1 Al'emeesiil ãtsoo mbuaal m'abɛɛl pfuun li Onduru bvool li amãmpa bɛn k'ali ye libviil wɛ. Amfam b'angaa-a-Nziã y'ayiool b'ãngel ákebii mpwee yi asiin Yeso m'ãyal, me ndɔɔ yi abam ndɛ. 2 Ke ngwel wɛ, bɔ ákeyɛɛn bam-a-bam ndiri: «Bia-byɛ ebee ndɛ osiin onse pfuun, kwɛn oŋɔ̃ tsungaa abee onse baal obva.»

3 Yeso áli k'ola bo Betani, onse nzɔ a Simɔ̃ wɛn tsɔɔn áli y'ãlu me leba. Me lio li ékedza ndɛ, ɔ̃kaal ngɔmɔ̃ osam y'ɔ̃langa wu alebat wu áluul m'ãnãsi mã nzi bibi mã naad m'ãywɛn a ɔ̃mfee. Ndɛ odzweel ɔ̃langa, bu ayiri ãnãsi nkal ɔ̃tswɛ a Yeso. 4 Baal bakyɛ onse b'áli oŋɔ̃ ayoo nkie bvool ayɛɛn bam-a-bam ndiri: «Ndɔɔ mã yi abɔɔ̃ ãnãsi m'emfa ki? 5 Al'ekoo k'etiɔ mɔ̃ me nzi yi ãbvieel onse ab'ɛ̃kam-ɛ̃tyel (300), kwɛn ewa yɔ aywal!» Bɔ bu ayi mpuru y'ɔ̃kaal ondɛ. 6 Kɛn a Yeso olieel bubu: «Eyɔɔl ndɛ akal pi! Nkyal yi esa byɛ ndɛ yi emã? Yi esi ndɛ me ndɔɔ a mɛ̃ eli ndɔɔ yi mvɛ. 7 Ke ngwel wɛ, aywal, byɛ ekal ye bɔ lio lueel, bvool byɛ ekoo k'esa bɔ obvɛ lio lam lueel li edzii byɛ. Kɛn a mɛ̃, byɛ k'èkal ye mɛ̃ lio lueel wɛ. 8 Ndɛ osi ndɔɔ yi ekoo ndɛ osa. Ndɛ ofaal nzuru a mɛ̃ nkwel, ŋ'eyiri ndɛ yɔ ãnasi me ndɔɔ odziool o yɔ. 9 Taa-taa bam, mɛ̃ eyɛɛn byɛ wɛn, mboo yam yueel yi akieel atsal Nsia yi Ngesɛ m'ɔ̃kiri ndyam wueel, akieel ayɛɛn hɛ̃ me ndɔɔ yi esi ɔ̃kaal wu, me ndɔɔ yi atsam ndɛ.»

10 Yuda Isikaliot wu áli ngɔmɔ̃ onse antam kuun ye buaal oyebɔɔ amfam b'angaa-a-Nziã, me ndɔɔ yi atiɔ bɔ Yeso. 11 Ŋ'eyoo bɔ obobɔ, bɔ asia mpaa, bu alieel ndiri bɔ àwa ndɛ nzi. Obobɔ, Yuda bu ayii abii mpwee yi ngesɛ yi etiɔ ndɛ bɔ Yeso.

12 Tsoo li ɛ̃kwel li Pfuun li amampa bɛn k'ali ye lebviil wɛ, tsoo li abam emɛmɛɛ̃ me ndɔɔ a bvi-odza bvi pfuun li Onduru, ayio a Yeso afuul ndɛ bubu: «Yɛ dzii kwɛn bee eyeyɛɛl yɛ ɔ̃laan wa pfuun li Onduru kwɛn?» 13 Yeso bu ayuɔɔl buaal onse ayio a ndɛ ndiri: «Eyi onse bviil li ke nkwel li, mbuul ngɔmɔ̃ wu obiri mbuu a ãdza ayemwɛɛn ye byɛ. Enɔɔn a ndɛ. 14 Me lio li èsam ndɛ onse nzɔ ngamɔ̃, eyɛɛn nga-yɔ wɛn: "Ɔ̃tee otam bee yɛ ofuul ndiri: Etswi e nzɔ ki èyedza mɛ̃ pfuun li Onduru y'ayio a mɛ̃ kyɛn?" 15 Obobɔ, ndɛ àsuo byɛ etswi e nzɔ ki ywel ki enɛn ki amaayɛɛl. Oyɔ mboo yi èwal byɛ ɔ̃yɛɛl wa pfuun.» 16 Ayio ayɛn, bɔ atɔ bviil, amwɛn ãndɔɔ kɛn a m'emfa ki elieel Yeso bɔ. Bɔ bu awel ɔ̃yɛɛl wa pfuun li Onduru.

17 Ŋ'etɔ ãnkukwal, Yeso oyi y'ayio ange-kuun ye buaal. 18 Me lio li éli bɔ ke misa bvool ákedza, Yeso olieel bubu: «Taa-taa bam, mɛ̃ eyɛɛn byɛ wɛn, ngɔmɔ̃ onse byɛ, wu abedza ye mɛ̃, àtiɔ mɛ̃.» 19 Ayio ãwua ãbɔɔ, bu abvi ofuul me mbuul bwɛn a mbuul ndiri: «Ondɛ ol'ekal mɛ̃?» 20 Yeso obveel bɔ ndiri: «Eli ngɔmɔ̃ onse byɛ b'ayio kuun ye buaal, wu alɔ kuɔɔl onse saan ye mɛ̃. 21 Ke yam, Muaan a Mbuul àkwa onge b'eyɛɛn Ɔ̃nkaan a Nziã, kɛn ãwua mã bibi me ndɛ ondɛ wu atiɔ Muaan a Mbuul! Ngesɛ ákaabee mbuul ondɛ oburu!»

22 Ŋ'eyii edza bɔ, Yeso owel mampa, obveel Nziã ãtuɛɛn, otsiil ndɛ, owi ayio ndɛ ye y'ãyɛɛn m'ɔ̃nywa ndiri: «Ewal, yi-bu nzuru a mɛ̃.» 23 Ke mbee oŋɔ̃, ndɛ owel bvool mbiɔ a mbal ã bvine, obveel Nziã ãtuɛɛn, owi ayio yɔ, bɔ bueel bu anywi mɔ̃. 24 Ndɛ olieel bɔ bubu: «Mã-bu ãkel ã mɛ̃, ãkel m'ondoo, m'ãtsɔɔn me ndɔɔ ɔ̃bobɔ a baal. 25 Taa-taa bam, mɛ̃ eyɛɛn byɛ wɛn, mɛ̃ bvool kieel k'ebenywa mbal ã bvine wɛ tiil tsoo li ekieel enywa mɛ̃ mɔ̃ m'ãlili onse Okwɛn o Nziã.» 26 Ke mbee a ŋ'eyam bɔ ãnziĩ, bɔ apal, bu ayɛn sua nkio a ɛ̃ti mi Olibve.

27 Yeso olieel ayio bubu: «M'ã̀ya me mɛ̃, ã̀nziool byɛ bueel onse okiool. Ke ngwel wɛ, ákel bubu: "Mɛ̃ èbɛɛl ɔ̃mbuaal-anyam, ɔ̃kel wu emɛmɛɛ̃ àtsɔɔn". 28 Kɛn a ke mbee osiool o mɛ̃, mɛ̃ ètsɔɔn nkwel a byɛ ke Ngalile.» 29 Piɛɛl abvuru oyɛɛn, olieel ndɛ bubu: «Onkyam ŋɛn m'ã̀ya me yɛ anziool bakyɛ bueel, mɔ̃ k'ãnziool mɛ̃ ndyam wɛ!» 30 Yeso bu abveel ndɛ ndiri: «Taa-taa bam, mɛ̃ eyɛɛn yɛ wɛ, kɛn a me tsia wu, ye k'ekuaal nswee nsa yuaal, yɛ ndyam àtwɛn nsa tyel wɛn yɛ ke yɛɛ mɛ̃ wɛ.» 31 Kɛn a Piɛɛl opio ɔ̃liɛɛn ndiri: «Onkyam ŋɛn ebvaan mɛ̃ ekwa ye yɛ, mɛ̃ k'ekoo k'etwɛn wɛ wɛn mɛ̃ ke ngyɛɛ yɛ wɛ!» Obobɔ, ayio bueel ayɛɛn kɛn ɔ̃nywã ngɔmɔ̃.

32 Bɔ atɔ ke mboo ngamɔ̃ yi abeta me Ngetesemane. Yeso bu alieel ayio ndiri: «Ebva nsɛn ŋã, me lio li èyebuɛɛn mɛ̃.» 33 Ndɛ obiri Piɛɛl, ye Dzak, ye Dzaã. Ndɛ obvi buɔ y'ãwua oyoo. 34 Ndɛ olieel bɔ bubu: «Mɛ̃ eyoo ãwua m'ãbiri mɛ̃ k'epfu. Esiil ŋã, ekal angɔ-mwiĩ!» 35 Ndɛ osyel muaan-lala, otyel nzuru me nsie, bu abuɛɛn me ndɔɔ yɛn, okɛɛn ndɔɔ yɛn akoo k'asa, Nziã asa kwɛn lio li fool olɔ esyal lala ye ndɛ. 36 Ndɛ oyɛɛn bubu: «Aba, Taal yɛ koo k'asa mbueel. Siaal mbiɔ yi lala ye mɛ̃. Kɛn a yɔɔl kwɛn yɛ bee be nzii mɛ̃ ndyam osa, yɛ sa b'edzii yɛ ndyam.» 37 Ke mbee oŋɔ̃, ndɛ okɔɔl ola ayio ange-atyel, oyebɔɔ bɔ amaayiool me twa. Ndɛ bu alieel Piɛɛl ndiri: «Simɔ̃, yɛ laal twal! Yɛ ke man k'akal ngɔ-mwiĩ si ekal lio ngelemɔ̃ wɛ! 38 Ekal angɔ-mwiĩ bvool ebuɛɛn, kwɛn byɛ ebee m'ɔ̃mbio obva. Ɔ̃fel oli ye mpɛn, kɛn a nzuru eli y'okwal.»

39 Ndɛ bvool osyel muaan-lala, bu abuɛɛn m'ãyɛɛn amamã. 40 Ndɛ okɔɔl bvool ol'ayio, bvool oyebɔɔ bɔ amaayiool me twal, ke ngwel wɛ bɔ mviil ãl'ãyii y'olyam. Bɔ k'abɔɔ ndɔɔ yi abveel ndɛ wɛ. 41 Ŋ'ekɔɔl ndɛ li nsa tyel, ndɛ olieel bɔ bubu: «Byɛ kɛn ebelaal twal bvool ebewuun! Ŋ'ɔ̃fi. Lio ekoo. Meba ŋã, atiɔ Muaan a Mbuul me mviɔɔl mi anga-ãbi. 42 Etɛɛn, bia-byɛ eyi! Mbuul wu àtiɔ mɛ̃ oyii tsotsoo!»

43 Ŋ'ékeyɛɛn Yeso kɛn ãndɔɔ omɔ̃, Yuda wu áli ngɔmɔ̃ onse ayio kuun ye buaal opal oŋɔ̃. Ndɛ áli y'embuul e baal b'ábiri epwel y'ɛ̃mpaã. B'áyuɔɔl baal obɔ éli amfam b'anga-a-Nziã, y'ayiool b'ãngel, y'akuul-kuul. 44 Yuda wu àtiɔ Yeso al'amaaliaal baal obɔ eliĩ ki èsa ndɛ, ndiri: «Mbuul wu èbuun mɛ̃, ndɛ ondɛ, esiin ndɛ, ebiri ndɛ bvool ekyab ndɛ ngesɛ.» 45 Tswa-a-tswa oŋɔ̃, Yuda osyel tsotsoo a Yeso, bu alieel ndɛ bubu: «Ɔ̃tee, enswɛɛn obɔ!» Ndɛ bu abuun Yeso. 46 Obobɔ, bɔ asiin Yeso, bu akuru ndɛ. 47 Kɛn a ngɔmɔ̃ onse b'áli ye Yeso, ayɔɔ epwel, opfel ɔ̃sal a nga-a-Nziã wu ɔ̃nɛn kyɛ, bu atsɔɔ ndɛ tswi. 48 Yeso olieel bɔ bubu: «Byɛ mɛ̃ onge edzuul ewal, kwɛn byɛ eya ola mɛ̃ y'epwel y'ɛ̃mpaã me ndɔɔ yi esiin mɛ̃? 49 Ãtsoo mbueel mɛ̃ eli ye byɛ bvool ekeyiool onse Nzɔ a Nziã, byɛ k'eyesiin mɛ̃ wɛ. Kɛn ãndɔɔ mã ãbwel, me ndɔɔ yɛn asa m'ákel.» 50 Obobɔ, ayio bueel ayiri ndɛ, bu abal. 51 Nsam a bɔɔl ngamɔ̃ ékenɔɔn a Yeso. Ndɛ álaal kɛn emputa me nzuru. Asiin ndɛ, 52 kɛn a ndɛ oyiri emputa, bu abal odzuũ-odzuũ.

53 Baal b'ásiin Yeso abiri ndɛ ola nga-a-Nziã wu ɔ̃nɛn. Amfam b'anga-a-Nziã bueel, y'aku-kuul, y'ayiool b'ãngel abvɔɔn okɔ. 54 Piɛɛl ákeluɛɛn a Yeso lala tiil ekɔ e nzɔ a nga-a-Nziã wu ɔ̃nɛn. Ndɛ osam onse mwiĩ a kyɛ bu abvi nsɛn y'ankiaal a kyɛ bvool ákeywal mbaa. 55 Amfam b'anga-a-Nziã ye mbal yi nɛn yi Ayuda yueel ákebii elyal ki afɛn Yeso kwɛn awa ndɛ etumbu ki epfu, kɛn a bɔ k'abɔɔ kyɛ wɛ. 56 Ke ngwel wɛ, baal bibi akeya ndɛ ãndɔɔ oburu, kɛn a bɔ k'áli ɔ̃nywa ngɔmɔ̃ wɛ onse ãyɛɛn ã bɔ. 57 Baal ke kwɛ atɛɛn, bu ani ndɛ pfya bubu: 58 «Bee eyoo ndɛ ayɛɛn ndiri: "Mɛ̃ etsal Nzɔ a Nziã yi àtuu me mviɔɔl ɛ̃ baal yi, bvool m'ãtsoo ã tyel, mɛ̃ ètuu kyam yɛn k'ekal yi etuu mviɔɔl ɛ̃ baal wɛ."» 59 Onkyam bɔ obɔ hɛ̃ k'áli ɔ̃nywã ngɔmɔ̃ me ndɔɔ oyɔ wɛ. 60 Obobɔ, nga-a-Nziã wu ɔ̃nɛn otɛɛn kal-a-kal a baal bu afuul Yeso ndiri: «Yɛ yi abveel pyɛ? B'eyɛɛ yɛ omã m'ãbuu m'eliaal baal ba me ndɔɔ a yɛ?» 61 Kɛn a Yeso owuun pi. Nga-a-Nziã wu ɔ̃nɛn bvool ofuul ndɛ ndiri: «Yɛ Mãsia wu Muaan a Nziã wu ebelweel bee li?» 62 Yeso obveel ndɛ bubu: «Hɛ̃, mɛ̃ ndɛ ndi, bvool byɛ kieel emwɛn Muaan a Mbuul me nsɛn me kuɔɔl ki elam Nziã Nga-Waan, byɛ hɛ̃ emwɛn k'eya ndɛ kal-a-kal epɛn ke ywel.» 63 Obobɔ, nga-a-Nziã wu ɔ̃nɛn okɔɔl ekɔ bvool olieel ndiri: «Bia-byɛ bvool k'eli ye kɔɔ li atsweel b'ayeyɛɛn bia-byɛ ãndɔɔ mã wɛ, 64 nzal-a-ŋɛn byam eyoo k'esiaan ndɛ Nziã. Byɛ ekuru omã? Bɔ bueel abweel Yeso ɔ̃dzoo, bu akuru kwɛn ndɛ ebvaan akwa.» 65 Baal ke kwɛ onse bɔ abvi ndɛ ãntɛɛ ofaan, bɔ afoo ndɛ osu, apfel ndɛ ɛ̃nkwaã, bu alieel ndɛ ndiri: «Oŋɔ̃ ta bvua, wu obɛɛl yɛ nã!» Ankiaal awel ndɛ, bu anaã ndɛ ãmpaa.

66 Ŋ'esa oŋɔ̃, Piɛɛl kɛn áli ke nsie onse ekɔɔ. Ɔ̃sal ngɔmɔ̃ wu ɔ̃kaal, wu a nga-a-Nziã wu ɔ̃nɛn oyi oŋɔ̃. 67 Ŋ'emwɛn ndɛ Piɛɛl wu akeywa mbaa, ndɛ otal ndɛ ngesɛ, bu olieel ndɛ ndiri: «Yɛ hɛ̃, yɛ áli ye Yeso wu ɔ̃fi-Nadzalet.» 68 Kɛn a Piɛɛl otwɛn ndiri: «Mɛ̃ ke ngyɛɛ wɛ, mɛ̃ k'ebɔɔ b'eyɛɛn yɛ otsɛn wɛ.» Ndɛ wu Piɛɛl opal k'ɔ̃nywa wu ekɔɔ, nswee bu akueel. 69 Ŋ'emwɛn ɔ̃sal wu ɔ̃kaal ndɛ oŋɔ̃, ndɛ bvool olieel b'ali oŋɔ̃ ndiri: «Mbuul wu oli ngɔmɔ̃ onse baal a Yeso!» 70 Piɛɛl bvool otwɛn ãyɛɛn omɔ̃. Oyiil wɛ, b'áli oŋɔ̃ bvool alieel ndɛ ndiri: «Ngwanyã, yɛ hɛ̃ li ngɔmɔ̃ onse baal obɔ, ke ngwel wɛ, yɛ hɛ̃ li ɔ̃fi-Ngalile!» 71 Oŋɔ̃, Piɛɛl bu abvi obiool ndiri: «Yɔɔl Nziã awa mɛ̃ etumbu okɛɛn mɛ̃ epfuru! Mɛ̃ ndab ɔ̃kyel wɛn mɛ̃ ke ngyɛɛ mbuul wu ebeyɛɛn byɛ ondɛ wɛ.» 72 Kɛn alili oŋɔ̃, nswee okueel li nsa yuaal. Piɛɛl bu ayeel ãyɛɛn m'élieel Yeso ndɛ ndiri: «Ye k'ekuaal tswee nsa yuaal, yɛ atwɛn nsa tyel wɛn yɛ ke yɛɛ mɛ̃ wɛ.» Ndɛ bu abvi elel obool.