1 Yeso osam onse ebɛɛ, otsiil nzal, bu ayɛn bviil e ndɛ*9.1 Bviil li aliaal ŋã, li Kapɛrnahum.. 2 Etɔ oŋɔ̃, baal ayi ndɛ ye mbuul wu ekal wu áli bɔ nkal a ekal. Ŋ’emwɛn Yeso okiool o bɔ, ndɛ olieel mbuul ondɛ bubu: «Muaan a mɛ̃, kal ye mpɛn! Adzeel ãbi ã yɛ.» 3 Ayiool b’ãngel ke kwɛ abvi bam-a-bam oyɛɛn bubu: «Ngaburu wu asiaan Nziã!» 4 Onge bɛn Yeso otaal ãtsam m’ɛ̃kwal ɛ̃ bɔ, ndɛ olieel bɔ bubu: «Ndɔɔ mã yi eli byɛ y’ãtsam m’ãbi-ãbi? 5 Ayɛɛn ndiri: "Adzeel ãbi ã yɛ", oyɔ k’eli ndɔɔ yi mpal m’oyɛɛn wɛ, kɛn ayɛɛn ndiri: "Tɛɛn yi", oyɔ ndɔɔ yi enduru mpal m’oyɛɛn! 6 Ngesɛ, ebvaan byɛ eyɛɛ kwɛn Muaan a mbuul oli y’omfam b’adzeel ãbi me nsie yi.» Obobɔ, ndɛ wu Yeso olieel ekal okyɛ ndiri: «Tɛɛn, wal ekal e yɛ, bvool yi nzɔ!» 7 Mbuul ondɛ hɛ̃ otɛɛn, bu ayɛn nzɔ. 8 Ŋ’emwɛn baal obobɔ, bɔ buɔ obɔɔ, bu alweel Nziã wu owi baal omfam b’obobɔ.

9 Ŋ’ékebwel Yeso, ndɛ omwɛn mbuul wu awal mpal wɛn nkuũ Lebvi*9.9 Nkuũ Lebvi hɛ̃ Matie.✝9.9 Mak 2.14-15; Luk 5.27. Ndɛ áli me nsɛn ke mboo a ndɛ yi ɔ̃sal. Yeso olieel ndɛ ndiri: «Luɛɛn a mɛ̃.» Lebvi otɛɛn, bu aluɛɛn a ndɛ.

10 Tsoo ngelemɔ̃, Yeso ákedza onse nzɔ a Lebvi. Baal bibi b’awal mpal, ye baal b’ãbi akyam, ákedza ye ndɛ y’ayio a ndɛ. 11 Afalisaye ayemwɛn obobɔ, bɔ alieel ayio a ndɛ bubu: «Ndɔɔ mã yi edza Mfam a byɛ ye baal b’awal mpal, ye baal b’ãbi?» 12 Yeso ayoo obobɔ, olieel ndiri: «Baal ba kɛɛ-kɛɛ k’ali ye kɔɔ li ɔ̃boo wɛ, abieel b’ali ye kɔɔ e ndɛ. 13 Eyefuul otsɛn b’ãndɔɔ m’ákel onse ɛ̃nkaan ndiri: "Mɛ̃ nzii osio o baal nyiĩ, k’ãkab wɛ." Ke ngwel wɛ, mɛ̃ ke ngyi me ndɔɔ yi eta baal ba dzu mbel wɛ, be yenta mɛ̃ mbel, baal b’ãbi.»

14 Obobɔ, ayio a Dzaã ayefuul Yeso bubu: «Bee y’Afalisaye ebesa ãbuɛɛn mã me nzal ɛ̃nswɛɛl-ɛ̃nswɛɛl. Ke ndɔɔ mã yɛn ayio a yɛ k’abesa mɔ̃ wɛ?» 15 Yeso bu abveel bɔ bubu: «Andoo b’ɔ̃baal ol’akal me mpiri ŋ’eli ndɛ kɛn ye bɔ? Kɛn ãtsoo ãkieel ãya m’ambaal ɔ̃baal onse bɔ. Obobɔ, bɔ akieel obee odza m’ãlio omɔ̃.»

16 «K’eli ye mbuul wu abaan ekɔ ki tsɔɔn me mpɛɛl ekɔ ki enyiɔɔn wɛ. Ndɛ asa obobɔ, mpɛɛl ekɔ ki enyiɔɔn ol’embaal mpɛɛl ekɔ ki tsɔɔn. Pfee li ekɔ ki etsɔɔn bu eyii lam wuɔɔn. 17 Emfa kiki, k’abekaal mbal m’ãlili onse ãmfel m’ãmaayiil wɛ. Asa obobɔ, mbal m’alili ol’ãbwel ãmfel omɔ̃: Ãmfel ol’ãbool, mbal bu ãtsɔɔn me nsie. Mbal m’alili, ebvaan alɔ mɔ̃ kɛn onse ãmfel m’alili, obobɔ ãmfel ye mbal, àkwɛɛ mɔ̃ mam mbueel ngesɛ*9.17 Awi otsɛn b’ãmboo omɔ̃ onse ɔ̃nkaan wa Luk. ✝9.17 Luk 5.33-38.»

18 Ŋ’ékeliaal Yeso bɔ ãndɔɔ omɔ̃, pfa, mfam ngɔmɔ̃ oyi. Ndɛ obvi ãbuo ke nkwel a ndɛ, bu alieel ndɛ ndiri: «Muaan a mɛ̃ wu ɔ̃kaal otsuul mwĩi alili ŋã. Oŋɔ̃ ya, ndɔɔl ndɛ mviɔɔl, kwɛn ndɛ abvuul.» 19 Yeso otɛɛn, bu aluɛɛn a ndɛ y’ayio a ndɛ wu Yeso.

20 Ŋ’esa oŋɔ̃, éli y’ɔ̃kaal ngɔmɔ̃ wu áli y’ãluu m’ékepal ndɛ ãkel. Ãluu omɔ̃ ál’ãmaayiil ye ndɛ mvel kuun ye yuaal. Ndɛ oyi ke mbee a Yeso, onywɛn me nswɛ a ekɔ e ndɛ. 21 Ke ngwel wɛ, ndɛ ákeyɛɛn ndyam-a-ndyam ndiri: «Okɛɛn mɛ̃ nywɛn kɛn a m’ekɔ e ndɛ, mɛ̃ olɔ mvuul!» 22 Yeso atal mbee, omwɛn ndɛ, bu alieel ndɛ ndiri: «Muaan a mɛ̃, kal ye mpɛn! Okiool o yɛ obvuul yɛ.» Kɛn a me lio alili, ɔ̃kaal ondɛ obvuul.

23 Ŋ’etɔ Yeso ke nzɔ a mfam ondɛ, ndɛ omwɛn baal b’ákefel ãnsiɛɛn ke ndwɔɔ ye b’ákesa nkyal. 24 Ndɛ olieel bɔ ndiri: «Epal, ke ngwel wɛ nsam a ɔ̃kaal k’akwi wɛ, ndɛ twal alaal.» Kɛn a bɔ abvi ndɛ osyob. 25 Ŋ’apaal baal nkwel-a-nzi, Yeso osam onse nzɔ, osiin nsam ɔ̃kaal me kuɔɔl, ndɛ bu asiool. 26 Nsia oyɔ bu etsɔɔn m’etwi e nsie kyam kieel.

27 Ŋ’embal Yeso oŋɔ̃, ɛ̃nkwa-mviil mviaal ɛ̃yii ɛ̃luɛɛn a ndɛ, bvool ɛ̃yii ɛ̃biool ndiri: «Muaan a David*9.27 «Muaan» wu ayɛɛn ŋã, ɔ̃tiɔɔl. , sio bee nyiĩ!» 28 Ŋ’etɔ Yeso nzɔ, baal b’ɛ̃kwa-mviil o bɔ asyel tsotsoo a ndɛ, ndɛ bu afuul bɔ bubu: «Byɛ ekiool wɛn mɛ̃ nkoo k’esa obobɔ?» Bɔ akiool ndiri: «Hɛɛ̃, Mfam!» 29 Obobɔ, Yeso osiin mviil ã bɔ, bu alieel ndiri: «Yɔɔl kwɛn asa byɛ ãndɔɔ m’emfa ki ekiool byɛ.» 30 Ɛ̃kiri-anka oŋɔ̃, mviil ã bɔ ãdzweel nzuru. Yeso bu awi bɔ ãnkunkwa ndiri: «Mbuul ndɔɔ oyɔ oyɛɛ wɛ.» 31 Kɛn a ŋ’epal baal obɔ onse nzɔ, bɔ atsal nsia a Yeso m’etswi e nsie kieel.

32 Ŋ’eyii eyi bɔ, ayi a Yeso mbuul wu áluul m’ɔ̃fel wu ɔ̃bi-ɔ̃bi wu ákesa kwɛn ndɛ k’ákeyɛɛn wɛ. 33 Ŋ’etswɛɛl Yeso ɔ̃fel wu ɔ̃bi-ɔ̃bi, mbuul ondɛ obvi oyɛɛn. Baal akam bvool ayɛɛn ndiri: «Ndɔɔ yi bubu, lɔɔ-okal kɛn emwɛn yɔ m’Isalayɛl wɛ!» 34 Kɛn Afalisaye ayɛɛn ndiri: «Ndɛ abetswɛɛl ɛ̃fel mi ɛ̃bi-ɛ̃bi me waan e mfam a myɛ̃!»

35 Yeso ákedzuu m’ãla y’ãbviil mbueel, ndɛ ákeyiool m’ãnzɔ m’ãbuɛɛn ã bɔ, áketsal Nsia yi Ngesɛ yi Okwɛn o Nziã bvool ákeboo ãluu mbueel y’elyam bvieel. 36 Ŋ’emwɛn ndɛ embuul e baal, ndɛ nyiĩ a bɔ yam ebɔɔ, ke ngwel wɛ bɔ al’ayii ɛ̃kwal ke ywel bvool nzuru alemeesool, onge emɛ̃mɛɛ̃ bvi eywɛn a ɔ̃nkiaal. 37 Obobɔ, ndɛ olieel ayio a ndɛ ndiri: «Nsia yi aka onse nguun eli bibi, kɛn asal ali atsi-tsiri! 38 Oŋɔ̃ ebuɛɛn nga-nguun kwɛn ndɛ ayuɔɔl asal onse nguun a ndɛ.»