1 Yeso bvool olieel ndiri: «Ekal y’onkyab bɛn ŋ’esa byɛ ãndɔɔ m’ãli dzu ke nkwel a baal, ebee okal me ndɔɔ yɛn bɔ atal byɛ. Okɛɛn k’obobɔ wɛ, byɛ k’ekoo k’ebɔɔ ebvakab ola Tal a byɛ wa ke ywel wɛ. 2 Obobɔ, okɛɛn yɛ awa ɔ̃ywal eluɔ, bee nkyal osa kwɛn baal atal yɛ. Baal a pfuru abesa bubu onse ãnzɔ m’ãbuɛɛn y’ababal, kwɛn baal atuɛɛn bɔ. Taa-taa bam, mɛ̃ eyɛɛn byɛ wɛn, bɔ ŋ’amaabɔɔ ebva-kab ki bɔ. 3 Kɛn a yɛ, ŋ’ewa kuɔɔl e yɛ ki elam ɔ̃ywal eluɔ, ywɔɔl kwɛn kuɔɔl e yɛ ki ekal ebee oyɛɛ. 4 M’emfa okyɛ, ebvaan kwɛn kab e yɛ olɔ ekal m’odziɔɔn. Obobɔ, Tal a yɛ wu abemwɛn m’ãbwel m’edziɔɔn, àbveel yɛ kab olɔ.»

5 Yeso bvool olieel ndiri: «Byɛ eboobuɛɛn, ebee onge baal a pfuru okal, b’adzii k’abuɛɛn tɛ m’ɔ̃kiri k’ãnzɔ m’ãbuɛɛn, ye k’ãmboo m’emwɛɛn ɛ̃siɔɔn, kwɛn baal atal bɔ. Taa-taa bam, mɛ̃ eyɛɛn byɛ wɛn, bɔ oŋɔ̃ ŋ’amaabɔɔ ebva-kab ki bɔ. 6 Kɛn a yɛ, ŋ’eboobuɛɛn yɛ, sam bam onse ngwel-a-nzɔ, kuru ɔ̃nywa a yɔ, kwɛn yɛ buɛɛn Tal a yɛ wu oli oŋɔ̃ m’edziɔɔn. Obobɔ, Tal a yɛ wu amwɛn m’ãbwel m’edziɔɔn, àwa yɛ ebva-kab.»

7 Yeso bvool olieel ndiri: «Byɛ, ŋ’eboobuɛɛn byɛ, ebee ãndɔɔ ãmamã oyɛɛn nsa bibi, onge baal bɛn k’ayɛɛ Nziã wɛ. Bɔ atsam wɛn Nziã ayoo bɔ, me ndɔɔ yi eyɛɛn bɔ boo-boo. 8 Ebee onge bɔ osa. Ke ngwel wɛ, Tal a byɛ oyɛɛ ki eli byɛ ye kɔɔ e kyɛ, ye k’esɔɔ byɛ kyɛ.»

9 Yeso bvool olieel ndiri: «Obobɔ, etal emfa ki ebuɛɛn byɛ:

"Tal a bee wu oli ke ywel,

yɔɔl nkuũ a yɛ ekal ye nsia,

10 yɔɔl Okwɛn o yɛ oya,

yɔɔl kwɛn asa b’edzii yɛ me nsie,

onge b’asa bɔ ke ywel. 11 Wa bee nonɔ̃ bvi-odza bvi tsoo bwɛn a tsoo.

12 Dzeel ãbi ã bee,

onge b’edzeel bee hɛ̃ baal b’asi bee obi.

13 Oyɛɛ ke yɔɔl kwɛn bee ebva m’ɔ̃mbio wɛ,

kɛn a bvuul bee me mviɔɔl mi ɔ̃pfu.

[Ke ngwel wɛ omfam ye waan ye lweel eli bvi yɛ ɔ̃bu. Amɛn*.]"

14 Ke ngwel wɛ, okɛɛn byɛ edzeel baal b’asa byɛ obi, Tal a byɛ wa ke ywel àdzeel ãbi ã byɛ hɛ̃. 15 Kɛn a ŋɛn, byɛ k’edzeel baal b’asa byɛ obi wɛ, Tal a byɛ wa ke ywel hɛ̃ k’àdzeel ãbi ã byɛ wɛ.»

16 Yeso bvool olieel ndiri: «Byɛ eboosa ãbuɛɛn mã me nzal, ãsu ã byɛ ãbee ãwua-ãwua okal, onge b’ebesa baal a pfuru: Bɔ abesuul ãsu fel-fefel, kwɛn baal bueel ayɛɛ kwɛn bɔ aboosa ãbuɛɛn mã me nzal. Taa-taa bam, mɛ̃ eyɛɛn byɛ wɛn, bɔ ŋ’amaabɔɔ ebva-kab ki bɔ. 17 Kɛn a yɛ, ŋ’eboosa yɛ ãbuɛɛn mã me nzal, suɔɔl osu o yɛ, kel ãnasi m’ɔ̃tswɛ a yɛ. 18 M’emfa okyɛ, yɛ k’àsuo baal kwɛn yɛ abesa ãbuɛɛn mã me nzal wɛ, yɛ àsuo kɛn a Tal a yɛ wu oli oŋɔ̃ m’odziɔɔn. Obobɔ, Tal a yɛ wu amwɛn m’ãbebwel m’edziɔɔn, àwa yɛ ebva-kab.»

19 Yeso bvool olieel ndiri: «Ebee opfel me nsie obvool. Me nsie ŋã, asieel adza bɔ, bɔ oburu nkoo, baal a pfuul abwel ãnzɔ me ndɔɔ yi ayeturu bɔ. 20 Ebvool opfel kɛn a ke ywel. Okɔ, asieel k’akoo k’adza bɔ wɛ, bɔ k’oburu nkoo wɛ, baal a pfuul k’akoo k’abwel ãnzɔ me ndɔɔ yi ayeturu bɔ wɛ. 21 Ke ngwel wɛ, mboo yi eli opfel o yɛ, ɔ̃kwal a yɛ hɛ̃ àkal okɔ.»

22 Yeso bvool olieel ndiri: «Mviil ã yɛ ãli mbunda a nzuru a yɛ. Okɛɛn mviil ã yɛ ãli ngesɛ, nzuru a yɛ yueel hɛ̃ èkal onse okal-a-kal. 23 Kɛn a ŋɛn mviil ã yɛ ãli y’ãluu, nzuru a yɛ yueel hɛ̃ èkal onse empeel. Obobɔ, okɛɛn okal-a-kal b’oli onse yɛ oyii empeel, empeel olɔ èkal li enduru ɔ̃ndel!»

24 Yeso bvool olieel ndiri: «Ɔ̃nkyal ngɔmɔ̃ k’akoo m’okal m’amfam buaal wɛ: Okɛɛn ndɛ abyal ngɔmɔ̃, ndɛ àdzii wukyɛ, okɛɛn ndɛ akuru nzuru me ngɔmɔ̃, ndɛ àfiɛɛn wukyɛ. Okɛɛn byɛ eli ankyal a Nzi, byɛ k’ekoo k’esal me ndɔɔ a Nziã wɛ*.»

25 Yeso bvool olieel ndiri: «Obɔ otsɛn bɛn mɛ̃ eyɛɛn byɛ wɛn, me ndɔɔ elaã e byɛ, ebee nguo okɛɛ me bvi èdza byɛ, wuo bvi enywã byɛ. Me ndɔɔ a nzuru a byɛ, ebee nguo okɛɛ me bvi èlaal byɛ. Elaã e byɛ k’enduru bvi-odza m’ɔ̃bvɛn wɛ, nzuru a byɛ hɛ̃ k’enduru ekɔ m’ɔ̃bvɛn wɛ? 26 Etal anywɛn: Bɔ k’akwɛn wɛ, bɔ hɛ̃ k’atsam wɛ, bɔ k’ali y’ãmboo m’akwɛɛ nsia wɛ. Kɛn a Tal a byɛ wa ke ywel abeliil bɔ. Byɛ k’enduru bɔ me dzuun wɛ? 27 Ondɛ mbuul nã wɛn ŋ’ekɛɛ ndɛ nguo m’omwiĩ o ndɛ, okoo k’alweel bɔ elio-lio?

28 Ndɔɔ mã yi ekɛɛ byɛ nguo m’olaal? Etal emfa ki ekwel bviĩ bvi ebvɛ-ebvɛ bvi ãnguun: Bvɛ k’esal wɛ, bvɛ hɛ̃ k’ebaan ekɔ wɛ. 29 Kɛn a mɛ̃ eyɛɛn byɛ wɛn, okyam ɔ̃kwɛn Salomɔ̃ y’opfel bueel b’éli a ndɛ, k’álaal ekɔ bvi ebvɛ-ebvɛ onge bviĩ obvɛ wɛ. 30 Bviĩ bvɛn nonɔ̃ ŋã eli, ɔ̃suu atsiil, atyel onse mbaa. Okɛɛn Nziã alaal bvɛ m’emfa okyɛ, oŋɔ̃ b’ekwɛɛn ndɛ olaal byɛ, baal b’okiool otsi-tsiri! 31 Obobɔ, ebee nguo okɛɛ wɛn: "Ki edza bee emã?" Wuo "ki enywã bee emã?", wuo bvool "ki elaal bee emã?" 32 Baal b’abebii bvɛ owuun wɛ bɛn k’ayɛɛ Nziã wɛ. Kɛn a Taal wa ke ywel oyɛɛ kwɛn byɛ eli ye kɔɔ li eluɔ obvɛ. 33 Ŋ’ɛ̃kwel kɛn, ebii Okwɛn o Nziã ye m’edzii ndɛ, ke mbee oŋɔ̃ ndɛ awa byɛ bvi esiil. 34 Obobɔ, ebee nguo okɛɛ me ndɔɔ ɔ̃suu, ke ngwel wɛ ɔ̃suu àkɛɛ nguo me ndɔɔ a ndyam. Tsoo bwɛn a tsoo eli y’ãmpal m’ãkoo me ndɔɔ a lɔ.»