1 Yeso obvi oyiool bvool nku-a-nku a baã li Ngalile. Embuul e baal ebvɔɔn nku-a-nku a ndɛ. Obɔ otsɛn bɛn ndɛ oyebva nsɛn onse ebɛɛ ki éli nkal a baã. Embuul e baal bueel éli me nsie tsotsoo ãdza. 2 Ndɛ ákeyiool bɔ ãndɔɔ bibi m'ãmboo. Tal m'ékeyiool ndɛ bɔ: 3 «Eyoo! Tsoo ngelemɔ̃, ɔ̃kwɛn ngɔmɔ̃ oyekwɛn nsia. 4 Me lio li ékeyiri ndɛ nsia, yinkyɛ ebvi nku-a-nku a nkuul. Anywɛn bu adzi yɔ. 5 Nsia yinkyɛ ebvi ke mboo yi y'ãnkɔɔn, yɛn nsie bibi pyɛ. Yɔ emɛn yam tswa-a-tswa, me ndɔɔ yɛn nsie k'éli ye dzio wɛ. 6 Kɛn ŋ'epal tal, ekwɛn obvɛ edzio, bu ekɛɛ, ke ngwel wɛ bvɛ k'élɔ ɛ̃dza wɛ. 7 Nsia yinkyɛ ebvi onse ɛ̃ti mi ãnsiɛɛn, ɛ̃ti mi ãtsiɛɛn ɛ̃mɛn, bu ɛ̃foo ekwɛn obvɛ, obobɔ bvɛ k'eburu nsia wɛ. 8 Kɛn a nsia yinkyɛ ebvi onse nsie yi mvɛ-mvɛ. Yɔ emɛn, eyel tiil bu eburu: ekwɛn kyɛn eburu nsia ãku-ãtyel, kyɛn eburu nsia ãku-ãsɛɛn, kikyɛ bvool eburu nsia ɔ̃nkam.» 9 Yeso bvool olweel ndiri: «Yɔɔl kwɛn wa y'ãnswi m'ayoo, ayoo!»

10 Ŋ'eyii Yeso me pyɛ, baal b'ádzii ndɛ y'atam ange-kuun ye buaal afuul ndɛ otsɛn b'ãmboo m'eti ndɛ. 11 Ndɛ obveel bɔ ndiri: «Me byɛ, Nziã osi kwɛn byɛ eyɛɛ ãndɔɔ mã m'elwɔɔn m'ãtal Okwɛn o Nziã, kɛn a me b'onkwel-a-nzi, bɔ ayoo mɔ̃ kɛn a m'ãmboo. 12 M'emfa okyɛ,

bɔ atal bam ngesɛ, kɛn a bɔ ki amwɛn pyɛ,

bvool ayoo bam ngesɛ, kɛn a bɔ otsɛn okwaal wɛ,

owɛɛl bɔ ayebvool ola Nziã bvool ndɛ odzeel ãbi ã bɔ.»

13 Obobɔ, Yeso bvool olieel bɔ bubu: «Byɛ k'ebɔɔ otsɛn o mboo yi wɛ, ke byɛ m'ãsiil otsɛn o bwɛn-a-bwɛn ebɔɔ? 14 Ɔ̃kwɛn, eli mbuul wu akwɛn Endɔɔ e Nziã. 15 Baal b'ali nku-a-ku a nkuul, eli baal bɛn akwɛn Endɔɔ e Nziã onse bɔ. Kɛn a ŋ'eyoo bɔ lɔ alili oŋɔ̃, Satana oyembaal Endɔɔ li akwɛn onse bɔ. 16 Bakyɛ b'ayɔɔ nsia ke mboo yi y'ãnkɔɔn, eli bɛn ŋ'eyoo bɔ Endɔɔ, bɔ ayɔɔ lɔ y'esɛ kɛn alili oŋɔ̃. 17 Kɛn onge bɛn bɔ k'ali y'ɛ̃dza wɛ, bɔ k'ayiil y'Endɔɔ olɔ wɛ. Ŋ'eyii emwɛn bɔ fool wuo ŋ'ayii atuaal bɔ mpal me ndɔɔ Endɔɔ olɔ, oŋɔ̃ bɔ abvi. 18 Bakyɛ b'ayɔɔ nsia onse ãnsiɛɛn, eli baal b'ayoo Endɔɔ. 19 Kɛn ãtsam me ndɔɔ eluɔ bvi ɔ̃kiri, pfuru li epfuru opfel baal, y'efua bvi emfa bwɛn emfa, efoo Endɔɔ olɔ, kwɛn lɔ ebee nsia oburu. 20 Bakyɛ b'ayɔɔ nsia onse nsie yi mvɛ-mvɛ, eli baal b'ayoo Endɔɔ, ayɔɔ lɔ, bu aburu nsia. Ekwɛn kyɛn eburu nsia ãnku-ãtyel (30), kikyɛ ãnku-ãsɛɛn (60), kikyɛ ɔ̃nkam (100).»

21 Yeso bvool olieel bɔ bubu: «Mbuul k'andɛɛl mbunda me ndɔɔ yi ampfeel ndɛ kantin wuo yi asuul ndɛ ke nsɛn a ntal wɛ, me ndɔɔ yi asuul ndɛ nkal eluɔ ki abendɔɔl ndɛ. 22 Ke ngwel wɛ, ndɔɔ yueel yi m'edziɔɔn èpal ke taan, bvool ndɔɔ yueel yi m'okwɛɛ èmɔɔn kal-a-kal. 23 Yɔɔl mbuul wa y'ãtswi m'ayoo, ayoo!»

24 Yeso bvool olieel bɔ bubu: «Ekal y'onkyab me m'ebeyoo byɛ! Nziã akieel awa byɛ me lemvɛɛl li ebewa byɛ bakyɛ, bvool ndɛ àkool b'onduru! 25 Ke ngwel wɛ, mbuul wu oli y'elu-luɔ, àwa ndɛ bvool, kɛn a wɛn kyam pyɛ, àmbaal ndɛ onkyam k'emã-mã ki eli a ndɛ.»

26 Yeso olieel bvool bubu: «Okwɛn o Nziã oli onge mbuul ngɔmɔ̃ wu oyiri nsia onse nguun a ndɛ, 27 onkyam ŋɛn ndɛ olaal twal wuo osi ɛ̃nsiil, tsia mwiĩ, nsia oyɔ emɛn bvool eyal m'emfa kyɛn ndɛ ki ayɛɛ pyɛ. 28 Nsie yam-a-yam esuul ɔ̃ti amɛn, ŋ'ɛ̃kwel kɛn yɔ epaal ɔ̃swɛɛn, ke mbee oŋɔ̃ ɔ̃swɛɛn opaal lesia li ebwee bvool nsia e bele bu eluul ɔ̃nki a lɔ tɔ. 29 Obobɔ, ŋ'eyel nsia, mbuul obvuru ɔ̃sal me mbieel yi ɔ̃yiin-a-yiin, ke ngwel wɛ, lio li aka nsia ŋ'ekoo.»

30 Yeso olieel bvool bubu: «Bia-byɛ Okwɛn o Nziã bwɛn-a-bwɛn emvɛɛl? Bia-byɛ mboo mã eta me ndɔɔ yi esuo emfa ki eli bɔ? 31 Okwɛn o Nziã oli onge lesia li mutaade lɛn, me lio li akwɛn lɔ onse nsie, lɔ enduru nsia yueel yi ɔ̃kiri m'otsiaal. 32 Kɛn a ke mbee a ŋ'akwɛn lɔ, lɔ emɛn, bu enduru ɛ̃ti mvieel mi onse nguun. Lɔ elɔ ãpɔɔ̃ m'ãnɛn, m'emfa kyɛn, aywɛn akoo m'oyekal ke nsɛn edzuun e ndɛ.»

33 Yeso áketee bɔ Endɔɔ e Nziã m'ãmboo bibi m'obobɔ, m'emfa kyɛn bɔ akoo k'akwaal otsɛn. 34 Ndɛ k'ákeywɛn mboo ota wɛ ŋ'ekeyɛɛn ndɛ ye bɔ. Kɛn a me pyɛ, ndɛ ákebɛɛl ayio a ndɛ ãndɔɔ mam mbueel.

35 M'ãnkunkwal mã tsoo lili olɔ, Yeso olieel ayio a ndɛ ndiri: «Bia-byɛ eyi ongwel a baã!» 36 Bɔ asiil embuul, ayio bu abiri ndɛ onse ebɛɛ. Éli hɛ̃ y'ebɛɛ bvikyɛ tsotsoo a ndɛ. 37 Tal kwɛn mfel wa kokɔ obvi opob, epoo eyenziool ebɛɛ, kyɛ eyii eluul m'ãdza. 38 Kɛn a ndɛ, ndɛ álaal twal ke mbee ebɛɛ, ásoo ɔ̃tswɛ nkal esoo. Ayio aseel ndɛ ndiri: «Ɔ̃tee, bia-byɛ olɔ ekwi! K'esa yɛ ãwua wɛ?» 39 Yeso ayesiool, oyiaan mfel bvool oyɛɛn ãdza ndiri: «Ɔ̃lii! Wuun-pi!» Obobɔ, mfel ofi, ɔ̃li bu abvi ndyam piɛɛl! 40 Yeso olieel bɔ bubu: «M'emã byɛ eli ɛ̃bu-buɔ? Byɛ kɛn okiool pyɛ?» 41 Kɛn ayio buɔ bo bibi osiin bɔ, bu abvi oyɛɛn bam-a-bam ndiri: «Wu mbuul nã ali, wɛn okyam mfel ayoo ndɛ! Ãdza hɛ̃ ãyoo ndɛ!»