1 Ke mbee ãtsoo ke kwɛ, Yeso oyebvool Kapelenahum. Baal ayoo ndiri ndɛ oli ke nzɔ. 2 Embuul e baal ebvɔɔn m’emfa kyɛn ãmboo ãfi, onkyam okwel-a-nzi ke nkwel ɔ̃nywã a nzɔ. Obobɔ, Yeso otee bɔ Endɔɔ e Nziã. 3 Ayiaal ndɛ ekal, ki ébiri baal anã. 4 Onge bɛn bɔ k’akoo k’atɔ ye ndɛ tiil ke mboo yi éli Yeso wɛ me ndɔɔ embuul, bɔ ayɛɛl sɛɛ e nzɔ ke ywel a mboo yi éli ndɛ, bu aswɛɛl ntal a abieel yi éli mbuul ondɛ bɔ. 5 Ŋ’emwɛn Yeso okiool o bɔ, ndɛ olieel ekal ndiri: «Muaan a mɛ̃, adzeel ãbi ã yɛ.» 6 Ŋ’esa oŋɔ̃, ayiool b’ãngel ke kwɛ áli me tsɛn oŋɔ̃, bɔ abvi bam-a-bam otsam ndiri: 7 «Otsɛn omã b’eyɛɛn ndɛ obobɔ? Ndɛ asiaan Nziã! Mbuul nã wu adzeel ãbi ã baal, okɛɛn ke kɛn a Niã ndyam wɛ?» 8 Alili oŋɔ̃, Yeso m’ɔ̃fel, otaal ãtsam ã bɔ, ndɛ bu alieel bɔ bubu: «Otsɛn omã b’etsam byɛ obobɔ? 9 Ayɛɛn ndiri: "Adzeel ãbi ã yɛ", oyɔ k’eli ndɔɔ yi mpal m’oyɛɛn wɛ, kɛn ayɛɛn ndiri: "Tɛɛn, wal ntal a yɛ, bvool yi", oyɔ ndɔɔ yi enduru mpal m’oyɛɛn! 10 Kɛn a mɛ̃ nzii kwɛn byɛ eyɛɛ bubu: Muaan a Mbuul oli y’okwɛn b’adzeel ãbi ã baal me nsie!» Ndɛ bu alieel ekal ndiri: 11 «Mɛ̃ eliaal yɛ wɛn, tɛɛn, wal ntal a yɛ bvool kɔɔl nzɔ!» 12 Enki-anka oŋɔ̃, mbuul ondɛ otɛɛn, owel ntal a ndɛ, bu apal ke nkwel a baal bam bueel. Baal bueel ongɛɛ obɔɔ, bu abvi Nziã olweel ndiri: «Bee mwɛn-éndɛɛl kɛn emwɛn ndɔɔ yi bubu wɛ!»

13 Yeso opal bvool, bu ayɛn nku-a-nku ãdza m’ɔ̃ngwa. Embuul e baal ékeya ola ndɛ, obobɔ ndɛ ákeyiool bɔ. 14 Ŋ’ékebwel ndɛ, ndɛ omwɛn Lebvi wu muaan a Alefe me nsɛn ke mboo yi afuru mpal. Yeso olieel ndɛ ndiri: «Nɔɔn a mɛ̃!» Ndɛ otɛɛn, bu anɔɔn a Yeso.

15 Ke mbee oŋɔ̃, onge bɛn Yeso oyedza ke nzɔ a Lebvi, atwal mpal bibi ye baal b’ãbi ayedza ye ndɛ bwɛn ayio a ndɛ, ke ngwel wɛ bɔ obɔ b’ákenɔɔn a ndɛ bibi. 16 Kɛn ayiool b’ãgel ba nkel yi afalisaye ayemwɛn kwɛn Yeso abedza y’atwal mpal ye baal b’ãbi, bɔ afuul ayio a ndɛ bubu: «Otsɛn omã b’ebedza ɔ̃tee a byɛ y’atwal mpal ye baal b’ãbi?» 17 Onge bɛn Yeso oyoo k’eyɛɛn bɔ, ndɛ olieel bɔ ndiri: «Baal ba kɛɛ-kɛɛ k’ali ye kɔɔ li ɔ̃boo wɛ, b’ali ye kɔɔ e ndɛ kɛn anga-ãluu. Mɛ̃ ke ngyi baal ba dzu mbel ota wɛ, beyenta mɛ̃ mbel kɛn anga-ãbi.»

18 Tsoo ngelemɔ̃, ayio a Dzaã y’Afelisaye ákesa ãbuɛɛn mã me nzal. Bɔ ayebɔɔ Yeso, bu afuul ndɛ ndiri: «Ndɔɔ mã yɛn ayio a Dzaã y’Afalisaye abesa ãbuɛɛn mã me nzal, kɛn a ba yɛ k’asa mɔ̃ wɛ?» 19 Yeso obveel bɔ bubu: «Andoo b’ɔ̃baal ol’asi ãbuɛɛn mã me dzal ŋ’eli ɔ̃baal kɛn ye bɔ? Bɔ k’akoo m’osa mɔ̃ wɛ, nzal-a-ŋɛn ɔ̃baal oli kɛn ye bɔ. 20 Kɛn ãtsoo ãkieel ãya mɛn àmbaal ɔ̃baal onse bɔ, obobɔ bɔ àsa ãbuɛɛn mã me nzal m’ãtsoo omɔ̃. 21 Mbuul k’akoo m’olɔ epio ki ekɔ ki enyiɔɔn m’ekɔ ki emeeyiil wɛ, ndɛ asa obobɔ, epio ki ekɔ ki enyiɔɔn ol’ekɔɔl ki emeeyiil, bvool bwel b’énduru li tsɔɔn m’okuun. 22 Mbuul k’alɔ mbal m’alili onse ãmfel mã m’ãmaãyiil wɛ, ndɛ asa obobɔ, mbal m’alili ol’ãmbwel ãmfel, oŋɔ̃ ndɛ bu abɛɛl ntaal me kiil. Mbal m’alili, alɔ mɔ̃ m’ãmfel m’alili!»

23 Tsoo ngelemɔ̃ li saba, onge bɛn Yeso ákebwel onse ãnguun a nsia e bele, ayio a ndɛ abvi nsia oka me nkuul-a-nkuul. 24 Afalisaye bu alieel ndɛ ndiri: «Ndɔɔ emã bɔ asa ndɔɔ yi aluo osa me tsoo li saba?» 25 Ndɛ obveel bɔ bubu: «Byɛ lɔɔ-okal kɛn etsiɔ m’ési David, ŋ’ékaan ndɛ bvool áli me nzal, ndɛ ye b’áli ye ndɛ wɛ? 26 David mpii ásam onse Nzɔ a Nziã, me lio li éli Abyataal ngaa-a-Nziã wu ɔ̃nɛn. Ndɛ ádzi amampa b’áwi Nziã ãkab bvool áwi hɛ̃ b’áli ye ndɛ. Kwɛn ŋɛn, b’áwi nkuul yi adza amampa obɔ éli kɛn angaa-a-Nziã!» 27 Yeso olweel bubu: «Nziã ási tsoo e saba me ndɔɔ a mbuul, ke ndɛ ási mbuul me ndɔɔ a tsoo e saba wɛ. 28 Obɔ otsɛn bɛn Muaan a mbuul oli hɛ̃ mfam a tsoo e saba.»