1 Ŋ'eyii ebiɔɔn bɔ Yelusalem, tsotsoo ola bo Betefadzwe ye bo Betani sua nkio a ɛ̃ti mi Olibve, Yeso oyuɔɔl baal buaal onse ayio a ndɛ, 2 ndiri: «Eyi onse ola b'oli ke nkwel a byɛ ba. Kɛn a ŋ'èsam byɛ onse bɔ, byɛ èmwɛn muaan a nyam wu ata me ane wu akuru me swɛ wɛn mbuul lɔɔ-okal kɛn anɔɔn nkal a ndɛ wɛ. Enyiɔɔn ndɛ, eya ye ndɛ. 3 Okɛɛn mbuul ofuul byɛ ndiri: "Otsɛn omã b'esa byɛ obobɔ?", eliaal ndɛ wɛn: "Mfam oli ye kɔɔ e ndɛ, obobɔ ndɛ àyuɔɔl ndɛ ŋã alili oŋɔ̃."» 4 Ayio bu ayɛn. Bɔ amwɛn muaan a ane onkwel-a-nzi m'okuru tsotsoo ɔ̃nywã a nzɔ ngamɔ̃. Bɔ bu anyiɔɔn ndɛ. 5 Baal ke kwɛ onse b'áli oŋɔ̃ afuul bɔ ndiri: «Byɛ emã ebesa? Otsɛn omã b'enyiɔɔn byɛ muaan a ane ondɛ?» 6 Bɔ abveel onge b'élieel Yeso, obobɔ ayɔɔl bɔ ayɛn. 7 Bɔ abiri muaan a ane ola Yeso, andɔɔl ɛ̃nkuru ɛ̃ bɔ nkal ɔ̃nguo a ndɛ. Yeso bu anɔɔn nkal a ndɛ. 8 Baal bibi ayel ekɔ e bɔ nkal a nkuul, bvool bakyɛ ayel nsuɛɛn yi ãba yi etsiil bɔ onse ãnguun. 9 Baal b'ákedzuu ke nkwel a Yeso ye b'ákenɔɔn a ndɛ ákebiool bubu:

«Odzana!

Yɔɔl kwɛn wu aya me nkuũ a Mfam akal y'ondɔɔl o kuɔɔl!

10 Yɔɔl kwɛn Nziã andɔɔl okwɛn b'oya kuɔɔl,

okwɛn o David wu nkiɔɔn a bia-byɛ!

Odzana ola Nziã wa ke ywel!»

11 Yeso osam Yelusalem, bu ayɛn Nzɔ a Nziã. Ke mbee a ŋ'etal ndɛ mbueel m'ákebwel onse oŋɔ̃, ndɛ opal, bu ayɛn Betani y'ayio ange-kuun ye buaal, ke ngwel wɛ tal al'emeyel.

12 Ela esiool, me lio li eyii epal bɔ onse Betani, Yeso eyoo nzal. 13 Ndɛ otaal ɔ̃ti wa fig lala y'ãsɔɔ̃. Ndɛ bu ayɛn ayetal owɛɛl ndɛ oli ye nsia, kɛn a ŋ'etɔ ndɛ tsotsoo ɔ̃ti, ndɛ omwɛn kɛn ãsɔɔ̃, ke ngwel wɛ, k'éli ɔ̃bvu wu afig wɛ. 14 Obobɔ Yeso olieel ɔ̃ti wa fig bubu: «Mbuul bvool wu abedza nsia e yɛ pyɛ!» Ayio a ndɛ ayoo ãyɛɛn omɔ̃.

15 Bɔ atɔ Yelusalem. Yeso osam onse Nzɔ a Nziã, bu abvi baal b'áketiɔ ye b'ákesuun otswɛɛl onse okɔ. Ndɛ otsal amisa a b'ákeswɛɛl nzi y'ãkiri ã b'áketiɔ ãkuun, 16 bvool ndɛ k'awi nkuul kwɛn mbuul apal y'eluɔ si ngemɔ̃ onse Nzɔ̃ a Nziã wɛ. 17 Ke mbee oŋɔ̃, ndɛ oyiool bɔ bubu: «Onse Ɔ̃nkaan a Nziã, Nziã oyɛɛn bubu: " Nzɔ a mɛ̃, àta yɔ me nzɔ a ãbuɛɛn me ndɔɔ ãyam mbueel." Kɛn a byɛ, byɛ emeekaal yɔ eyii mboo yi edziɔɔn anga-pfuul!» 18 Anga-a-Nziã b'anɛn y'ayiool b'ãngel ayoo ãndɔɔ omɔ̃ bvool ayii abii ãyal m'abam ndɛ, me ndɔɔ yɛn bɔ áli ye buɔ o ndɛ, ke ngwel wɛ embuul e baal kieel ékekam m'ãtee ã ndɛ. 19 Ŋ'etɔ ãnkunkwa, Yeso y'ayio a ndɛ apal onse Yelusalem.

20 Epal-e-pal, ŋ'eyii ebwel ayio m'olɔ, bɔ amwɛn ɔ̃ti wa fig amakɛɛ fa ɛ̃dza ɛ̃ ndɛ. 21 Piɛɛl oyeel ãndɔɔ m'ãbwel, bu alieel Yeso ndiri: «Ɔ̃tee, tal ɔ̃ti wa fig wu ebwel yɛ enkɛɛ wu amaakɛɛ ndyam wueel!» 22 Yeso bu alieel ayio a ndɛ bubu: «Ekal y'okiool me Nziã! 23 Taa-taa bam, mɛ̃ eyɛɛn byɛ wɛn, ŋɛn mbuul olieel nkio yi ndiri: "Mbal oŋɔ̃, yi y'atyal nzuru onse ãdza m'ɔ̃ngwa", bvool okɛɛn ndɛ k'asi enkyam onse ɔ̃kwal a ndɛ wɛ, kɛn a ndɛ okiool ndiri m'eyɛɛn ndɛ, àsa mɔ̃, àsa mɔ̃ hɛ̃ me ndɔɔ a ndɛ. 24 Obɔ otsɛn bɛn, mɛ̃ eyɛɛn byɛ wɛn, eluɔ kieel ki èsɔɔ byɛ onse ãbuɛɛn, ekiool wɛn byɛ emeebɔɔ kyɛ, obobɔ àwa byɛ kyɛ. 25 Bvool okɛɛn byɛ eli tɛ me ndɔɔ yi ebuɛɛn, okɛɛn byɛ eli ye ndɔɔ ye mbuul, edzeel ndɛ, me ndɔɔ yɛn Tal a byɛ wu oli ke ywel adzeel obi b'esi byɛ hɛ̃. [26 Kɛn a ŋɛn byɛ k'edzeel bakyɛ wɛ, Tal a byɛ wu oli ke ywel k'adzeel byɛ obi b'esi byɛ hɛ̃ wɛ.]*»

27 Bɔ ayebvool Yelusalem. Me lio lɛn Yeso oyi akɔɔl onse Nzɔ a Nziã, angaa-a-Nziã b'anɛn y'ayiool b'ãngel y'akuu-kuul ayebɔɔ ndɛ. 28 Bɔ afuul ndɛ bubu: «Okwɛn b'ebesa yɛ ãndɔɔ mã bo nã? Wu owi yɛ okwɛn b'asa mɔ̃ nã?» 29 Yeso obveel bɔ bubu: «Mɛ̃ èfuul byɛ ɔ̃mfuul ndyam ngɔ̃mɔ̃: Ŋɛn byɛ ewi mɛ̃ ɔ̃mbveel, oŋɔ̃ mɛ̃ bu ndieel byɛ okwɛn b'ebesa mɛ̃ ãndɔɔ mã. 30 Wu áyuɔɔl Dzaã me ndɔɔ yi awa baal opongo nã, Nziã wuo Baal? Ewa mɛ̃ ɔ̃mveel.» 31 Kɛn a bɔ abvi otsuun bam-a-bam ndiri: «Bia-byɛ ebveel wɛn "Nziã wu áyuɔɔl ndɛ", ndɛ mpii ol'ofuul bia-byɛ ndiri: "Ke byɛ ébee ndɛ okiool emã?" 32 Kɛn a ŋɛn bia-byɛ ebveel ndɛ wɛn: "Wu áyuɔɔl ndɛ baal..."» Bɔ áli ye buɔ b'embuul, ke ngwel wɛ bueel ákekiool ndiri Dzaã oli ɔ̃liaal-ɛ̃nkiɛɛn a Nziã wa taa-taa. 33 Obobɔ, bɔ abveel Yeso ndiri: «Bee k'eyɛɛ wɛ.» Yeso bu abveel bɔ ndiri: «Mɛ̃ ndyam hɛ̃ k'eliaal byɛ okwɛn b'ebesa mɛ̃ ãndɔɔ mã wɛ.»