1 K’obɛɛn éli Endɔɔ. Endɔɔ éli ye Nziã. Endɔɔ éli Nziã. 2 Lɔ éli k’obɛɛn ye Nziã. 3 Ási eluɔ bvieel me nkuul a lɔ. K’eli y’eluɔ ki ási kyɛn k’ási me lɔ wɛ. 4 Onse lɔ, éli y’elaã. Elaã éli mwiĩ a baal. 5 Mwiĩ ákenyɛɛn onse lepeel, kɛn a lepeel k’ekwaal otsɛn o ndɛ wɛ. 6 Éli ye mbuul wu éyuɔɔl Nziã, wɛn nkuũ Dzaã. 7 Ndɛ áyi onge mwɛn, me ndɔɔ yi atsweel mwiĩ, kwɛn baal bueel akal y’okiool me nkuul a ndɛ wu mwiĩ. 8 Ndyam k’áli mwiĩ wɛ, kɛn a ndɛ áyi me ndɔɔ yi atsweel mwiĩ. 9 Endɔɔ olɔ éli mwiĩ wa taa-taa, wɛn ŋ’eyi ndɛ onse ɔ̃kiri, oyɛɛl baal bueel. 10 Endɔɔ éli onse ɔ̃kiri. Ási ɔ̃kiri me nkuul a lɔ, kɛn ɔ̃kiri k’áyɛɛ lɔ wɛ. 11 Lɔ eyi ola baal a lɔ, kɛn a baal a lɔ k’ayɔɔ lɔ wɛ. 12 Kɛn a baal bueel b’ayɔɔ lɔ, b’akiool nkuũ a lɔ, lɔ ewi bɔ okwɛn b’akal baan a Nziã. 13 Bɔ k’ayii baan a Nziã m’oburu b’ombuul wɛ, m’efua ki ombuul wɛ, m’ãtsam m’ɔ̃lam hɛ̃ wɛ, kɛn a m’ãtsam ã Nziã. 14 Endɔɔ ekɔɔl mbuul. Mbuul ondɛ okal onse bia-byɛ. Ndɛ oluul me dzii y’otaa-taa. Bia-byɛ emwɛn omfam o ndɛ, omfam b’ensuu e muaan wu ofi ola Taal. 15 Dzaã otsweel ndɛ, bu abiool ndiri: «Ndɛ wu éyɛɛn mɛ̃ me ndɔɔ a ndɛ, ndiri: "Mbuul wu àya ke mbee a mɛ̃ onduru mɛ̃, ke ngwel wɛ ndɛ áli ɛ̃kwel ɛ̃ mɛ̃."» 16 Me dzii ngamfɛn li edzii ndɛ bia-byɛ bueel, ndɛ owi bia-byɛ ondɔɔl o kuɔɔl b’onduru ɔ̃ndel. 17 Ke ngwel wɛ, áwi bia-byɛ ngel me nkuul a Moyize, kɛn a nyiĩ y’otaa-taa eyi me nkuul a Yeso Mãsia. 18 Mbuul si ngɔmɔ̃ mwɛn-éndɛɛl kɛn amwɛn Nziã wɛ. Kɛn a ensuu e Muaan ngɔmɔ̃ wu oli Nziã, wu oli onse bal e Tal, ndɛ wu osuo baal Nziã.

19 Tal emfa ki étsweel Dzaã Yeso, me lio lɛn, fa Yelusalem, amfam b’Ayuda áyuɔɔl angaa-a-Nziã y’alebvit ola ndɛ, m’ofuul o ndɛ ndiri: «Yɛ ndyam nã li?» 20 Dzaã k’abee k’awa ɔ̃mveel wɛ, kɛn a ndɛ oyɛɛn bam kal-a-kal ndiri: «Mɛ̃ ke ndi Mãsia wɛ.» 21 Bɔ afuul ndɛ ndiri: «Obobɔ, ye nã li? Yɛ Eli li?» Dzaã obveel ndiri: «Hɛɛ̃-hɛ̃, mɛ̃ ke ndi ndɛ wɛ!» Bɔ bvool afuul ndiri: «Yɛ ɔ̃liaal-ɛ̃kiɛɛn a Nziã li?✝» Ndɛ obveel ndiri: «Hɛɛ̃-hɛ̃!» 22 Bɔ bu alieel ndiri: «Ke yɛ nã li, kwɛn bee eyɛɛ b’ebveel bee b’atam bee. B’eyɛɛn yɛ me ndɔɔ a yam omã?» 23 Ndɛ obveel ndiri: «Mɛ̃, Mɛ̃ ndi mbuul wu abebiool nkal ɔ̃baan wa kɛɛ-kɛɛ, ndiri: Eseel nkuul me ndɔɔ a Mfam, onge b’élieel Edzayi wu ɔ̃liaal-ɛ̃kiɛɛn a Nziã✝.» 24 Onkyel ŋ’esa oŋɔ̃, b’áyi ontam obɔ áli Afalisaye. 25 Bɔ bvool afuul Dzaã ndiri: «Yɛ wɛn yɛ ke Mãsia wɛ, yɛ k’Eli wɛ, yɛ hɛ̃ k’ɔ̃liaal-ɛ̃kiɛɛn a Nziã wɛ, k’otsɛn omã b’ebewa yɛ baal opongo?» 26 Dzaã obveel bɔ ndiri: «Mɛ̃, mɛ̃ ewa byɛ opongo b’ãdza, kɛn onse byɛ, eli ye wɛn byɛ k’eyɛɛ wɛ. 27 Ndɛ àya ke mbee a mɛ̃, kɛn a mɛ̃ ke mvaan m’onyiɔɔn b’ɛ̃sii mi asimpal a ndɛ wɛ.» 28 Ãndɔɔ omɔ̃ ãkebwel k’ola bo Betani, ongwel a nzal yi Dzolodɛ̃, ke mboo yi ékewa Dzaã baal opongo.

29 Ela esiool, Dzaã omwɛn Yeso ayeya ola ndɛ, ndɛ bu alieel ndiri: «Etal Muaan-emɛmɛɛ̃ e Nziã, ki embaal obi b’ɔ̃kiri! 30 Ndɛ wu éyɛɛn mɛ̃ me ndɔɔ a ndɛ, ndiri: "Mbuul wu àya ke mbee a mɛ̃ onduru mɛ̃, ke ngwel wɛ ndɛ áli ɛ̃kwel ɛ̃ mɛ̃." 31 Myam k’ekeyɛɛ ndɛ wɛ. Kɛn a mɛ̃ ye ngwa opongo b’ãdza, kwɛn ndɛ amɔɔn ol’Isalayel.» 32 Dzaã opio ɔ̃liɛɛn bubu: «Mɛ̃ mwɛn Ɔ̃fel ofi ywel osool onge kuun, bu abvi nkal a ndɛ. 33 Myam k’ekeyɛɛ ndɛ wɛ, kɛn a wu atam mɛ̃ opongo b’ãdza owa, ndɛ ondɛ wu alieel mɛ̃ ndiri: "Mbuul wu èmwɛn yɛ Ɔ̃fel asool bvool àkal nkal a ndɛ, ndɛ ondɛ wu àwa baal opongo b’Ɔ̃fel wu Ɔ̃nsensal." 34 Mɛ̃ mwɛn, obɔ otsɛn bɛn mɛ̃ nsweel wɛn ndɛ oli Muaan a Nziã.»

35 Ela esiool, Dzaã bvool áli oŋɔ̃ y’ayio a ndɛ buaal. 36 Ŋ’emwɛn ndɛ Yeso abwel, ndɛ olieel bubu: «Tal Muaan-emɛmɛɛ̃ e Nziã!» 37 Ŋ’eyoo ayio ange-buaal ãyɛɛn omɔ̃, bɔ anɔɔn a Yeso. 38 Yeso okɔɔl, omwɛn kwɛn bɔ abenɔɔn a ndɛ, ndɛ bu afuul bɔ bubu: «Byɛ emã ebebii?» Bɔ abveel ndɛ ndiri: «Rabbi*, yɛ kwɛn abekal?» Rabbi ŋ’ayɛɛn ndiri «ɔ̃tee.» 39 Ndɛ obveel bɔ ndiri: «Eya, byɛ èmwɛn! Bɔ ayi, bu amwɛn mboo yi ékekal ndɛ.» Bɔ bu akal ye ndɛ tsoo olɔ. Lio al’eyii li ãnã ŋ’emeekɔɔl tal. 40 Andele wu muaan-ngoo a Simɔ̃ Piɛɛl áli ngɔmɔ̃ onse ayio ange-buaal b’áyoo ãyɛɛn ã Dzaã bvool ánɔɔn a Yeso. 41 Ŋ’ɛ̃kwel ndɛ omwɛɛn ye muaan-ngoo a ndɛ Simɔ̃, bvool olieel ndɛ bubu: «Bee emwɛɛn ye Mãsia», ŋ’ayɛɛn ndiri «Kilisito.» 42 Ndɛ obiri Simɔ̃ ola Yeso. Yeso otal Simɔ̃, bu alieel ndɛ ndiri: «Yɛ li Simɔ̃ wu muaan a Dzaã. Nkuũ a yɛ èkal Sefas*, ŋ’ayɛɛn ndiri Piɛɛl.»

43 Ela esiool, Yeso okuru k’ayi nsie yi Ngalile. Ndɛ omwɛɛn ye Filipe, bu alieel ndɛ ndiri: «Luɛɛn a mɛ̃!» 44 Filipe áli wa bviil li Betesayida, li ékekal Andele ye Piɛɛl. 45 Filipe omwɛɛn ye Natanahel, bu alieel ndɛ ndiri: «Bee emwɛn mbuul wɛn Moyize onse Ngel ákel me ndɔɔ a ndɛ, bvool wɛn aliaal-ɛ̃kiɛɛn a Nziã ákel me ndɔɔ a ndɛ. Mbuul ondɛ Yeso wu muaan a Dzedzef wa Nadzalet.» 46 Natanahel olieel ndɛ ndiri: «Eluɔ ki ngesɛ hɛ̃ olɔ efi Nadzalet?» Filipe obveel ndɛ ndiri: «Ya bvool mwɛn!» 47 Ŋ’emwɛn Yeso Natanahel aya ola ndɛ, ndɛ oyɛɛn me ndɔɔ a ndɛ ndiri: «Tal ɔ̃fi-Isalayel wa taa-taa wɛn onse ndɛ pfuru pyɛ.» 48 Natanahel ofuul Yeso ndiri: «Yɛ mɛ̃ kwɛn yɛɛ?» Ndɛ obveel ndɛ ndiri: «Ye k’eta Filipe yɛ mbel, ŋ’eli yɛ ke nsɛn ɔ̃ti a fig, mɛ̃ emwɛn yɛ.» 49 Natanahel obveel ndɛ ndiri: «Rabbi, wu oli Muaan a Nziã yɛ, wu oli Ɔ̃kwɛn a Isalayel yɛ.» 50 Yeso olieel ndɛ ndiri: «Me ndɔɔ yi ndieel mɛ̃ yɛ wɛn mɛ̃ emwɛn yɛ ke nsɛn ɔ̃ti a fig, yɛ kiool mɛ̃? Yɛ akieel amwɛn ãndɔɔ m’ãnduru okuun.» 51 Yeso olweel ndiri: «Taa-taa bam, byɛ ekieel emwɛn ywel kal-a-kal, ãnzwel ã Nziã ãyi ywel ãsool ke ywel a Muaan a mbuul.»