1 Onge bɛn Yeso aleyii apal onse Nzɔ a Nziã, ngɔmɔ̃ onse ayio a ndɛ olieel ndɛ bubu: «Ɔ̃tee, tal ãnkɔɔn mã m’obvie! Tal ntuu-ntuu a nzɔ yi m’ompal!» 2 Yeso obveel ndɛ bubu: «Yɛ amwɛn ãnzɔ m’ãnɛn mã? Mbueel ãkieel ãtsɔɔn: Nkɔɔn si ngamɔ̃ kieel k’esiil nkal a yinkyɛ wɛ.»

3 Yeso obvi nsɛn nkal a nkio a ɛ̃ti mi Olibve, nsɔ̃-a-nsɔ̃ a Nzɔ a Nziã. Piɛɛl, ye Dzak, ye Dzaã, y’Ãndele b’áli kɛn a bam ye ndɛ, afuul ndɛ bubu: 4 «Meyɛɛn bee, lio emã li ekieel eya ãndɔɔ omɔ̃? Eliĩ emã ki ekieel esuo ntɔ a ãndɔɔ omɔ̃ mam mbueel?» 5 Obobɔ, Yeso obvi bɔ oliaal bubu: «Ekal y’onkyab kwɛn mbuul abee byɛ opfuru! 6 Baal bibi akieel aya me nkuũ a mɛ̃ bvool ayɛɛn ndiri: "Mãsia mɛ̃!" Bvool bɔ akieel apfuru ɔ̃bɔbɔ a baal. 7 Ŋ’ekieel eyoo byɛ ɔ̃sam wu ãmvel ye wu ɔ̃nyiil wu ãmvel, oŋɔ̃ ɛ̃kwal ɛ̃ byɛ ebee ke ywel okal. Ke ngwel wɛ, ebvaan kwɛn ãndɔɔ omɔ̃ ãbwel. Kɛn oyɔ kieel k’ekal ntɔ a ɔ̃kiri kɛn wɛ. 8 Ke ngwel wɛ, ɔ̃kiri ngɔmɔ̃ akieel adzwaan ye wukyɛ, okwɛn ngɔmɔ̃ hɛ̃ okieel odzwaan ye bokyɛ. M’ãmboo bibi, nsie ekieel enziool nzuru, bvool ekieel ekal y’ɛ̃lɔɔ. Ãndɔɔ omɔ̃ mbueel ãkieel ãkal onge obɛɛn b’obaan o mwiĩ b’eyoo ɔ̃kaal wu oyii ayi oburu. 9 Me b’otal byɛ, ekal y’onkyab me ndɔɔ a byam. Ke ngwel wɛ, baal akieel abiri byɛ k’ãmbal m’Ayuda, akieel abɛɛl byɛ onse ãnzɔ m’ãbuɛɛn m’Ayuda. Byɛ ekieel eyetsuun ke nkwel ambiri y’akwɛn me ndɔɔ a mɛ̃. M’emfa okyɛ, byɛ ekieel etsweel mɛ̃ ke nkwel a bɔ. 10 Ebvaan ŋ’ɛ̃kwel kɛn atsal Nsia yi Ngesɛ onse ɛ̃kiri mvieel. 11 Ŋ’akieel abiri byɛ k’ãmbal, ŋ’ɛ̃kwel ebee nguo okɛɛ me b’eyeyɛɛn byɛ, kɛn a byɛ eyɛɛn ãyɛɛn m’àwa byɛ me lio olɔ, ke ngwel wɛ, byɛ ke b’ekieel eyɛɛn wɛ, Ɔ̃fel wu Ɔ̃nsensal wu akieel ayɛɛn. 12 Muaan-ngoo akieel atiɔ muaan-ngoo kwɛn abam ndɛ. Tal akieel atiɔ muaan. Baan akieel akal ataal b’aburu a bɔ, bvool akieel asa kwɛn abam bɔ. 13 Baal bueel akieel abyal byɛ me ndɔɔ a nkuũ a mɛ̃. Kɛn a wu akieel akuru ɔ̃kwal tiil ntɔ, wu akieel abvuul.

14 Ŋ’ekieel emwɛn byɛ ki ata m'"Eluɔ ki ongɛɛ" etɛɛn onse mboo yɛn kyɛ k’ekeekal oŋɔ̃ wɛ, yɔɔl kwɛn mbuul wu atsiɔ akwaal otsɛn ngesɛ! Obobɔ, yɔɔl kwɛn b’akieel akiɔɔl ke nsie a Yude abal onse ãnkio. 15 Yɔɔl kwɛn mbuul wu akieel akiɔɔl ke ywel a sɛɛ e nzɔ li pɛɛl abee obesool, me ndɔɔ yi ye awal eluɔ onse nzɔ. 16 Yɔɔl kwɛn mbuul wu akieel akiɔɔl k’ãnguun abee nzɔ obekɔɔl, me ndɔɔ yi ayewal kadzaka. 17 Ãwua m’ãtsoo omɔ̃ m’akaal b’akieel akal y’ãyam, ye b’akieel awa baan ãbiaal! 18 Ebuɛɛn, kwɛn ãndɔɔ omɔ̃ ãbee obwel me lio e mfyɛ! 19 Ke ngwel wɛ, m’ãtsoo omɔ̃, ekieel ekal ye fool lam bibi, m’emfa kyɛn fool li obobɔ lɔɔ-okal kɛn amwɛn lɔ wɛ, fa k’ébɛɛn ɔ̃kiri, ŋ’ébuo Nziã eluɔ bvieel, tiil meba, bvool fool li obobɔ kieel k’ebekal bam wɛ. 20 Okɛɛn Mfam k’ákueel ɔ̃bvɛn wu ãtsoo omɔ̃ wɛ, k’ekeekal ye mbuul wu abvuul wɛ. Kɛn a ndɛ ákueel ɔ̃bvɛn a mɔ̃, me ndɔɔ a baal b’ésueel ndɛ. 21 Obobɔ, okɛɛn mbuul olieel byɛ ndiri: "Etal, Mãsia oli ŋã!", wuo ndiri: "Etal, ndɛ oli ku!" Ebee ndɛ okiool. 22 Ke ngwel wɛ, amãsia ba mfya y’aliaa-ɛ̃kiɛɛn ba mfya akieel apal. Bɔ akieel asa emvieel y’emwa me ndɔɔ yi afuru baal bueel. Okɛɛn bɔ akoo, bɔ apfuru onkyam b’ésueel Nziã. 23 Oŋɔ̃ byɛ ekal angɔ-mwiĩ. Mɛ̃ bu ngwi byɛ ãnkunkwa obɔ.

24 Kɛn a m’ãtsoo omɔ̃, ke mbee a lio li fool olɔ,

tal ekieel epiin,

nswii kieel k’abepaal mvieel wɛ,

25 angam-a-ngam akieel abva ke ywel,

ɛ̃fel ɛ̃ waan mi ke ywel ɛ̃kieel ɛ̃tiɔɔl.

26 Obobɔ, baal akieel amwɛn k’eya Muaan a Mbuul onse epɛn ye waan bibi bvool ye lweel. 27 Ndɛ akieel ayuɔɔl ãnzwel. M’etswi enge-enã bvi ɔ̃kiri a nsie, mɔ̃ ãkieel ãbvool baal b’ésueel ndɛ.

28 Eyɔɔl kwɛn mboo a ɔ̃ti wa fig ewa byɛ ãyal: Ŋ’emwɛn byɛ kwɛn ãmpɔɔ̃ ã ndɛ ãyii dzoo-dzoo, bvool ãbvi ãnyuɔɔn opaal, oŋɔ̃ byɛ eyɛɛ wɛn ɔ̃mvu wu alili oyii tsotsoo. 29 Emfa kiki, ŋ’ekieel emwɛn byɛ ãndɔɔ omɔ̃ ãyii ãbebwel, eyɛɛ wɛn Muaan a Mbuul oyii tsotsoo k’edzoo. 30 Taa-taa bam, mɛ̃ eyɛɛn byɛ wɛn, baal ba lio li kieel k’akwa wɛ, y’ekeya ãndɔɔ omɔ̃ mbueel. 31 Ywel ye nsie ekieel ebwel, kɛn ãyɛɛn ã mɛ̃ kieel k’ãbwel mam wɛ.

32 Kɛn a me b’otal tsoo ye lio, mbuul wu oyɛɛ mɔ̃ pyɛ, onkyam ãnzwel ke ywel, onkyam Muaan. Wu oyɛɛ mɔ̃ kɛn a Taal ndyam. 33 Ekal angɔ-mwiĩ! Ke ngwe l wɛ, byɛ k’eyɛɛ lio li ekieel etɔ ɔ̃nywã-tsoo wɛ. 34 Ekieel ekal onge bɛn mbuul ngɔmɔ̃ oyɛn odzuu: Ndɛ ombal nzɔ a ndɛ, bu asiil yɔ me mviɔɔl mi asal a ndɛ. Ndɛ owi mbuul bwɛn a mbuul ɔ̃sal wu esa ndɛ, bu atam ɔ̃nkiaal a edzoo ndiri akal ngɔ-mwiĩ. 35 Obobɔ, ekal angɔ-mwiĩ, ke ngwel wɛ byɛ k’eyɛɛ lio li èya nga-nzɔ wɛ: Owɛɛl èkal m’ãnkukwa, wuo nkal a kuku, wuo ŋ’ekuaal nswee, wuo m’epal. 36 K’ebvaan kwɛn ndɛ ayebvool enseel, oyebɔɔ byɛ me twal wɛ. 37 M’eyɛɛn mɛ̃ byɛ mã, mɛ̃ eyɛɛn mɔ̃ me baal bueel: Ekal angɔ-mwiĩ!»