1 Ŋ’embal Yeso oŋɔ̃, ndɛ oyɛn k’etswi e nsie ki Yude bvool oyɛn ongwel a nzal yi Dzolodɛ̃. Embuul bvool eyedzii ndɛ, ndɛ bu abvi bɔ oyiool onge b’ebesa ndɛ tsɔɔn. 2 Afalisaye ke kwɛ asyel tsotsoo a ndɛ, me ndɔɔ yi aywiin ndɛ bɛɛ m’ɔ̃mfuul wu: «Ngel a bia-byɛ ewa bɔɔl nkuul yi abee ɔ̃kal a ndɛ?» 3 Yeso obveel bɔ m’ɔ̃mfuul wu: «Ngel yi éwi Moyize byɛ mã?» 4 Bɔ ayɛɛn bubu: «Moyize áwi ngel yɛn bɔɔl m’obee b’ɔ̃kal obvie owi ndɛ ɔ̃nkaan wu okwa o bal, me ndɔɔ yi ambaal ndɛ ke bal.» 5 Obobɔ, Yeso olieel bɔ bubu: «Okɛɛn Moyize ákel byɛ ngel oyɔ, eli me ndɔɔ ɛ̃tswɛ mpɛn ɛ̃ byɛ. 6 Kɛn a k’obɛɛn, ŋ’ési Nziã ɔ̃nkiri, "ndɛ ási bɔ bɔɔl y’ɔ̃kaal." 7 "Obɔ otsɛn bɛn bɔɔl akieel ambal ola tal ye ngoo a ndɛ, me ndɔɔ yi akuru nzruru m’ɔ̃kal a ndɛ, 8 obobɔ, bɔ ange-buaal akal nzuru ngamɔ̃." M’emfa okyɛ, bɔ k’abekal baal buaal wɛ, ayii onge mbuul ngɔmɔ̃. 9 Oŋɔ̃ yɔɔl kwɛn b’ebvool Nziã, mbuul abee bɔ otsal.»

10 Ŋ’etɔ bɔ nzɔ, ayio bvool afuul Yeso ɛ̃mfuul me ndɔɔ a ndɔɔ oyɔ. 11 Ndɛ obveel bɔ bubu: «Ŋɛn mbuul obee ɔ̃kal a ndɛ bvool oyebaal ɔ̃kal ɔ̃nkyam, ndɛ ŋ’afel ngel a bal ol’ɔ̃kal wu ɛ̃kwel. 12 Emfa kiki hɛ̃, ŋɛn ɔ̃kaal obee ɔ̃lam a ndɛ bvool oyebaal ɔ̃lam ɔ̃nkyam, ndɛ ŋ’afel ngel a bal.»

13 Baal abiri baan b’atsi-atsi ola Yeso, me ndɔɔ yɛn ndɛ andɔɔl bɔ kuɔɔl, kɛn ayio ayiaan baal obɔ. 14 Ŋ’emwɛn Yeso obobɔ, ndɛ oyoo nkiee, bu alieel bɔ bubu: «Eyɔɔl baan b’atsi-atsi aya ola mɛ̃, ebee bɔ nkuul okii, ke ngwel wɛ Okwɛn o Nziã oli bo baal b’ali onge bɔ. 15 Taa-taa bam, mɛ̃ eyɛɛn byɛ wɛn, mbuul okɛɛn k’ayɔɔ Okwɛn o Nziã onge muaan wu ɔ̃tsi-ɔ̃tsi wɛ, k’àsam bɔ bam wɛ.» 16 Ke mbee oŋɔ̃, Yeso obuun baan onse mviɔɔl ɛ̃ ndɛ, ondɔɔl bɔ kuɔɔl m’osɔɔ ola Nziã k’asa bɔ ongesɛ.

17 Me lio lɛn Yeso oyii otwal nkuul yi ayi, bɔɔl ngelemɔ̃ eyi me ntiin, bu ebvi ãbuo ke nkwel a ndɛ, me ndɔɔ yi afuul ndɛ ndiri: «Ɔ̃tee wu ɔ̃mvɛ, ki esa mɛ̃ emã me ndɔɔ yi ebɔɔ elaã li ɔ̃bu nkal ɔ̃bu?» 18 Yeso obveel ndɛ bubu: «Ndɔɔ mã yi eta yɛ mɛ̃ wɛn mbuul wu ɔ̃bvɛ? Mbuul wu ɔ̃bvɛ k’ali wɛ, wu ɔ̃mvɛ kɛn a Nziã ndyam. 19 Yɛ ndoo yɛɛ ãngel mã: "Oyɛɛ ke bam mbuul wɛ. Oyɛɛ ke dzuu y’ɔ̃kal wuo y’ɔ̃lam a mbuul wɛ. Oyɛɛ ke turu eluɔ e mbuul wɛ. Oyɛɛ ke buru mbuul ndɔɔ wɛ. Oyɛɛ ke sa mbuul obi wɛ. Lweel tal ye ngoo a yɛ."» 20 Mbuul ondɛ obveel ndiri: «Ɔ̃tee, mɛ̃ ebekiaal ãngel omɔ̃ mbueel fa obwee o mɛ̃.» 21 Yeso otal ndɛ ye dzii lueel, bu alieel ndɛ bubu: «Eywɛn yɛ ndɔɔ ngamɔ̃: Yi, tiɔ eluɔ bvieel bvi eli a yɛ bvool wa nzi oyɔ aywal, obobɔ yɛ abɔɔ opfel ke ywel. Ke mbee oŋɔ̃, ya bvool nɔɔ̃n a mɛ̃.» 22 Kɛn a ŋ’eyoo mbuul ondɛ obobɔ, ndɛ mwiil ãpiin, bu ayɛn y’ãwua bibi, ke ngwel wɛ ndɛ áli y’obɔɔ bibi. 23 Yeso otal ngwel-a-ngwel, bu alieel ayio a ndɛ ndiri: «Eli ye fool me b’ali y’opfel k’asam onse Okwɛn o Nziã!» 24 Ayio ebaangɛ ebɔɔ ŋ’eyoo bɔ ãyɛɛn omɔ̃. Kɛn a Yeso bvool olieel bɔ bubu: «Baan a mɛ̃, eli ye fool m’osam onse Okwɛn o Nziã! 25 Eli ye fool kwɛn nyam wu ɔ̃mbiri ãpfuũ wu ata me swamo abwel onse pfee e nyuɔ̃. Kɛn osam b’ɔ̃pfel Okwɛn o Nziã, oyɔ ndɔɔ yi enduru fool yam.» 26 Ayio bvool ebaangɛ bu elɔɔ, bɔ bu abvi ofuul bam-a-bam ndiri: «Ke m’emfa okyɛ, wɛn ol’obvuul nã?» 27 Yeso otal bɔ bvool olieel bɔ bubu: «Ãndɔɔ mɛn baal k’akoo k’asa wɛ, Nziã asa mɔ̃, ke ngwel wɛ Nziã yi akwɛɛn pyɛ.» 28 Obobɔ, Piɛɛl olieel ndɛ bubu: «Meyoo! Bee bam esiil eluɔ bvieel, me ndɔɔ yi eluɛɛn a yɛ.» 29 Yeso obveel bubu: «Taa-taa bam, mɛ̃ eyɛɛn byɛ wɛn, mbuul wueel wɛn me ndɔɔ a mɛ̃ bvool me ndɔɔ a Nsia yi Ngesɛ, osiil nzɔ a ndɛ, baan-ngoo a ndɛ b’abɔɔl ye b’akaal, ngoo a ndɛ, tal a ndɛ, baan a ndɛ, ãnguun ã ndɛ, 30 ndɛ akieel abɔɔ me lio li, nsa ɔ̃nkam (100), ãnzɔ, baan-ngoo b’abɔɔl ye b’akaal, angoo, baan, y’ãnguun, y’omwɛn o fool hɛ̃, me ndɔɔ a mɛ̃. Onse ɔ̃kiri wu aya, ndɛ akieel abɔɔ elaã li ɔ̃bu. 31 Baal bibi ba nkwel akieel akal ba mbee, bvool baal bibi ba mbee akieel akal ba nkwel.»

32 Ŋ’éli bɔ me nkuul k’abeyi Yelusalem, Yeso ákedzuu ke nkwel a bɔ. Ayio áli y’ãwua bvool b’ákeyi bɔ osuul áli ye buɔ. Yeso bvool obiri antam ange-kuun ye buaal me pyɛ, bu abvi bɔ ãndɔɔ m’ãyeya me ndɛ oliaal. 33 Ndɛ olieel bɔ bubu: «Eyoo! Bia-byɛ ŋ’ebeyi Yelusalem, okɔ àtiɔ Muaan a mbuul m’amfam b’angaa-a- Nziã y’ayiool b’ãngel. Bɔ àwa ndɛ etumbu ki epfu bvool àtiɔ ndɛ me mviɔɔl ɛ̃ baal b’ɛ̃kiri ɛ̃kyam. 34 Bɔ àsɔɔl ndɛ, àfaan ndɛ ãtɛɛ, àbɛɛl ndɛ asikɔrɔ bvool àbam ndɛ. Kɛn a me tsoo li ãtyel, ndɛ àsiool onse b’ákwi-ákwi.»

35 Obobɔ, Dzak ye Dzaã, baan a Dzebede ayi tsotsoo a Yeso. Bɔ alieel ndɛ bubu: «Ɔ̃tee, bee edzii kwɛn yɛ sa bee ndɔɔ yi èsɔɔ bee yɛ.» 36 Yeso ofuul bɔ bubu: «Ki edzii byɛ kwɛn me nsa byɛ emã?» 37 Bɔ abveel ndɛ ndiri: «Me lio li ekieel èkal yɛ onse lweel e yɛ, suul kwɛn bee ebva nsɛn tsotsoo a yɛ, wɛn me nkuɔɔl e yɛ ki elam, wɛn me ki ekal.» 38 Kɛn a Yeso oyɛɛn bɔ ndiri: «Byɛ k’eyɛɛ ndɔɔ yi esɔɔ byɛ wɛ. Byɛ ekoo m’onywa mbiɔ yi fool yi èyenywa mɛ̃? Byɛ ekoo k’ewal opongo b’èyewal mɛ̃?» 39 Bɔ abveel ndɛ ndiri: «Bee ol’ekoo.» Yeso olieel bɔ bubu: «Byɛ ènywa mbiɔ yi fool yi ènywa mɛ̃ ndyam, bvool byɛ èwal opongo b’èwal mɛ̃. 40 Kɛn a me b’otal obva o nsɛn me kuɔɔl e mɛ̃ ki elam wuo ki ekal, wu atsiil ndɔɔ oyɔ ke mɛ̃ wɛ, ãmboo omɔ̃ ãli mã baal b’éyɛɛl Nziã bɔ mɔ̃.» 41 Ŋ’eyoo ayio kuun b’asiil ãndɔɔ omɔ̃, bɔ ayoo nkyee ye Dzak bwɛn a Dzaã. 42 Obobɔ, Yeso oti bɔ mbel, bu alieel bɔ bubu: «Byɛ eyɛɛ kwɛn, b’ebewal baal onge amfam b’ɛ̃kiri atuaal baal a bɔ mpal, baal b’anɛn hɛ̃ abenyam ɛ̃kiri ɛ̃ bɔ m’onyam. 43 Kɛn a yɔɔl kwɛn ebee obobɔ okal onse byɛ. Mbuul wu odzii k’anduru bakyɛ onse byɛ, àkal ɔ̃sal a byɛ. 44 Bvool mbuul wu odzii k’akal wu ɛ̃kwel onse byɛ, àkal ɔ̃nkyal a byɛ. 45 Ke ngwel wɛ, Muaan a mbuul k’ayi me ndɔɔ yɛn baal asal me ndɔɔ a ndɛ wɛ, ndɛ oyi me ndɔɔ yi asal me ndɔɔ a baal bvool me ndɔɔ yi awa elaã e ndɛ onge ɔ̃bvɛn wu afuru, me ndɔɔ yi abvuul ɔ̃bɔbɔ a baal.»

46 Yeso y’ayio a ndɛ atɔ bviil li Yeliko. Ŋ’epal bɔ onse bviil olɔ y’embuul e baal bibi, ɔ̃nkwa-mviil ngɔmɔ̃ wɛn nkuũ Baatime, wu muaan a Time, áli me nsɛn nku-a-nku a nkuul, me ndɔɔ yi abelaa eluɔ. 47 Ŋ’eyoo ndɛ ndiri wu abebwel eli Yeso wa Nadzalet, ndɛ obvi obiool bubu: «Yeso, Muaan a David, sio mɛ̃ nyiĩ!» 48 Kɛn a baal bibi abvi ndɛ opɛɛn ndiri: «Suul nkyal!» Kɛn a ndɛ obiool bam kokɔ ndiri: «Muaan a David, sio mɛ̃ nyiĩ!» 49 Yeso otɛɛn, bu alieel bubu: «Eta ndɛ mbel!» Baal ati ɔ̃nkwa-mviil mbel ndiri: «Sa mpɛn, tɛɛn, ndɛ oti yɛ mbel!» 50 Obobɔ, ndɛ oti kazaka o ndɛ pfɛɛ, obiri kab, bu ayɛn ola Yeso. 51 Yeso ofuul ndɛ bubu: «Ndɔɔ mã y’edzii yɛ kwɛn mɛ̃ nsa yɛ?» Ɔ̃nkwa-mviil obveel ndɛ bubu: «Ɔ̃tee, sa kwɛn mɛ̃ bvool mwɛn.» 52 Yeso olieel ndɛ bubu: «Yi, okiool o yɛ obvuul yɛ!» Kɛn alili oŋɔ̃, ɔ̃nkwa-mviil obvi omwɛn bvool, ndɛ bu abvi Yeso oluɛɛn me nkuul.