1 Obobɔ, mɛ̃ efuul wɛn: Nziã yam e ndɛ eboo atiɔ? K’obobɔ bam wɛ! Ke ngwel wɛ, myam ndi ɔ̃fi-Isalayel, ɔ̃tiɔɔl a Abalayam. Mɛ̃ mpal me yam li Bɛnzamɛ̃. 2 Nziã k’atiɔ yam e ndɛ eboo wɛ, yam li éyɛɛ ndɛ ŋ’ɛ̃kwel. Onse Ɔ̃nkaan a Nziã, Eli wu ɔ̃liaal-ɛ̃kiɛɛn a Nziã oyefɛn yam li Isalayel ola Nziã. Byɛ k’eyɛɛ ndɔɔ oyɔ wɛ? 3 Tal b’élieel ndɛ wu Eli: «Mfam, bɔ abam aliaal-ɛ̃kiɛɛn a yɛ, bɔ atsal ãnkiin m’awa yɛ ãkab. Mɛ̃ nsiil myam ɔ̃tu, bvool bɔ adzii k’abam mɛ̃ hɛ̃! 4 K’ɔ̃mveel wu ébveel Nziã ndɛ ɔ̃mã? Mɛ̃ nkwee baal amiil nsiaan (7.000), bɛn k’abvi ãbuo ke nkwel a nziã wa Bahal*11.4 Bahal oli nziã wu etiɔ wu afi-kanaan wu ábiri k’Isalayel. Me lio li ɔ̃liaa-ɛ̃kiɛɛn a Nziã Eli, baal bibi al’ayii abuɛɛn ndɛ (1Ak 18). wɛ.» 5 Emfa kiki hɛ̃, me lio li, eli ye baal ke kwɛ b’abvuul, b’ésueel Nziã me nyiĩ a ndɛ.

6 Kɛn okɛɛn Nziã osueel bɔ me nyiĩ a ndɛ, ŋɛn k’eli me ndɔɔ ɛ̃sal ɛ̃ bɔ wɛ. Al’okɛɛn me ndɔɔ ɛ̃sal, ŋɛn nyiĩ k’ebekal nyiĩ bvool wɛ. 7 Ŋ’ayɛɛn ndiri nki? Ki ebii Isalayel, ndɛ k’abɔɔ kyɛ wɛ. Kɛn a b’ésueel Nziã, bɔ abɔɔ bvi ekebii bɔ. Me b’otal bakyɛ, Nziã osuul bɔ ayii y’ɔ̃tswɛ mpɛn. 8 Ngwanywã, Ɔ̃nkaan a Nziã ayɛɛn ndiri:

«Tiil nonɔ̃ ŋã, Nziã osi kwɛn ɔ̃fel a bɔ akal me twal.

Obobɔ, bɔ ali ye mviil, kɛn a bɔ k’amwɛn eluɔ si ngemɔ̃ wɛ,

ali y’ãtswi, kɛn bɔ k’ayoo ndɔɔ si ngamɔ̃ wɛ.» 9 Ɔ̃kwɛn David olieel bubu:

«Yɔɔl kwɛn bvi-odza e bɔ ekal

onge bɛɛ wu ekwɔɔl bɔ,

onge okii b’etoo bɔ

onge eluɔ ki abɛɛl tsa me kyɛ, kwɛn bɔ abva, bvool abɔɔ etumbu ki ebvaan me bɔ! 10 Yɔɔl kwɛn mviil ã bɔ ãbva empeel, kwɛn bɔ abee eluɔ omwɛn!

Suul bɔ akal ɛ̃nguo ebva ãlio mbueel!»

11 Obobɔ, mɛ̃ efuul wɛn, ŋ’ebɛɛl Ayuda tsa, bɔ ŋ’abvi ɔ̃bu? K’obobɔ bam wɛ! Kɛn me ndɔɔ elyal e bɔ, baal bɛn k’Ayuda wɛ abɔɔ obvuul, kwɛn esa bɔ b’afi-Isalayel efeel. 12 Okɛɛn elyal ki Ayuda ewi opfel bibi m’ɔ̃kiri, bvool okwal o bɔ owi bɛn k’Ayuda wɛ opfel bibi, kieel ol’ekal bwɛn-a-bwɛn ŋ’ekieel esam Ayuda bam onse obvuul b’ɔ̃koo?

13 Mɛ̃ boongyɛɛn ye byɛ bɛn k’Ayuda wɛ: Onge bɛn mɛ̃ ndi ntam a baal bɛn k’Ayuda wɛ, mɛ̃ elweel ɔ̃sal a mɛ̃. 14 M’emfa okyɛ, mɛ̃ etsam wɛn mɛ̃ ol’esi baal a yam e mɛ̃ efeel, kwɛn bakyɛ onse bɔ abvuul. 15 Ke ngwel wɛ, ŋ’ésuul Nziã bɔ me pyɛ, ndɛ ábveel ondoo y’ɔ̃kiri. Obobɔ, ŋ’ekieel eyɔɔ ndɛ bɔ bvool, k’ekal onge bɛn b’akwi-ákwi asiool wɛ? 16 Okɛɛn boo e pɔtɔ-pɔtɔ li amampa li ɛ̃kwel eli li ngel, pɔtɔ-pɔtɔ wu osiil wueel àkal wa ngel hɛ̃. Okɛɛn hɛ̃ ɛ̃dza mi ɔ̃ti ɛ̃li mi Nziã, ãpɔɔ̃ ã̀kal mã ndɛ hɛ̃. 17 Yam li Isalayel eli onge ɔ̃ti wu Olive vu ákwɛn m’okwɛn, wu átsiil ãpɔɔ̃ mãkyɛ. Yɛ wɛn k’Ɔ̃yuda wɛ, yɛ li onge ɔ̃ti wu Olibve wu edzwa, ándɛɛl yɛ onse ãpɔɔ̃ m’ãsiil. Obobɔ, yɛ hɛ̃ yii abɔɔ bvel li ãdza m’ãfa k’ɛ̃dza mi Olibve. 18 Obɔ otsɛn bɛn, bee ntwel obɛɛl ke nkwel ãpɔɔ̃ m’atsiil. Kɛn okɛɛn ekoo m’osa kwɛn yɛ bɛɛl ntwel, yɛɛ wɛn wu abiri ɛ̃dza ke yɛ wɛ, kɛn a myɛ̃ mi ɛ̃biri yɛ. 19 Owɛɛl yɛ koo k’ayɛɛn wɛn: Nziã ámbaal ãpɔɔ̃ me ndɔɔ yi andɛɛl mɛ̃ ndyam. 20 Ngwnywã! Nziã ámbaal mɔ̃ me ndɔɔ yɛn mɔ̃ ãywɛn okiool. Kɛn a yɛ, yɛ Nziã andɛɛl yɛ me ndɔɔ yɛn yɛ li y’okiool. Obobɔ, bee nzuru ondɛɛl, bal Nziã. 21 Ke ngwel wɛ, onge bɛn Nziã k’ákwɛɛn k’atsiil ãpɔɔ̃ m’ɔ̃ti wu ákwɛn m’okwɛn wɛ, oŋɔ̃ wu ekwɛɛn ndɛ otsiil yɛ wu ándɛɛl m’ondɛɛl? 22 Tal, Nziã oli ngesɛ, bvool k’abveel kuul mbee wɛ: Ndɛ awa b’abvi etumbu, k’abveel kuul mbee wɛ. Ndɛ oli ngesɛ ke ola yɛ, okɛɛn yɛ kal onse obvɛ o ndɛ. Okɛɛn k’obobɔ wɛ, àtsiil yɛ hɛ̃. 23 Emfa kiki hɛ̃ me bɔ, okɛɛn bɔ apal onse oywɛn b’okiool, Nziã àndɛɛl bɔ m’ɔ̃ti. Nzal-a-ŋɛn, ndɛ oli ye waan li andɛɛl bɔ bvool. 24 Ngwanyã, yɛ áli pɔɔ̃ li ɔ̃ti wu Olibve wu edzwa. Átsiil yɛ, bvool ándɛɛl yɛ m’ɔ̃ti wu Olibve wu ákwɛn m’okwɛn. Kwɛn ŋɛn ɔ̃ti ondɛ k’ali etsɛn e yɛ wɛ. Me b’otal Ayuda, bɔ ali ãpɔɔ̃ m’ãmɛn me mam m’ɔ̃ti wu ákwɛn m’okwɛn. Obobɔ, Nziã àndɛɛl bɔ bam fool pyɛ nkal ɔ̃ti a bam, wu émɛn bɔ.

25 Andoo a mɛ̃, mɛ̃ nzii kwɛn byɛ ebee ndɔɔ yi m’edziɔɔn yi odzɛɛn, kwɛn byɛ ebee byam owal onge anga-ãyal: Baal b’Isalayel bakyɛ àkal y’ɔ̃tswɛ-mpɛn tiil ye k’ebɔɔ ãyam mbueel mã baal bɛn k’Ayuda wɛ ãbvuul. 26 M’emfa okyɛ, yam li Isalayel lueel ekieel ebvuul, onge b’ákel ndiri: «Ɔ̃mvuul àfa Siɔ̃. Ndɛ àmbaal elyal ki ãyam ã Dzakab.

27 Okyɛ emfa ki èkal ondoo o mɛ̃ ye bɔ,

me lio li ekieel embaal mɛ̃ ãbi ã bɔ.»

28 Me b’otal Nsia yi Ngesɛ, bɔ ali ataal a Nziã, me ndɔɔ obvɛ o byɛ. Kɛn a me b’otal emfa ki esuaal Nziã, Nziã odzii bɔ me ndɔɔ ankiɔɔn a bɔ. 29 Ke ngwel wɛ, Nziã k’awɛɛl ãkab m’ewi ndɛ onse nyiĩ a ndɛ wɛ, bvool k’aswɛɛl ãtsam ã ndɛ wɛ me ndɔɔ a b’eti ndɛ mbel. 30 Byɛ, byɛ tsɔɔn al’ébee k’élweel Nziã, kɛn a meba Nziã osio byɛ nyiĩ, me ndɔɔ yɛn Ayuda k’álweel ndɛ wɛ. 31 Eli emfa kiki hɛ̃ me bɔ: Meba, bɔ abee k’alweel Nzia, me ndɔɔ yɛn ndɛ osio byɛ nyiĩ. M’emfa okyɛ, Nziã osio bɔ nyiĩ hɛ̃. 32 Ke ngwel wɛ, Nziã owɔɔl baal bueel onse oywɛn o lweel, kwɛn ndɛ asuo obvɛ o ndɛ ola baal bueel.

33 Ee, opfel o Nziã oli ngamfɛn!

Ãyal y’oyɛɛ b’eyɛɛ Nziã oli ye dzio!

Wu okoo k’ayɛɛ m’ekuru Nziã nã?

Wu okoo k’akwaal otsɛn o m’ewɛɛ Nziã nã? 34 Ɔ̃nkaan a Nziã oyɛɛn bubu:

«Ke yam, wu oyɛɛ ãtsam ã Mfam nã?

Ɔ̃mpa-luo a ndɛ nã?

35 Wu awi ndɛ ɛ̃kwel nã,

kwɛn ndɛ abveel ndɛ ɔ̃nkaal?✝11.35 Edz 40.13; Dzb 41.3»

36 Ke ngwel wɛ, bvieel eli bvi ndɛ, asi bvɛ me nkuul a ndɛ, bvool me ndɔɔ a ndɛ. Yɔɔl kwɛn alweel ndɛ ɔ̃bu! Amɛn!