Mateus 8

Yeso oboo mbuul wa y’ãluu me leba

1 Ŋ’esool Yeso ke ywel a nkio, embuul e baal eluɛɛn a ndɛ. 2 Mbuul ngɔmɔ̃ wa y’ãluu me leba osyel tsotsoo a ndɛ, obvi ãbuo ke nkwel a ndɛ, bu aluɔɔn ndɛ ndiri: «Mfam, okɛɛn yɛ dzii, sa kwɛn mɛ̃ nkal tsɛtsɛ*8.2 «Tsɛtsɛ» ŋã, wu ebvuul mbuul wa y’ãluu me leba. Ndɛ ŋ’abɔɔ nkuul yi akɔɔl onse baal bvool asam Nzɔ a Nziã.!» 3 Yeso onaan kuɔɔl, onywɛn me ndɛ, bu alieel ndɛ ndiri: «Mɛ̃ nzii obobɔ, kal tsɛtsɛ!» Bam kɛn alili oŋɔ̃, ndɛ oyii tsɛtsɛ. 4 Yeso bu atam ndɛ bubu osa: «Bee mbuul si ngɔmɔ̃ oliaal, yi y’asuo nzuru a yɛ ola ngaa-a-Nziã, kwɛn ndɛ atal yɛ ngesɛ. Wa kab hɛ̃, m’emfa ki ékel Moyize onse ɔ̃kaan wu ãngel, m’emfa okyɛ, baal bueel àyɛɛ kwɛn yɛ oluu ofi✝8.4 Lev 14.2-32.»

Yeso obvuul ɔ̃sal a mbiri a ambwel-mbwel wa Lom

5 Ŋ’ékesam Yeso onse ola bo Kapelanahum, mbiri a mbwel-mbwel ɔ̃nkam ngɔ̃mɔ̃ wa Lom osyel tsotsoo a ndɛ, bu aluɔɔn ndɛ bubu: 6 «Mfam, ɔ̃sal a mɛ̃ oli bɔ ke nzɔ m’oluu b’emfaan, bvool amwɛn mpal yam bibi.» 7 Yeso obveel ndɛ ndiri: «Mɛ̃, mɛ̃ èyebvuul ndɛ.» 8 Mbiri a mbwel-mbwel obveel ndɛ bubu: «Mfam, mɛ̃ ke mbvaan wɛ kwɛn yɛ sam onse nzɔ a mɛ̃. Yɛɛn kɛn a ndɔɔ ngamɔ̃, ɔ̃sal a mɛ̃ àbvuul! 9 Ke ngwel wɛ, mɛ̃ ebelweel amfam ba ke ywel a mɛ̃. Kɛn a mɛ̃ hɛ̃ ndi y’ambwel-mbwel ba ke nsɛn a mɛ̃ b’ayoo mɛ̃. Mɛ̃ ongyɛɛn ngɔmɔ̃ wɛn: "Yi!", ndɛ oyɛn. Mɛ̃ ongyɛɛn wukyɛ wɛn: "Ya!", ndɛ hɛ̃ oyi. Bvool okɛɛn mɛ̃ ntam ɔ̃sal a mɛ̃ wɛn: "Sa bubu!", ndɛ hɛ̃ osi obobɔ.» 10 Ŋ’eyoo Yeso ãyɛɛn ã mbuul ondɛ, ndɛ okam, bu ayɛɛn ye baal b’ákeluɛɛn a ndɛ bubu: «Taa-taa bam, mɛ̃ eyɛɛn byɛ wɛn, ola mbuul si ngɔmɔ̃ k’Isalayel, mɛ̃ kɛn amwɛn okiool bo bubu wɛ. 11 Mɛ̃ eyɛɛn byɛ wɛn, baal bibi akieel afa etswi ki epal tal ye ki edziin lɔ. Bɔ akieel ayewal ãmboo, me ndɔɔ yi adza y’Abalayam, y’Isak ye Dzakab onse Okwɛn o ywel. 12 Kɛn akieel atyal baan b’Okwɛn onse empeel li onkwel-a-nzi. Oyɔ mboo yi elel y’otiɛɛn o miin.» 13 Ke mbee oŋɔ̃, Yeso olieel mbiri a mbwel-mbwel ondɛ ndiri: «Yi ngesɛ, ki esɔɔ yɛ y’okiool, Nziã owi yɛ kyɛ!» Me lio alili, ɔ̃sal a ndɛ oyii nzuru kɛɛ-kɛɛ.

Yeso oboo anga-ãluu

14 Ke mbee oŋɔ̃, Yeso oyɛn nzɔ a Piɛɛl. Oŋɔ̃, ndɛ oyebɔɔ okɔ o Piɛɛl wu ɔ̃kaal bɔ, ndɛ áli ye baa. 15 Yeso osiin ndɛ me kuɔɔl, ndɛ baa bu efi. Ndɛ otɛɛn, bu abvi osal me ndɔɔ a Yeso.

16 M’ãnkunkwal, ayi Yeso ye baal bibi b’áluul m’ɛ̃fel mi ɛ̃bi-ɛ̃bi. Ndɛ otswɛɛl ɛ̃fel omyɛ̃ kɛn a m’eyɛɛn ngelemɔ̃, bvool obvuul anga-ãluu bueel. 17 M’emfa okyɛ, ŋ’ãsi m’élieel ɔ̃liaal-ɛ̃kiɛɛn Nziã Edzayi, ndiri:

«Ndɛ owel elyam e bia-byɛ,

bvool obiri ãluu ã bia-byɛ✝8.17 Edz 53.4.»

B’adzii k’anɔɔn a Yeso

18 Ŋ’emwɛn Yeso embuul e baal ki édzii ndɛ, ndɛ otam ayio k’abwel ye ndɛ ongwel a baã. 19 Ɔ̃yiool-ãngel ngɔmɔ̃, osyel tsotsoo, bu alieel ndɛ ndiri: «Ɔ̃tee, mɛ̃ ènɔɔn a yɛ ãmboo mam mbueel m’èyi yɛ.» 20 Yeso obveel ndɛ bubu: «Ambwel ali y’ãywɛn m’akal, anywɛn hɛ̃ ali y’ãnzɔ. Kɛn a Muaan a mbuul k’ali ye mboo yi awuun wɛ.»

21 Mbuul ɔ̃kyam onse ayio olieel Yeso bubu: «Mfam, mewa mɛ̃ kɛn nkuul yi eyedziool taal.» 22 Kɛn a Yeso olieel ndɛ bubu: «Luɛɛn a mɛ̃, yɔɔl b’ákwi-ákwi adziool ebiĩ e bɔ*8.22 Ndɔɔ oyɔ edzii k’eyɛɛn ndiri: Ɔ̃sal a yɛ ke w’adziool b’amakwa wɛ!✝8.22 Luk 9.60.»

Yeso otɛɛl mfel

23 Ke mbee oŋɔ̃, Yeso osam onse ebɛɛ, ayio a ndɛ aluɛɛn a ndɛ. 24 Enseel oŋɔ̃, mfel ndyam wa kokɔ obvi opob me nzal, m’emfa kyɛn epoo ebvi ebɛɛ oluul m’ãdza. Kɛn a Yeso áli me twal. 25 Ayio asyel tsotsoo a ndɛ, aseel ndɛ ndiri: «Mfam, Mfam, syool, bvuul bee, bee ol’ekwi!» 26 Yeso olieel bɔ ndiri: «Otsɛn omã b’eli byɛ ye buɔ, baal b’okiool otsi-tsiri!» Ndɛ bu atɛɛn apɛɛn mfel y’ãdza. Ɔ̃lii wa kokɔ bu abvi. 27 Ayio ɛ̃kam ɛ̃si, bu abvi ofuul bam-a-bam ndiri: «Wu mbuul wa bwɛn-a-bwɛn? Onkyam mfel ayoo ndɛ, ãdza hɛ̃ ãyoo ndɛ!»

Yeso obvuul baal buaal b’áluul m’ɛ̃fel mi ɛ̃bi-ɛ̃bi

28 Yeso otɔ ongwel a nzal k’ɔ̃kiri wu eli bviil li Ngelasa. Baal buaal b’áluul m’ɛ̃fel mi ɛ̃bi-ɛ̃bi apal onse ãmpiɛɛn, ayemwɛɛn ye ndɛ. Baal obɔ áli ye kyal li bibi, m’emfa kyɛn k’éli ye mbuul wɛn al’okoo k’abwel me nkuul oyɔ wɛ. 29 Bɔ bu abvi ɛ̃sɔɔl okuaal bubu: «Muaan a Nziã, yɛ ye bee ndɔɔ mã? Yɛ bee mpal yi otuaal ye k’ekoo lio li ètsiil Nziã ãndɔɔ ã baal?»

30 Ŋ’esa oŋɔ̃, éli y’ɔ̃kel wu anguru wu ákedza m’opal obɔ. 31 Ɛ̃fel mi ɛ̃bi-ɛ̃bi ɛ̃lɛɛn Yeso ndiri: «Okɛɛn yɛ dzii k’atswɛɛl bee, meyuɔɔl bee onse ɔ̃kel wu anguru wu!» 32 Yeso bu alieel myɛ̃ ndiri: «Eyesam!» Myɛ̃ ɛ̃pal bu ɛ̃yesam onse anguru. Obobɔ, anguru bam bueel akuul nzuru nkal a nkio, ayeyiool onse nzal, bu adziin onse ãdza. 33 Baal b’ákekiaal anguru obɔ abal. Bɔ ayɛn ayetsal nsia a ãndɔɔ mbueel m’ã́bwel onse bviil, bvel-bvel m’ãbwel me baal b’áluul m’ɛ̃fel mi ɛ̃bi-ɛ̃bi. 34 Obobɔ, baal a bviil bueel ayemwɛɛn ye Yeso. Ŋ’emwɛn bɔ ndɛ, bɔ aluɔɔn ndɛ k’apal onse nsie a bɔ.