Gênesis 3

माणहान पापी एय जाणेन वर्णन

1 यहोवा बोगवान जोला जेंगली जेनवार बाणायेल इतो, ता आखाम रेन गेयड़ेक लाबाड़ इतो;✝3:1 प्रकाशितवाक्य 20:2 एने तो बायकुह केयो, "काय खेरीच बोगवान तुमूह कियेल हे, काय तुमू ज्या बोगिचान काल्लाच बी जाड़ान फोल मा खाहो?"

2 तेवी बायकु गेयड़ेकाह जापाप आपी, "आमु ज्या बोगिचान जाड़ान फोल खाय सेकतेह। 3 पुण जो जाड़ बोगिचान विची माय हे, तान फोलान बाराम बोगवान कियेल हे काय तुमू तान फोल मा खाहो एने ताह आथेलहो बी मा, नाह ते मोर जाहो।"

4 तेवी गेयड़ेक बायकुह केयो, "तुमू खेरीच नाय मुरहो, 5 काहाकाय बोगवानाह सोता मालुम हे काय जेदिह तुमू ता जाड़ान फोल खाहो तेदिहच तुमरा डोला उगड़ी जाती, एने तुमू हाजो बाकतान इकेल सापड़ावीन बोगवानान बाराबोर बोण जाहो।"✝3:5 यहेजकेल 28:2

6 तेवी बायकु देखी काय फोल खाणेन केरता हाजो हे, एने देखाणेम बी हाजो हे, एने इकेल आपण्यो हे, तेवी ती ताह तोड़ीन खादी; एने तीन एदम्याह बी आपी, एने तो बी ताह खादो। 7 तेवी ता दुयान डोला उगड़ी गीया, एने ताह मालुम पोड़नो काय ता नांगेरलाच हेते; ता माय ता अंजीरान डाले हिवीन सेरीराह वेटाल लेदा।

8 जेवी यहोवा बोगवान हांजीन टेम माय बोगीचा माय फिरतालो ता ज्य होमल्या, तेवी आदम एने तान बायकु बोगिचान जाड़ान विची माय लिकाय गीया। 9 तेवी यहोवा बोगवान आदामाह आयड़ीन फुशो, "तु का हे?"

10 तो केयो, "मी तारो आवाज बोगिशाम होमलीन बिय गीयो, काहाकाय मी नांगरलोच इतो; केरीन लिकाय गीयो।"

11 यहोवा बोगवान केयो, "तुवाह कुण केयो काय तु नांगरलोच हे? जा जाड़ान फोल तुवाह खाणेन मोना किरेल इतो, काय तु तान फोल खाईल हे?"

12 आदम केयो, "जी बायकुह तु मार हेरी रेणेन आपेल हे तीच ता जाड़ान फोल माहु आपी, एने मी खादो।"

13 तेवी यहोवा बोगवान बायकुह केयो, "तु ज्य काय किरेल हे?" बायकु केयी, "गेयड़ेक माहु फासाड़ देनो, तेवी मी खादी।"

बोगवानान नियाव

14 तेवी यहोवा बोगवान ता गेयड़ेकाह केयो, "तु ज्य किरेल हे तान केरता तु आखा पालन्या जेनवेराह, एने जेंगली जेनवार माय रेन वोदार हाराप माय हे; तु पेटान बोरहे लोल्या किरहे एने जीवणो बोर माटड्यो चाटती रिहे। 15 एने मी तारो एने ज्यी बायकुन विचीम, एने तारी वोसीन विचीम दुसमोनाय पायदा केरूह; तो तारा मुंडाह चेंद देय, एने तु तान पायाह चावहे।"✝3:15 प्रकाशितवाक्य 12:17

16 उवतो तो बायकुह केयो, "मी तारी पिड़ा एने तारो पेटावाली एणेन दुखाह जुलूम वोड़ावुह; तु दुख वेठीन सोरा पायदा किरहे; एने तारी लालुच तारा एदम्या उगे रेय, एने तो तार पोर आदिकार मेली।" 17 एने आदमाह तो केयो, "तु जो तारी बायकुन वात हुमल्यो, एने जा जाड़ान फोलान बारामाय मी तुवाह उकुम आपेल इतो काय तु ताह मा खाहे, एने ताह तु खाईल हे। केरीन बुय तार कारेण हारापवाली हे, तु जीन कामाय जीवणो बोर दुखा माय खाया किरहे; 18 एने बुय तार केरता काटा उगाड़ी, एने तु खेतान कामाय खाहे; 19 एने तारा मुंडान उबारो गालीन रूटो खाया किरहे, एने सेवली बुखेत माटड्या माय मिलाय जाहे; काहाकाय तु ताच माय रेन बुणेल हे, तु माटड्योच ते हे एने तु माटड्याच माय पुशो बेचकाय जाहे।"

20 आदम तान बायकुन नाव हवा मिल्यो; काहाकाय जोला माणहे जिवताला हेते ता आखान वेगाली आहख तिच बोणनी। 21 एने यहोवा बोगवान आदम एने तान बायकुन केरता चामड़ान फाड़का बाणावीन ताह पेराव दिनो।

आदम हवा वाटिकाम रेन निकालनो

22 उवतो यहोवा बोगवान केयो, "माणुह हाजा बाकतान ग्यान सापड़ाविन आपु माय रेन एक हारको बोण जाईल हे; केरीन एवी ओहलो नाय एणे जुवे काय ता पोशा जीवणान जाड़ान फोल बी तोड़ीन खाय लेय एने जेलेम जिवताला रेय।" 23 केरीन यहोवा बोगवान ताह अदन बोगिशाम रेन काढ़ दिनो काय तो ती बुई पोर खेती केरी जी माय रेन तो बाणाय जाईल इतो। 24 केरीन आदामाह बोगवान तारेन काड़ दिनो, एने जीवणान जाड़ान वाटीन राखवाली केरनेन केरता अदन बोगिचान पुर्व उगे करूबाह,*3:24 करूबाह खास बातीन हेरोगदुत जान फाके हेते। एने चारो चोमखेर फिरणार आक्‍ठान तालवारीह बी मेल दिनो।✝3:24 यहेजकेल 28:16