1 Ŋ'ebwel tsoo li saba, Mali wu ola bo Magadala, ye Mali wu ngoo a Dzak, ye Salome asuun mbaal m'ãnãsi me ndɔɔ yi ayepwɛɛ m'ebiĩ e Yeso. 2 Me tsoo li eyenge m'epal-epal kwɔɔl, ŋ'eyii epal tal, bɔ ayɛn mpiɛɛn. 3 Bɔ ákeyɛɛn bam-a-bam ndiri: «Wu àkeel bia-byɛ nkɔɔn yi k'ɔ̃nywa a mpiɛɛn nã?» 4 Kɛn a ŋ'eseel bɔ mviil, bɔ amwɛn kwɛn nkɔɔn ámaakeel. Kwɛn ŋɛn nkɔɔn oyɔ éli yam yi nɛn. 5 Ŋ'esam bɔ, bɔ amwɛn nsam a bɔɔl me nsɛn me kuɔɔl ki elam onse mpiɛɛn, ndɛ alaal ekɔ ki fuu. Bɔ ebangɛɛ ebɔɔ. 6 Kɛn a ndɛ olieel bɔ bubu: «Ebee ye buɔ oyoo: byɛ ebii Yeso wa Nadzalet wu abɛɛl m'enkulusu, ndɛ amaasiool, ndɛ k'ali ŋã wɛ. Etal mboo yi asuul ndɛ. 7 Meba ŋã, eyeyɛɛn ayio a ndɛ ye Piɛɛl ndiri: "Ndɛ otsɔɔn nkwel a byɛ ke Ngalile, okɔ ku emwɛn byɛ ndɛ onge b'élieel ndɛ byɛ."» 8 Bɔ apal onse mpiɛɛn, bu abal y'etiɔɔl ye buɔ bueel. Bɔ k'alieel mbuul ndɔɔ wɛ, me ndɔɔ yɛn bɔ ebangɛɛ ébɔɔ.

9 [ Ke mbee a ŋ'esiool Yeso m'epfu, m'epal e pal ki tsoo li eyenge, ndɛ opal ŋ'ɛ̃kwel ola Maali wa Magadala wu étswɛɛl ndɛ ɛ̃fel mi ɛ̃bi-ebi nsiaan. 10 Ɔ̃kaal ondɛ oyeliaal nsia oyɔ ola b'áli ye ndɛ. Ŋ'esa oŋɔ̃, bɔ áli onse ãwuã bvool ákelel. 11 Kɛn a ŋ'eyoo bɔ Mali ayɛɛn ndiri: «Yeso oli m'omwiĩ, mɛ̃ mwɛn ndɛ!» Bɔ k'akiool ndɛ wɛ.

12 Ke mbee oŋɔ̃, Yeso opal m'emfa ekyam ol'ayio buaal b'ákeyi ola. 13 Ayio ange-buaal akɔɔl Yelusalem bvool alieel bakyɛ nsia oyɔ, kɛn a bɔ hɛ̃ abee k'akiool bɔ.

14 Ke mbee oŋɔ̃, Yeso opal ola ayio kuun y'ɔ̃mɔ̃ me lio li ekedza bɔ. Ndɛ oyiaan bɔ me ndɔɔ yɛn bɔ aywɛn a okiool, bvool áli y'ɔ̃kwal mpɛn, ke ngwel wɛ bɔ áti baal b'ámwɛn ndɛ m'omwiĩ ɛ̃nkyam. 15 Ke mbee oŋɔ̃, ndɛ olieel bɔ bubu: «Eyi m'ɔ̃kiri a nsie ndyam wueel, etsal Nsia yi Ngesɛ ola baal bueel. 16 Mbuul wu àkiool bvool àwal opongo, àkieel abvuul. Kɛn a wɛn k'àkiool wɛ akieel abɔɔ etumbu. 17 Etal eliĩ bvi eyɛɛ byɛ baal b'àkiool: Bɔ àtswɛɛl ɛ̃fel mi ɛ̃bi-ɛ̃bi me nkuũ a mɛ̃, bɔ àyɛɛn ɛ̃nywã mi alili. 18 Bɔ àsiin antaal. Okɛɛn bɔ anywiĩ ɔ̃twɔɔ wu abebam baal ndyam ke wɛn, ndɛ k'àsa bɔ eluɔ wɛ, bɔ àndɔɔl anga-ãluu mviɔɔl, bvool anga-ãluu àbvuul.»

19 Ke mbee a ŋ'elieel Mfam Yeso bɔ ãndɔɔ omɔ̃, andɛɛl ndɛ oyɛn ywel, bu bvi nsɛn me kuɔɔl e Nziã ki elam. 20 Ayio ayɛn me ndɔɔ yi ayetsal Nsia yi Ngesɛ ãmboo mbueel. Mfam ákewuaal a bɔ onse ɔ̃sal ondɛ, áketsweel otaa-taa b'ãtee ã bɔ m'emvieel bvi ékemɔɔn m'ãtee omɔ̃*.]