Mateus 20

Mboo a asal b’onse nguun a bvine

1 «Ke ngwel wɛ, etal emfa ki eli Okwɛn o ywel: Mfam a nzɔ ngɔmɔ̃ opal epal-epal kwɔɔl me ndɔɔ yi ayebii baal b’ayesal onse nguun a ndɛ yi bvine. 2 Ndɛ ye bɔ akuru kwɛn furu li ɔ̃sal a bɔ me tsoo eli li nzi yi ãbvieel ngamɔ̃. Ndɛ bu ayuɔɔl bɔ onse nguun a bvine a ndɛ. 3 Ndɛ bvool opal m’epal sua lio li bva, omwɛn baal akyam b’akɛɛn ke taan. 4 Ndɛ olieel bɔ ndiri: "Byɛ hɛ̃, eyi onse nguun a mɛ̃ yi bvine, mɛ̃ èwa byɛ furu li ekoo." 5 Bɔ bu ayɛn okɔ. Ndɛ bvool opal ŋ’eyii sua tal dzu bvool me lio ãtyel ŋ’emeebɔɔn tal, bu asi bubu. 6 Ndɛ bvool opal sua lio li ãtaan ŋ’emebɔɔn tal, bu amwɛn baal akyam b’atɛɛn ke taan. Ndɛ olieel bɔ ndiri: "Ndɔɔ mã yi etɛɛn byɛ ŋã ki esa pyɛ pipi wu ɔ̃tsiin?" 7 Bɔ abveel ndɛ ndiri: "Me ndɔɔ yɛn mbuul wu owel bee k’ɔ̃sal pyɛ." Ndɛ olieel bɔ bubu: "Oŋɔ̃ byɛ hɛ̃ eyi onse nguun a mɛ̃ ye bvine."»

8 «Ŋ’etɔ ãnkunkwal, nga-nguun a bvine olieel mbuul wu atal ɛ̃sal ɛ̃ ndɛ ndiri: "Ta asal mbel, wa bɔ furu e bɔ. Bɛɛn me b’ãmbee, sɛɛl me b’ɛ̃kwel." 9 Baal b’ewel ndɛ sua lio li ãtaan ŋ’emeebɔɔn tal, ayi, abɔɔ furu li nzi yi bvieel ngamɔ̃ me mbuul bwɛn a mbuul. 10 Ŋ’etɔ ɔ̃nkaal wa baal b’ɛ̃kwel, bɔ ayii atsam ndiri bɔ al’abɔɔ nzi yi enduru. Kɛn a bɔ hɛ̃ abɔɔ kɛn a furu li nzi yi bvieel ngamɔ̃ me mbuul bwɛn a mbuul. 11 Ŋ’ebɔɔ bɔ lɔ, bɔ ayoo nkyee ye nga-nguun, 12 bu alieel ndiri: "Baal b’ayi ãmbee ba, asal kɛn a me lio ngemɔ̃, yɛ furu bɔ emfa ngemɔ̃ ye bee b’esal eyool a mwiĩ pipi wu ɔ̃tsiin, ɛ̃furu ɛ̃fi!" 13 Ndɛ obveel ngɔmɔ̃ onse bɔ bubu: "Ndoo a mɛ̃, mɛ̃ ke nsi yɛ obi wɛ. Bia-yɛ k’ekuru wɛn furu li ɔ̃sal a yɛ eli li nzi yi ãbvieel ngamɔ̃ wɛ? 14 Wal furu e yɛ, yi li yam. Myam mbuul wu nzii k’ewa wu obɛɛn ɔ̃sal ãmbee furu lili li mfuru mɛ̃ yɛ. 15 Mɛ̃ ke nkoo k’esa be nzi mɛ̃ me nzi e myam wɛ? Wuo, yɛ akwa mɛ̃ nsɔɔ me ndɔɔ yɛn mɛ̃ ndi mbuul wa ngesɛ?" 16 Obɔbɔ, ba nkwel akieel akal ba mbee, ba mbee akieel akal ba nkwel.»