1,2 Tsoo ngelemɔ̃ Nziã oyɛɛn ye Dzaã wu muaan a Dzakali, me lio li ékekal ndɛ nkal ɔ̃baan. Me lio olɔ, Tibɛɛl wu ɔ̃kwɛn wu ɔ̃nɛn wa Lom, al’oyii me mvel kuun ye taan yi okwɛn o ndɛ. Ponse Pilate áli mfam wa Yude. Elode Antipas áli mfam wa Ngalile. Muaan-ngoo a ndɛ Filipe áli ɔ̃kwɛn fa Itule tiil Telakonide. Lisanias áli mfam wu Abilɛn. Ãnã ye Kayif áli angaa-a-Nziã b’anɛn b’Ayuda. 3 Ŋ’eyoo Dzaã m’eyɛɛn Nziã ndɛ, ndɛ odzuu me nsie yam yueel yi eli tsotsoo a nzal yi Dzolodɛ̃. Ndɛ áketa baal ãmbel k’awal opongo b’okaal b’ɛ̃kwal kwɛn bɔ abɔɔ odzeel b’ãbi.

4 Ãndɔɔ ãbwel m’emfa ki élieel Edzayi wu ɔ̃liaal-ɛ̃kiɛɛn a Nziã, onse ɔ̃nkaan a ndɛ ndiri:

«Mbuul abebiool nkal ɔ̃baan bubu:

"Efaal ɔ̃siɔɔn me ndɔɔ a Mfam Nziã!

Eseel ãnkuul ã ndɛ ãkal dzu!

5 Ɔ̃bwɔɔ ndyam wueel, akieel akiil ndɛ.

Ãnkio mam mbueel m’ãnɛn ye m’ãtsi-ãtsi, akieel abwel mɔ̃.

Ãnkuul m’ãbwɔɔl-ãbwɔɔl, akieel aseel mɔ̃,

mã y’ãywɛn, akieel aboo mɔ̃.*3.5 Me lio olɔ, ŋ’ékekiaal baal oya b’ɔ̃kwɛn onse ola o bɔ, bɔ ákefaal nkuul. Edzayi oyɛɛn ndiri kɛn a m’emfa kiki, ebvaan baal afaal elaã e bɔ, m’oyɔɔ o Mãsia. Dzaã áketee baal k’akaal ɛ̃kwal ɛ̃ bɔ, bvool k’ayɔɔl ãbi, me ndɔɔ ɔ̃yɛɛl wu oya o Yeso.

6 M’emfa okyɛ, mbuul ndyam wueel àmwɛn emfa ki èbvuul Nziã baal✝3.6 Edz 40.3-5."»

7 Embuul e baal ékeya opongo owal ola Dzaã, obobɔ ndɛ ákeyɛɛn bɔ bubu: «Byɛ abi-abi eli onge ampel! Wu osuo byɛ emfa ki abal mpuru a Nziã yi èyeya nã*3.7 Dzaã ŋ’ayɛɛn ndiri ki ebvuul mbuul k’eli kɛn owal b’opongo wɛ, ki enduru okuun okaal b’ɛ̃kwal.? 8 Esa ãndɔɔ mã ngesɛ, m’ãsuo kwɛn byɛ ekaal ɛ̃kwal. Ebee byam-a-byam obeyɛɛn wɛn: "Abalayam oli nkiɔɔn a bee." Ke ngwel wɛ, mɛ̃ bam eyɛɛn byɛ wɛn, ãnkɔɔn m’emwɛn byɛ mã, Nziã okoo k’asa kwɛn mɔ̃ ãkɔɔl atiɔɔl b’Abalayam. 9 Bam ŋ’eyɛɛn ŋã, ekuu amaayɛɛl me ndɔɔ yi akii ɛ̃ti bɛɛn k’ɛ̃dza ɛ̃ myɛ̃. Ɔ̃ti ndyam wueel wɛn k’aburu nsia yi mvɛ wɛ, àkii ndɛ bvool àtyal ndɛ onse mbaa.»

10 Baal bu afuul Dzaã ndiri: «Obobɔ, bee eyii bwɛn esa?» 11 Ndɛ obveel bɔ bubu: «Mbuul wa m’ɛ̃nkuru mviaal, awa wu oywɛn a ndɛ ngɔmɔ̃. Wa ye bvi-odza, akab bvɛ ye wu oywɛn a bvɛ.»

12 Baal b’asal ke mboo yi afuru mpal ayi hɛ̃ opongo owal, bvool afuul Dzaã bubu: «Ɔ̃tee, ke bee bwɛn-a-bwɛn esa?» 13 Ndɛ bu abveel bɔ bubu: «Ebee nzi ondɔɔl ke ywel a yi etam nga-furu baal ofuru.»

14 Ambwel-mbwel hɛ̃ afuul ndɛ bubu: «Ke bee, bee hɛ̃ bwɛn esa?» Ndɛ hɛ̃ obveel bɔ bubu: «Ebee baal nzi owɛɛl, ebee baal hɛ̃ ãndɔɔ oburu. Ekal y’esɛ me furu e byɛ.»

15 Baal bueel ákekiaal Ɔ̃mvuul ye kaã, bɔ bu abvi ofuul bam-a-bam me ndɔɔ a Dzaã, ndiri: «Wu olɔ ke Mãsia wu Ɔ̃mvuul wu eyuɔɔl Nziã bia-byɛ wɛ?» 16 Dzaã bu abveel bɔ bubu: «Mɛ̃ wu ewa byɛ opongo b’ãdza. Kɛn a mbuul wu aya, wu onduru mɛ̃ me waan. Mɛ̃ ke mvaan m’odzuul b’asimpal a ndɛ wɛ. Ndɛ wu akieel awa byɛ opongo b’Ɔ̃fel wu Ɔ̃nsensal ye bo mbaa. 17 Mbuul ondɛ oli y’esiɔ onse mviɔɔl ɛ̃ ndɛ, me ndɔɔ yi akab nsia e bele ye bviĩ bvi ebi-ebi. Ndɛ àbvool nsia onse nzɔ yi abekwɛɛ yɔ, kɛn a ndɛ àtyal bviĩ bvi ebi-ebi onse mbaa yɛn k’edzam wɛ.»

18 Dzaã hɛ̃ owi baal ãluo ãkyam bibi, ndɛ otee bɔ Nsia a Nziã yi Ngesɛ. 19 Ŋ’esa oŋɔ̃, Elode wu mfam a Ngalile áwɛɛl Elodias wu ɔ̃kal a muaan-ngoo a ndɛ. Ndɛ wu Elode bvool osi ãndɔɔ m’ãbi-ãbi ãkyam mam bibi. Dzaã bu awi ndɛ mbyel, m’ãndɔɔ omɔ̃ mam mbueel. 20 Obobɔ, Elode otam ndiri alɔ Dzaã bwal: Oyɔ ndɔɔ yi enduru obii yi esi ndɛ.

21 Ŋ’ewel baal bueel opongo, Yeso hɛ̃ oyi bo ndɛ owal. Ŋ’eyii ebuɛɛn ndɛ, ywel edzweel nzuru, 22 Ɔ̃fel wu Ɔ̃nsensal bu asool nkal a ndɛ m’emfa ki kuun. Nziã bu ayɛɛn ke ywel ndiri: «Yɛ li Muaan a mɛ̃ wu ɔ̃tio, mɛ̃ ndi y’esɛ ki bibi me ndɔɔ a yɛ.»

23 Ŋ’ébɛɛn Yeso otee, ndɛ aleyii me mvel nku-a-nku ãku-ãtyel (30). Baal áketsam kwɛn Dzedzef áli tal a ndɛ. Ndɛ wu Dzedzef oli muaan a Heli. 24 Heli oli muaan a Matat. Matat oli muaan a Lebvi. Lebvi oli muaan a Meliki. Meliki oli muaan a Dzanayi. Dzanayi oli muaan a Dzedzef. 25 Dzedzef oli muaan a Matatias. Matatias oli muaan a Amose. Amose oli muaan a Nahum. Nahum oli muaan a Esili. Esili oli muaan a Nagayi. 26 Nagayi oli muaan a Mahat. Mahat oli muaan a Matatias. Matatias oli muaan a Semehin. Semehin oli muaan a Yosek. Yosek oli muaan a Yoda. 27 Yoda oli muaan a Yohanan. Yohanan oli muaan a Lesa. Lesa oli muaan a Dzolobabel. Dzolobabel oli muaan a Salatyel. Salatyel oli muaan a Neli. 28 Neli oli muaan a Meliki. Meliki oli muaan a Adi. Adi oli muaan a Kosam. Kosam oli muaan a Elemadam. Elemadam oli muaan a Ɛɛl. 29 Ɛɛl oli muaan a Dzodzue. Dzodzue oli muaan a Elihedzɛɛl. Elihedzɛɛl oli muaan a Yolim. Yolim oli muaan a Matat. Matat oli muaan a Lebvi. 30 Lebvi oli muaan a Simehɔ̃. Simehɔ̃ oli muaan a Yuda. Yuda oli muaan a Dzedzef. Dzedzef oli muaan a Yonam. Yonam oli muaan a Elihakim. 31 Elihakim oli muaan a Meleha. Meleha oli muaan a Mena. Mena oli muaan a Matata. Matata oli muaan a Natam. Natam oli muaan a David. 32 David oli muaan a Dzese. Dzese oli muaan a Obed. Obed oli muaan a Bohaz. Bohaz oli muaan a Sala. Sala oli muaan a Naason. 33 Naason oli muaan a Aminadab. Aminadab oli muaan a Adimin. Adimin oli muaan a Aleni. Aleni oli muaan a Eswerom. Eswerom oli muaan a Pales. Pales oli muaan a Yuda. 34 Yuda oli muaan a Dzakab. Dzakab oli muaan a Isak. Isak oli muaan a Abalayam. Abalayam oli muaan a Tela. Tela oli muaan a Nahɔɔl. 35 Nahɔɔl oli muaan a Seluk. Seluk oli muaan a Lehu. Lehu oli muaan a Palek. Palek oli muaan a Ebɛɛl. Ebɛɛl oli muaan a Sala. 36 Sala oli muaan a Kayinam. Kayinam oli muaan a Alepasad. Alepasad oli muaan a Sem. Sem oli muaan a Nowa. Nowa oli muaan a Lamek. 37 Lamek oli muaan a Matusalem. Matusalem oli muaan a Enok. Enok oli muaan a Yalet. Yalet oli muaan a Malehelel. Malehelel oli muaan a Kayinam. 38 Kayinam oli muaan a Enos. Enos oli muaan a Set. Set oli muaan a Ãdam. Ãdam oli muaan a Nziã.