1 Ondoo b’ɛ̃kwel óli y’ãngel m’ãtal obuɛɛn. Bɔ hɛ̃ óli ye mboo yi ɔ̃nsensal yi me nsie ŋã. 2 Ke ngwel wɛ, átuu sɛɛ. Onse etswi e ndɛ ki ɛ̃kwel, ki ata me «mboo yi ɔnsensal», éli y’eluɔ ki abendɔɔl ambunda, ye misa, y’amampa b’ákewa Nziã ãkab9.2 Opa 26.1-30; 25.23-40. 3 Ke mbee ekɔ ki enɛn ki bviaal, éli y’etswi ki kikyɛ, ki ata me «mboo yi enduru ɔ̃nsensal»9.3 Opa 26.31-33. 4 Onse okɔ, éli ye nkiin yi me ɔɔl yi abetsoo ɔ̃ywiri, ye nkab a ondoo yi ápwɛɛ ɔɔl me yɔ yam yueel. Onse nkab oyɔ, éli ye saan li ɔɔl li álɔ mane9.4 Dzã 6.31,49, y’ɔ̃mpaã wu Alona wu ápaal ãnyuɔ̃, y’ãnkɔɔn m’ápuul ãngel m’ondoo9.4 Opa 16.33; 25.10-16; 30.1-6; Ɛ̃bv 17.8-10; Det 10.3-5. 5 Ke ywel a nkab a ondoo, éli y’etiɔ bvi ãnzwel m’ata m’Aswelebɛ̃ ba lweel b’ákesuo kwɛn Nziã áli oŋɔ̃. Edzuun ki ãpab ã mɔ̃ éfoo mboo yi abenzɔɔ ãkel me ndɔɔ odzeel b’ãbi. Kɛn a li ke lio li abɛɛl ãndɔɔ omɔ̃ mbueel wɛ9.5 Opa 25.18-22.
6 Obobɔ, ŋ’ayɛɛl eluɔ obvɛ bvieel, angaa-a-Nziã abvi osam ãlio mbueel onse etswi ki ɛ̃kwel ki sɛɛ, me ndɔɔ yi asa ɛ̃kiri m’obuɛɛn9.6 Ɛ̃bv 18.2-6. 7 Kɛn a ngaa-a-Nziã wu ɔ̃nɛn mbuul wu ákesam k’etswi ki bviaal, sa ngemɔ̃ me mvel. Ŋ’ékesam ndɛ onse okɔ, ndɛ k’ákeywɛn k’abiri ãkel m’anywam m’ékewa ndɛ kab ola Nziã me ndɔɔ elyal e ndyam ye bvi baal wɛ9.7 Lev 16.2-34. 8 Oŋɔ̃ Ɔ̃fel wu Ɔ̃nsensal ŋ’asuo kal-a-kal ndiri, nkuul yi asam onse mboo yi enduru Ɔ̃nsensal ále k’ekoo k’edzweel nzuru kɛn wɛ, ŋ’éli sɛɛ wu ɛ̃kwel kɛn oŋɔ̃. 9 Ndɔɔ oyɔ eli mboo yi esuo emfa ki ãndɔɔ mã meba. Yɔ esuo kwɛn ãkab y’ãmpɔɔ m’áwi Nziã k’ãkoo k’ãsuul ɛ̃kwal ɛ̃ baal b’abuɛɛn Nziã m’emfa okyɛ ɔ̃koo wɛ. 10 Omɔ̃ mbueel, eli kɛn ãngel m’ombuul, m’ãtal eluɔ bvi adza, ye bvi anywã, y’ɛ̃kiri mi osuɔɔl o nzuru mi emfa bwɛn emfa. Ɛ̃kiri omyɛ̃ ɛ̃́li y’otsɛn tiil lio li éfaal Nziã ãndɔɔ mbueel.
11 Kɛn a Mãsia áyi onge Ngaa-a-Nziã wu ɔ̃nɛn me ndɔɔ yi awa bia-byɛ eluɔ bvi émeebɔɔ ndɛ bia-byɛ. Ndɛ ábwel onse sɛɛ wu enduru ɔ̃bvɛn bvool wu enduru k’ali ɔ̃koo, wɛn ke wu átuu me mviɔɔl ɛ̃ baal wɛ, ke wu ɔ̃kiri wu hɛ̃ wɛ. 12 Ndɛ ásam sa ngemɔ̃ ɔ̃bu onse mboo yi enduru ɔ̃nsensal. Okɔ, ndɛ k’áwi ãkel m’atab wuo m’angwɛmbɛ wɛ, kɛn a ndɛ áwi ãkel ã ndyam. M’emfa okyɛ ki ébɔɔ ndɛ bia-byɛ obvuul b’ɔ̃bu. 13 Okɛɛn mbuul oyii ye mbiin, angaa-a-Nziã ákenzɔɔ ndɛ ãkel m’antab ye m’angwɛmbɛ b’alam, y’efuru li ɔ̃kal a ngwɛmbɛ wu adziool. M’emfa okyɛ, bɔ ákesuul ndɛ tsɛtsɛ m’otsɛtsɛ bo nzuru.9.13 Lev 16.15-16; Ɛ̃bv 19.9,17-19 14 Okɛɛn ãndɔɔ ãli m’emfa okyɛ, bvel-bvel Mãsia me nkuul a Ɔ̃fel wu ɔ̃bu nzal a ɔ̃bu, áwi nzuru a ndɛ ola Nziã me ndyam, onge kab li eywɛn a elyal. Obobɔ, ãkel ã ndɛ ãkieel ãsuɔɔl ɛ̃kwal ɛ̃ bia-byɛ m’ɛ̃sal mi ɛ̃biri k’epfu, kwɛn bia-byɛ ekoo k’esa ɔ̃sal a Nziã wa mwiĩ.
15 Obɔ otsɛn bɛn, Mãsia oli Ɔ̃mveel-Ondoo b’alili. Epfu e ndɛ éyi a baal obvuul m’ãbi m’ési bɔ me lio li éli bɔ ke nsɛn ondoo b’ɛ̃kwel. Obobɔ, bɔ b’éti Nziã mbel akoo k’abɔɔ ɔ̃swal wu ɔ̃bu wu éwi Nziã lɔɔ. 16 Ke ngwel wɛ, ŋɛn mbuul okel ɔ̃nkaan ndiri mfungetie kieel wu asiil y’ɔ̃swal a ndɛ, ye k’ewal mfungetie ondɛ ɔ̃swal a ndɛ, obvie kɛn wu ákel ɔ̃nkaan okwi. 17 Ɔ̃nkaan wu esiil mbuul ɛ̃swal akal ye mpɛn kɛn a ŋ’ekwa wu ákel ndɛ. Kɛn a ŋɛn, wu ákel ndɛ kɛn oli mwiĩ, ɔ̃nkaan ondɛ k’akal ye mpɛn wɛ. 18 Obɔ otsɛn bɛn, ondoo b’ɛ̃kwel ále k’ókoo k’okal ye mpɛn wɛ, okɛɛn ãkel k’átsɔɔn wɛ. 19 Ke ngwel wɛ, ŋ’éman Moyize k’atsiɔ baal ndɔɔ bwɛn a ndɔɔ yi etam Ngel osa, ndɛ áwel ãkel ã baan b’angwɛmbɛ, ye b’antab y’ãdza, ánzɔɔ mɔ̃ nkal Ɔ̃nkaan ye baal bueel, me nkuul a epuun bvi edzɔpe, y’ekɔ ki lɛ̃ ki bɛ. 20 Obobɔ, ndɛ áyɛɛn ndiri: «Mã ãkel m’ondoo b’etam Nziã byɛ olweel9.20 Opa 24.6-8.» 21 Emfa ngemɔ̃ hɛ̃, Moyize ánzɔɔ ãkel omɔ̃ me sɛɛ y’eluɔ bvieel bvi ákesal me bvɛ me ndɔɔ yi abuɛɛn Nziã9.21 Lev 8.15. 22 Ke ngwel wɛ, m’emfa ki etam Ngel, mbiin yueel ambaal yɔ m’ãkel. Okɛɛn ãkel k’ãtsɔɔn wɛ, odzeel hɛ̃ k’oli wɛ9.22 Lev 17.11.
23 Obobɔ, eluɔ bvi eli edzel-a-dzel e bvi eli ke ywel, ákesuul bvɛ tsɛtsɛ m’ɛ̃kiri omyɛ̃. Emfa kiki hɛ̃ ebvaan kwɛn eluɔ bvam bvi eli ke ywel ekal tsɛtsɛ m’ãmpɔɔ m’ãnduru ɔ̃bvɛn. 24 Ke ngwel wɛ, Mãsia k’ásam onse mboo yi ɔ̃nsensal yi ási me mviɔɔl ɛ̃ baal wɛ, yi éli kɛn edzel-a-dzel e yɔ-a-yɔ. Kɛn a ndɛ ásam ywel lam, me ndɔɔ yi atɛɛn meba ke nkwel a Nziã me ndɔɔ a bia-byɛ. 25 Ngaa-a-Nziã wu ɔ̃nɛn ákesam mvel bwɛn mvel onse mboo yi enduru ɔ̃nsensal y’ãkel m’anyam. Kɛn a Mãsia K’asam onse yɔ me ndɔɔ yi awa nzuru a ndɛ me ndyam onge kab nsa bibi wɛ. 26 Okɛɛn ale k’obobɔ wɛ, kɛn Mãsia ákaamwɛn fool nsa bibi fa obɛɛn b’ɔ̃kiri. Kɛn a meba, me lio li ntɔ, ndɛ omɔɔn sa kɛn a ngemɔ̃, me ndɔɔ yi ambaal ãbi ã baal me kab e ndɛ. 27 Mbuul ndyam wueel ebvaan akwa sa ngemɔ̃, ke mbee oŋɔ̃, ndɛ abwel k’otsiil b’etsiil Nziã ãndɔɔ ã baal. 28 Emfa kiki hɛ̃, Mãsia áwi nzuru a ndɛ me ndyam onge kab me ndɔɔ yi ambaal ãbi m’ɔ̃bɔbɔ a baal. Ndɛ akieel amɔɔn li nsa yuaal, ke me ndɔɔ obi wɛ, kɛn a me ndɔɔ yi abvuul b’abekiaal ndɛ.9.28 Edz 53.12
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)