1 Yeso olieel bɔ bvool bubu: «Taa-taa bam, mɛ̃ eyɛɛn byɛ wɛn, bakyɛ onse baal b'ali ŋã k'àkwa wɛ okɛɛn bɔ k'amwɛn k'eya Okwɛn o Nziã ye waan wɛ.»

2 Ke mbee ãtsoo ãsɛɛn, Yeso obiri Piɛɛl ye Dzak ye Dzaã, bu ayɛn ye bɔ me pyɛ nkal a nkio yi nda yi nda. Ke mviil ã bɔ, ndɛ obuul, 3 ekɔ e ndɛ eyii enyɛɛn m'emfa kyɛn mbuul si-ekal ngɔmɔ̃ me nsie yam yueel k'akoo m'osuul ekɔ fuu obobɔ wɛ. 4 Enseel oŋɔ̃, ayio ange-atyel amwɛn Eli ye Moyize abeta ɔ̃sam ye Yeso. 5 Piɛɛl abvuru oyɛɛn, olieel Yeso bubu: «Ɔ̃tee, eli ngesɛ kwɛn bia-byɛ ekal ŋã. Etuu asɛɛ atyel: Ngɔmɔ̃ wa yɛ, ngɔmɔ̃ wa Moyize, ngɔmɔ̃ wu Eli.» 6 Ke yam, Piɛɛl ãyal ã́fi, ke ngwel wɛ ndɛ y'ayio bakyɛ ebangɛɛ al'emeebɔɔ bɔ. 7 Epɛn eyefoo bɔ. Onse epɛn okɔ, nkii ngamɔ̃ eyɛɛn bubu: «Wu Muaan a mɛ̃ wu ɔ̃tio, eyoo ndɛ!» 8 Alili oŋɔ̃, ayio atal nku-a-nku a bɔ, kɛn a bɔ k'abemwɛn mbuul wɛ, wu emwɛn bɔ kɛn a Yeso ndyam ɔ̃tu ye bɔ. 9 Ŋ'eyii ekwɛɛn bɔ nkio, Yeso owi bɔ ãnkunkwa ndiri abee mbuul si ɔ̃mɔ̃ m'emwɛn bɔ oliaal, tiil ye k'esiool Muaan a mbuul onse b'ákwi-ákwi. 10 Bɔ ayoo luo olɔ, kɛn a bɔ abvi ofuul bam-a-bam ndiri: «"Osiool onse b'ákwi-ákwi", ŋ'ayɛɛn ndiri nki?» 11 Bɔ afuul Yeso bubu: «Me ndɔɔ emã ayiool b'ãngel abeyɛɛn ndiri: "Ebvaan kɛn ŋ'ɛ̃kwel Eli aya?"» 12 Yeso obveel bɔ bubu: «Ebvaan Eli aya kɛn ŋ'ɛ̃kwel me ndɔɔ yi ayebveel ãndɔɔ mbueel me nkuul. K'otsɛn omã hɛ̃ b'ákel me ndɔɔ Muaan a mbuul ndiri ebvaan kwɛn ndɛ amwɛn fool bibi bvool ndiri àfiɛɛn ndɛ? 13 Kɛn a mɛ̃ eyɛɛn byɛ wɛn, Eli amaaya bvool baal asi ndɛ onge b'edzii bɔ, onge b'ákel me ndɔɔ a ndɛ.»

14 Ŋ'etɔ bɔ ol'ayio bakyɛ, bɔ amwɛn embuul e baal bibi edzii bɔ y'ayio b'ãngel abetsuun ye bɔ. 15 Ŋ'emwɛn baal Yeso, alili oŋɔ̃, esi bɔ bam bueel ɛ̃kam. Bɔ bu atsuu ntiin me ndɔɔ yi ayebio ndɛ. 16 Yeso ofuul bɔ bubu: «Ndɔɔ yi ebetsuun byɛ ye bɔ mã?» 17 Mbuul ngɔmɔ̃ onse baal obveel ndɛ bubu: «Ɔ̃tee, mɛ̃ ngya yɛ muaan a mɛ̃ wu bɔɔl, ke ngwel wɛ ndɛ oli y'ɔ̃fel wu ɔ̃bi-ɔ̃bi wu asuul ndɛ k'ayɛɛn wɛ. 18 Mboo mbi pyɛ, ɔ̃fel ondɛ asiin ndɛ, ndɛ osab ndɛ me nsie, oŋɔ̃ ndɛ ãfel ãyii ãpal onse ɔ̃nywã, obvi miin odza, bvool nzuru ewɛɛn mpɛn-mpɛn. Mɛ̃ nsɔɔ ayio a yɛ k'atswɛɛl ɔ̃fel ondɛ, kɛn a bɔ k'akoo wɛ.» 19 Yeso bu alieel bɔ bubu: «Byɛ baal ba lio li, byɛ eywɛn okiool! Mɛ̃ ye byɛ tiil mpwanki èkal? Mɛ̃ èkuru ɔ̃kwal me ndɔɔ a byɛ tiil lio emã? Eya mɛ̃ ye muaan.» 20 Ayi ndɛ ye muaan. Ŋ'emwɛn ndɛ Yeso, kɛn alili ɔŋɔ̃, ɔ̃fel wu ɔ̃bi-ɔ̃bi onziool ndɛ kokɔ, ndɛ obvi me nsie, bu ayii akɛɛn, ãfel ãpal onse ɔ̃nwyã. 21 Yeso bu afuul tal a ndɛ bubu: «Bɛɛn mpwa-nki ki ebesa ndɛ bubu?» Tal obveel bubu: «Fa obwee o ndɛ. 22 Ãlio bibi, ɔ̃fel ondɛ abetsɛɛn ndɛ onse mbaa wuo onse ãdza me ndɔɔ yi abam ndɛ. Kɛn a yɛ okɛɛn koo k'asa k'emã, oŋɔ̃ sio bee nyiĩ bvool wuaal a bee!» 23 Yeso obveel ndɛ bubu: «Yɛ yɛɛn wɛn "okɛɛn yɛ koo"? Akoo k'asa mbueel me mbuul wa y'okiool!» 24 Kɛn a me lio olɔ, tal a muaan obiool ndiri: «Mɛ̃ nkiool, wuaal a mɛ̃, me ndɔɔ yɛn mɛ̃ ngywɛn a okiool!»

25 Ŋ'emwɛn Yeso k'eyii ebvɔɔn embuul tsotsoo a bɔ, ndɛ oyɛɛn ɔ̃fel wu ɔ̃bi-ɔ̃bi bubu: «Ɔ̃fel wu asuul mbuul nkɛn, mɛ̃ mbuul wu ntam yɛ wɛn, pal onse muaan wu bvool bee bam onse ndɛ obekɔɔl!» 26 Ɔfel bu apal onse muaan, akuaal ɛ̃sɔɔl bvool anziool ndɛ bam kokɔ. Muaan oyii onge wu okwi m'emfa kyɛn baal bibi abvi oyɛɛn ndiri: «Ndɛ ŋ'akwi.» 27 Kɛn a Yeso osiin ndɛ me kuɔɔl otɛɛl ndɛ, ndɛ bu atɛɛn tɛ. 28 Ŋ'esam Yeso onse nzɔ bvool ŋ'emwɛn ayio kwɛn bɔ ayii kɛn a bam ye ndɛ, bɔ afuul ndɛ bubu: «Ndɔɔ mã yɛn bee k'ekoo m'otswɛɛl b'ɔ̃fel ondɛ wɛ?» 29 Yeso obveel bɔ bubu: «Ɛ̃fel mi bubu, ɛ̃bepal kɛn a m'ebuɛɛn.»

30 Bɔ ambal oŋɔ̃, bu atsiil nsie yi Ngalile. Yeso k'adzii kwɛn baal ayɛɛ mboo yi eli ndɛ wɛ. 31 Ke ngwel wɛ, ndɛ ákeyiool ayio ãndɔɔ mã: «Muaan a mbuul, ŋ'ayii asa atiɔ ndɛ me mviɔɔl ɛ̃ baal, bɔ àbam ndɛ bvool me tsoo li ãtyel li ekwi ndɛ, ndɛ àsiool.» 32 Kɛn ayio k'ákebɔɔ otsɛn b'ãyɛɛn omɔ̃ wɛ, bɔ bvool áli ye buɔ b'afuul ndɛ ɛ̃fuul.

33 Bɔ atɔ Kapelanahum. Ŋ'etɔ bɔ nzɔ, Yeso ofuul ayio bubu: «Ndɔɔ yi eketsuun byɛ me nkuul-a-nkuul mã?» 34 Kɛn ayio awuun pi, ke ngwel wɛ me nkuul-a-nkuul, bɔ áketsuun onse bam-a-bam me ndɔɔ yi ayɛɛ wu onduru bakyɛ onse bɔ. 35 Obobɔ, Yeso obvi nsɛn, oti ayio ange-kuun ye buaal mbel, bu alieel bɔ bubu: «Okɛɛn mbuul odzii k'akal wu onduru bakyɛ, ebvaan ndɛ akal wa ke mbee a baal bueel bvool akal ɔ̃sal a baal bueel.» 36 Ke mbee oŋɔ̃, ndɛ owel muaan wu ɔ̃tsi-tsiri, osuul ndɛ ke nkwel a bɔ, oyɔɔ ndɛ onse mviɔɔl, bu alieel ayio bubu: 37 «Mbuul wu oyɔɔ muaan wɛn onge wu me nkuũ a mɛ̃, ŋ'ayɔɔ myam, bvool wu yɔɔ mɛ̃, ke mɛ̃ ayɔɔ wɛ, ndɛ ŋ'ayɔɔ wu oyuɔɔl mɛ̃.»

38 Dzaã olieel Yeso bubu: «Ɔ̃tee, bee emwɛn mbuul atswɛɛl ɛ̃fel mi ɛ̃bi-ɛ̃bi me nkuũ a yɛ, kɛn a bee ekedzii k'eluo ndɛ k'asa obobɔ, ke ngwel wɛ ndɛ k'ali onse nkel a bia-byɛ wɛ.» 39 Yeso obveel ndiri: «Ebee ndɛ oluo k'asa obobɔ, ke ngwel wɛ k'eli ye mbuul wɛ wɛn ŋ'esi ndɛ emvieel me nkuũ a mɛ̃, kɛn alili oŋɔ̃, obvi obi-obi oyɛɛn me ndɔɔ a mɛ̃. 40 Ke ngwel wɛ, mbuul wɛn k'abyal bia-byɛ wɛ, ŋ'ali wa bia-byɛ. 41 Bvool mbuul wu owi byɛ mbiɔ a ãdza me ndɔɔ yɛn byɛ eli ba Mãsia, taa-taa bam, mɛ̃ eyɛɛn byɛ wɛn, ndɛ kieel k'akoo m'oywɛn ebvakab e ndɛ bam wɛ.»

42 «Mbuul wu asa kwɛn ngɔmɔ̃ onse ebebaan bvi elɔɔ okiool onse mɛ̃ bvi ebva onse obi, ebvaan kwɛn akuru ndɛ nkɔɔn yi nɛn me nkii bvool atyal ndɛ onse ãdza m'ɔ̃ngwa. 43 Okɛɛn kuɔɔl e yɛ, ebal yɛ onse obi, tsiil kyɛ. Eli ngesɛ me ndɔɔ a yɛ k'asam onse elaã li ɔ̃bu kuɔɔl ngemɔ̃, ye k'ekal yɛ ye mviɔɔl ɛ̃nge-mviaal bvool ayi onse ywɛn e mbaa, ke mboo yɛn mbaa k'edzam wɛ. 44 [ Okɔ mboo yɛn ɛ̃mfɛɛ̃ mi ɛ̃dza nzuru k'ɛ̃kwa wɛ bvool mbaa k'edzam wɛ*.] 45 Okɛɛn kuul e yɛ ebal yɛ onse obi, tsiil kyɛ. Eli ngesɛ me ndɔɔ a yɛ k'asam onse elaã li ɔ̃bu kuul ngemɔ̃, ye k'ekal yɛ ye mviil ɛ̃nge-mviaal bvool ayi onse ywɛn e mbaa. 46 [Okɔ mboo yɛn ɛ̃mfɛɛ̃ mi ɛ̃dza nzuru k'ɛ̃kwa wɛ bvool mbaa k'edzam wɛ*.] 47 Okɛɛn dziil e yɛ ebal yɛ onse obi, mbaal lɔ. Eli ngesɛ me ndɔɔ a yɛ k'asam onse Okwɛn o Nziã dziil ngemɔ̃, ye k'ekal yɛ ye mviil ãnge-mbuaal bvool atyal yɛ onse ywɛn e mbaa. 48 Okɔ mboo yɛn ɛ̃mfɛɛ̃ mi ɛ̃dza nzuru k'ɛ̃kwa wɛ bvool mbaa k'edzam wɛ. 49 Ke ngwel wɛ, Nziã akieel alɔ mbaa onse mbuul ndyam wueel onge b'elɔ baal ɔ̃ngwa onse bvi-odza.»

50 «Ɔ̃ngwa oli eluɔ ki bvɛ, kɛn okɛɛn ɔ̃ngwa oywɛn obvie o ndɛ, emfa emã kyɛn byɛ ol'ebveel ndɛ bɔ? Ekal y'ɔ̃ngwa onse byam bvool ekal onse opi ye bakyɛ.»