu ta vino e ngayi ko anangaka na ekenge e mososongo. Aepaka Yesu bɛngi amwake* ko abalaka: «Ambani, loendje kaoko Elia aduake amotitedja ta ekulusu!» 37 Endolo Yesu agamaka na ngulu ko atsweaka molema.

38 Esendja yena edaka esɛpi ta tepelo* ealeaka bipasa bibae donga o diko mbunoko nase. 39 Kapitɛni o basoda ba Loma, yona oemaka boso bo Yesu, aenɛkɛ moda motsweaka Yesu molema*. Abalaka: «Moto iyo adaki soti mɛnɛ Mwana o Ndjakomba!» 40 Bali badaka ena, badaka baendja bohali. Ta ndanda e bobo, edaka Malia Magadala, Malia nange Djake, mwange Djodje, ko na Salome. 41 Badaka basalea Yesu misala ta ehole edaka yo ta ibonga i Galilea. Edaka oho pongono bali banɛnɛ ibakɛkɛ na nde ta Yelusalɛmɛ.

42 Mɔmɔkɔ moimeaka, elenge edaka busa bo bosabɔngedja, etingodjaka busa bo boso bo sabata eime; 43 Esepu o Alimatayo*, adaka moto o gala enɛnɛ ta ikita inɛnɛ i Bayuda aduaka, yo pongono ambaka bokumu bo Ndjakomba. Adiaka kaso e bokɛ adi Pilato tine bohɔdjɔ mokuku mo Yesu. 44 Endolo Pilato akamoaka boka boo Yesu agwi ehele. Abeaka Kapitɛni o basoda ko amohɔdjɔkɔ ekada soti Yesu agwi ehele. 45 Ngɔngɔ iboka misɔmbedja mi Kapitɛni o basoda, Pilato apaka Esepu enɔli e botomba mokuku mo Yesu. 46 Esepu asombaka mbendja, atitedjaka mokuku mo Yesu ta ekulusu, amohuaka na mbendja ko bamoisaka ta ikila itɔkɔ bo ta ibanga. Ngɔngimina ahilingondjaka ibanga igbɔgbɔ tine bodipa ipose i ikila. 47 Malia Magadala ko Malia nange Djodje baenɛkɛ polo esambeaka bo mokuku mo Yesu.