1 Akiool bueel b’ali onse onkyal, ebvaan bɔ awa amfam a bɔ bvɛɛ lam, kwɛn mbuul si ngɔmɔ̃ abee Nziã wuo ãtee ã bia-byɛ osiaan. 2 Yɔɔl kwɛn b’ali y’amfam b’akiool, bɔ abee bɔ mviɔɔl olɔ, ɔ̃tswɛ-pa wu eli bɔ andoo a bɔ ba dzii. Ke yam, ebvaan bɔ asal me ndɔɔ akiool obɔ bam ngesɛ, ke ngwel wɛ amfam b’atwal bvel li ɔ̃sal a bɔ obɔ ali andoo a bɔ ba dzii. Omɔ̃ ãndɔɔ m’etee yɛ bvool atam baal mɔ̃ osa.

3 Ŋɛn mbuul otee ãtee ãkyam, bvool k’akuru nzuru m’ãyɛɛn mã dzu mã Yeso Mãsia wu Mfam a bia-byɛ, y’ãtee m’ãdzuu nkuul mɔ̃ y’okiool o bia-byɛ wɛ, 4 ŋɛn mbuul ondɛ oli y’ondɛɛl o nzuru, ndɛ ki ayɛɛ pyɛ. Ndɛ oli y’oluu b’ɛ̃tsuun ye bo nzal a obel me ndɔɔ otsɛn b’ãndɔɔ. Oyɔ mboo yi ebepal nsɔɔ, y’obel, y’ɛ̃tswɛ, y’ɛ̃dzoo mi ɛ̃bi-ɛ̃bi. 5 Y’ɛ̃tsuun myɛn k’ɛ̃fa wɛ mi baal bɛn ãyal ãmaayi nkel, b’aywɛn a otaa-taa. Bɔ abewal okiool me Nziã onge nkuul yi abɔɔ opfel. 6 Ke yam, okiool me Nziã oli opfel b’onɛn, kɛn ebvaan mbuul akal y’esɛ m’eluɔ ki eli a ndɛ. 7 Ke ngwel wɛ, bia-byɛ k’eli ye ki éyi a bia-byɛ m’ɔ̃kiri wɛ, emfa kiki hɛ̃ bia-byɛ kieel k’embal m’ɔ̃kiri y’eluɔ wɛ. 8 Obɔ otsɛn bɛn okɛɛn bia-byɛ ebɔɔ bvi-odza y’ekɔ, bia-byɛ ekal y’esɛ me bvɛ. 9 Kɛn a b’adzii bam k’akal y’opfel abva m’ɔ̃mbio, me bɛɛ, bvool onse efua bvɛn otsɛn pyɛ bvool bvi ebi-ebi, bvi ebiri baal k’epfu y’odziɔɔn. 10 Ke ngwel wɛ, nzal a nzi, mboo yi ebeya ãpal mbueel. Baal bibi b’alɔ ɔ̃kwal bam onse obɔɔ o yɔ adziɔɔn lala y’okiool, bvool awi ãnzuru ã bam fool li bibi.

11 Me b’otal yɛ, yɛ wu ɔ̃sal a Nziã, bal ãndɔɔ omɔ̃. Bii k’akal dzu, kuru nzuru me Nziã. Kal y’okiool, ye dzii, y’osɛ-mwiĩ y’efyɛ. 12 Dzwaan mvel yi ngesɛ yi okiool. Bvuru elaã li ɔ̃bu nkal ɔ̃bu, ke ngwel wɛ Nziã áti yɛ mbel k’ayɛɛ lɔ, bvool lɛn me ndɔɔ alɔ, yɛ átsweel otsweel bo ngesɛ ke nkwel a amwɛn bibi. 13 Ke nkwel a Nziã, wu awa eluɔ bvieel omwiĩ, bvool ke nkwel a Yeso Mãsia wu átsweel otsweel bo ngesɛ ke nkwel a Ponse Pilate, mɛ̃ ntam yɛ k’asa bubu: 14 Kwɛɛ ndɔɔ yi atam yɛ osa ekal mbiin pyɛ, elyal pyɛ, tiil tsoo li èya Mfam a bia-byɛ Yeso Mãsia. 15 Oya obɔ okieel okal me lio li éwɛɛ Nziã. Ndɛ wu Nziã oli kɛn a ngɔmɔ̃ wu oli y’Omfam, oli wu awa esɛ, ndɛ oli Ɔ̃kwɛn a akwɛn bueel, oli hɛ̃ Mfam a amfam bueel. 16 Ndɛ oli kɛn a ngɔmɔ̃ wɛn k’akwa wɛ. Ndɛ abekal ke mwiĩ wɛn mbuul si ɔ̃mɔ̃ k’akoo m’osyal ke ndɛ wɛ. Mbuul si ɔ̃mɔ̃ mwɛn-éndɛɛl kɛn amwɛn ndɛ wu Nziã wɛ, k’akoo m’omwɛn ndɛ hɛ̃ wɛ. Yɔɔl kwɛn nkuũ a ndɛ ekal ye bvɛɛ ye waan ɔ̃bu nkal ɔ̃bu. Amɛn!

17 Yiool apfel b’onse ɔ̃kiri wu wɛn abee y’ondɛɛl o nzuru okal, bvool abee kaã ota m’opfel bɛn k’oyiil wɛ. Kɛn a bɔ ata kaã me Nziã wu abewa bia-byɛ bvieel ngamfɛn, kwɛn bia-byɛ eyoo esɛ me bvɛ. 18 Yiool bɔ k’asa obvɛ, akal apfel mi ɛ̃sal mi ngesɛ, akal ye kab, akal y’esɛ ki akab baal eluɔ. 19 M’emfa okyɛ, me ndɔɔ ãtsoo m’ã̀ya, bɔ àbvool opfel b’obvɛ-obvɛ bvool bɛn k’otsiɔ̃ wɛ me ndɔɔ a bam, m’obɔɔ b’elaã li lɔ-a-lɔ.

20 Ee Timote, kwɛɛ ngesɛ-ngesɛ ãndɔɔ m’áwi yɛ. Bee ãyɛɛn mã ngwel-a-ngwel bvool m’ãkam y’okiool. Bee hɛ̃ ɛ̃dzoo mi ãndɔɔ m’abeyɛɛn m’odzɛɛn ndiri eli oyɛɛ. 21 Baal bakyɛ abetsam ndiri bɔ ali y’oyɛɛ obɔ. M’emfa okyɛ, bɔ ayɛn lala y’okiool. Yɔɔl kwɛn Nziã asio byɛ nyiĩ!