1 Ehole eimaka yo ta ikanga i tepelo, omɔti o batingami abalaka na nde: «Molehi, endja mabanga mi mapele! Endja ndako dji ipele!» 2 Yesu amosɔmbedjaka: «Wenɛkɛ ndako dji ipele? Etadikake nongo ibanga imɔti ibaki ta diko i ikina; masusu masopeanake.»

3 Yesu adaka ta ikoli i Olipa, ta boso bo tepelo. Piɛlɛ, Djake, Yoane ko na Andele badaka bo bɛnɛ na Yesu ko bamohɔdjɔkɔ: 4 «Lotɔndea ehole aimeake midjɔ mimina ko embete ainedjake suka e midjɔ mimina.»

5 Yesu abalaka na bu: «Dani na edinga ko moto adae pɛ bokoseani. 6 Bato banɛnɛ baduabi na kombe e mbi ko babalabi: "Mbi nadi Masiya!" Ko babungedjabi bato banɛnɛ ndjea. 7 Ehole eokakabi no kilingo i bila mbuti ko na gala i bila bohali, pɛ bobangani. Etungi midjɔ mimina mimee, endolo edaetebi suka e ngondo. 8 Tengasa ekomi emɔti eanedjabi ekomi ekina, ko bokumu bomɔti banendjabi bokumu bokina. Ta polo itikoanake, edabi na bokumana bo kpɔtɔ, ko na ndja epipo. Edabi elenge mbangi e saya e bobota. 9 Dani na edinga no bɛnɛ; tengasa bokababini ta ibolea inɛnɛ i basuku ba bayuda ko obomamabini ta ba sinagoga. Baosambendjabini ta boso bo ba gupɛnɛlɛ ko na bakondji, edabi tine bobo tati epele tine mbi. 10 Etungi boso mɛnɛ Bwɛndi Bopele bolehame ta bikomi bisusu bi ngondo. 11 Ko ehole eopeabini bo tine bakɛɛ na nu ta boso bo esambi, pɛ bodani na bokɛsɛdji na meako mabalake no ta ehole yena. Tengasa editi no bato babalabi edi Mwembo Mosɛnɔke. 12 Bangi bato bakababi bangi bobo bɛnɛ ta bogwa, ko basange i bato bakɔbi okobea na bana ba bobo; bana banedjakabi ba boti ba bobo ko babowabi*. 13 Tine kombe mbi, bato basusu bolonabini. Endolo moto yona odabi na lingbangba mbunoko suka, ahelabi.»

14 «Ehole enɛbi no "mobedji onɔi na bobe" yo aiwei ta polo esɛnɔke* Kina boo molangi asipoe bopele! Na bea, ibadabi ta ibonga i Yudea batie ta makoli; 15 Yona odabi ta diko i ndako, atitetebi tine atombe eka emɔti ta ndako*; 16 ko yona odabi ta gbie atasɔmbɔ ngɔngɔ tine botomba esendja e nde. 17 Ndjokwa tine bali ba memi ko banungeakabi bana ta masu mamina! 18 Ongɔnɔni Ndjakomba boo midjɔ mimina misakimea ta ehole e piyɔ epipo! 19 Tengasa, ta masu mamina, madabi masu ma ndjokwa bonɔ saya yena eipaka daa donga amayoa Ndjakomba ngondo, mbunoko edɛdi, ko edaetebi naikina*. 20 Na bea eseda boo Kumu aikuedja masu mamina, pɛ moto omɔti oboanaka na bohela. Endolo akuedjaka masu mamina tine bia ibahɔmɔkɔ na nde. 21 Ekadabo moto abali na wɛ: "Endja, Kilito adi iya!" Kaoko: "Endja, Adibo!", Pɛ bomodimea. 22 Tengasa bakilito ba boloa ko na ba mbaeli ba boloa basangɔdjɔkɔbi ta tei e bino: bainedjakabi bimbete bi bokamoa ko ngindola, tine bobungedja nongo bato ibahɔmɔ. 23 Ino, daani na edinga! Notɔndeakani donga ehele.»

24 «Endolo ta masu mia, ngɔngɔ i ehole e saya epipo, modakabusa moimeakabi modidi, songe epaketebi naikina bohu, 25 Ndjɔtɔ bakwakabi donga ta busa, ko sueya isusu idiko ikumanakabi*. 26 Na bea bato baenɛbi Mwana o Moto bodua ta matute na sueya e nde esusu ko na ekumu*. 27 Na bea alomakabi babwɛndji ba nde boputuanedja bia ibahɔmɔ na nde donga ta makono ma ngondo manɛi, donga nase mbunoko suka e busa*.»

28 «Kinani olehameni na isɛ i mole mo pigi: Ehole esɔmbi tape ibesu na kasa itɔi, wadjebakeni boo bodidi bopele bobatami. 29 Oko moda momina, ino pongono, ehole enɛkɛbino midjɔ mimina boimea, djebani boo Mwana o Moto adi mbuti, ta ekukɛ e ndako*. 30 Okobea, nabalaka na nu, bato ba ehole ye batagwabi boso bo midjɔ mimina boimea. 31 Busa na kpɔtɔ inɔbi, endolo mibalo mi mbi minɔetebi.»

32 «Ta tine e isu kaoko ehole, pɛ nongo moto adjebaka, nongo babwɛndji ta busa, nongo Mwana; endolo oko Tata yo mɛnɛ adjebi. 33 Dani na edinga! Pɛ bohwɛni, tengasa otadjebakeni ehole emina eduake. 34 Edabi elenge moto okakɛ mɔndɔ: bokinaka ndako e nde ko bopaka kpatsi e nde adi basali ba nde, moto na moto na mosala mo nde, ko bobalaka na sindjili o ekukɛ boo sɛndjɛlɛ. 35 Sɛndjɛlɛni, tengasa otadjebakeni ehole ehulabi moswa o ndako: edabi kaoko mɔmɔkɔ, kaoko ta ndanda e bulu, kaoko ta kɔkɔ o boso, kaoko ehuma. 36 Dani na edinga boo akahula gbundumo, adae pɛ botaneani ohwɛlini. 37 Meako mabalaka mbi na nu, nabalaka pongono na bato basusu: Dani mosu!»