1 पुरा दुय वोरह्या एय गीया, तेवी फिरोन ज्यो होपनो दिख्यो काय तो निल नेदीन मीरे उब रिनोह। 2 एने ती नेदी माय रेन सात हाजाल्यु, मात माताल्यु गायु निकलीन नेदीन दिड़े वालो चारो चेरने बाज गीयु। 3 उंजु, काय दिख्यो काय त्युन पासाण उंजु सात गायु, ज्यु पातल्यु एने लोकड़ायेल हेत्यु, नेदीम रेन बाहेर निकेलन्यु; एने दिहऱ्यु गायुन आहने नेदीन मीरे जाएन उबरेय गीयु। 4 तेवी ज्यु पातल्यु एने लोकड़ायेल गायु त्यु सात हाजाल्यु एने मात माताल्यु गायुह खाय गीयु। तेवी फिरोन जाग गीयो। 5 एने तो पुशो हुव गीयो एने दिहरो होपनो दिख्यो काय एक केणहा माय रेन सात जाड़ल्यु एने हाज हाज्यु उंब्यु निकेलन्यु। 6 उंजु काय दिख्यो काय तान पासाण सात पातल्यु एने पुर्व उगे वाला दोपान जाव माय कोमायेल उंब्यु निकेलन्यु। 7 एने ज्यु पातल्यु उंब्यु त्यु सातु जाड़ल्यु एने एनाम बोरायेल उंब्युह गिल लेद्यु। तेवी फिरोन जागनो एने ताह मालुम पोड़नो काय ज्य होपनोच हे। 8 दिहरी दिह वेगोच फिरोनान मोनाम चिन्ता एनी; एने तो मिस्र देसान आखा बोड़वा एने कागेल पांड्याह हादाड़ मुकल्यो; एने ताह तान होपनो केयो; पुण ता माय रेन काल्लोस बी तान मतलब केय नाह सेक्यो।✝

9 तेवी पिवाड़नारान आदिकारीह युसूफान एर आवी, एने तो फिरोनाह केयो, "मारो गुनो आज माहु एर आयेल हे; 10 जेवी तु तारा पावरा पोर मतलब मार पोर एने रांदणारान आदिकारी पोर रागायेल इतो, तेवी राखवाल्यान आदिकारीन गेर जेलीम टाक दियेल इतो। 11 तेवी आमु दुयू एकीच राती माय आप-आपणो एण्यान गेत होपनो देख्या; 12 एने ता आमरी हिऱ्यो एक इब्री जुवान इतो, जो राखवाल्यान आदिकारीन पावोर इतो; तेवी : आमु ताह आमरा होपनान बाराम केया, एने तो आमरा माय रेन एक-एकान होपनान आर्थो तो केय दिनो। 13 एने जोहलो-जोहलो आर्थो तो आमुह कियेल इतो, तिहेच केरीन एनो बी, मतलब माहु ते मारो पोद पोशो जुड़नो, पुण तो फासी पोर लेटकाड़ाय गीयो।"

14 तेवी फिरोन युसूफाह हादाड्यो। तेवी ताह चालुच जेलीम रेन बाहेर काड़ाय गीयो, एने तान लेट्या काटाड़ीन, एने फाड़का बोदलीन तो फिरोनान सामने आवो। 15 फिरोन युसूफाह केयो, "मी एक होपनो दिखेल हे, एने तान आर्थो केणार कुण बी नाय मिले; एने मी तार बाराम हुमलेल हे, काय तु होपनो होमेलताच तान आर्थो केय सिकेह।"

16 युसूफ फिरोनाह केयो, "मी कायच नाह जाणेत : पुण बोगवानुच फिरोन ने केरता हाजालो वचन आपी।"

17 उवतो फिरोन युसूफाह केणे बाज गीयो, "मी होपना माय दिख्यो, काय मी निल नेदीन मीरे उबरिनोह। 18 ओवतो काय दिख्यो, काय नेदीम रेन सात माताल्यु एने हाज हाज्यु गायु निकलीन मीरे वालो चारो चेरने बाज गीयु। 19 पुशो काय दिख्यो, काय त्युन पासाण पोशु सात गायु निकेलन्यु, जी जुलूम लुलाल्यु, एने लोकड़ायेल हेत्यु; मी ते आखा मिस्र देसाम ओहल्यु लुलाल्यु गायु केदीच नाह दिख्यो। 20 ज्यु लुलाल्यु एने लोकड़ायेल गायु त्यु पेल्ल्यु सात मात-माताल्यु गायुह खाय गियु। 21 एने जेवी त्यु, त्युह खाय गियु तेवी ज्य मालुम नाह पोड़तालो काय त्यु त्युह खाय जायेल हेत्यु, काहाकाय त्यु पेलुन गेत जोहल्युन तोहल्युच लोकड़ायेलच रेन्यु। तेवी मी जाग उठनो। 22 पुशो मी दिहरो होपनो दिख्यो, काय एकुच टोटाला माय रेन सात हाज-हाज्यु दाणा माय बोरायेल उंब्यु निकेलन्यु। 23 पुशो काय देखथु, काय तान पासाण उंजु सात चिमायेल चिमायेल एने पातल्यु एने पुर्व उगे वाला दोपान जावा माय कोमायेल उंब्यु निकेलन्यु। 24 एने त्यु पातल्यु उंब्यु त्यु सात हाज हाज्यु उंब्युह गिल लेद्यु। ज्याह मी बोड़वाह केयो, पुण ज्यान बाराम सोमजाड़नार कुण नाह सापड़नो।"

25 तेवी युसूफ फिरोनाह केयो, "फिरोनान दुयू बी होपनान आर्थो एकुच हे, बोगवान जो काम केरने हुदेह, ताह तो फिरोनाह देखाड़ेल हे। 26 त्यु सात हाज-हाज्यु गायु वोरह्या हेते; एने सात हाज-हाज्यु उंब्यु बी सात वोरह्या हेते; एने दुयू बी होपना एक हारकास हेते। 27 उंजु त्युन पासाण ज्यु लुलाल्यु एने लोकड़ायेल गायु निकेलन्यु, एने सात चिमायेल एने पुर्व उगे वाला दोपान जावा माय कोमायेल उंब्यु निकेलन्यु, त्यु कालान सात वोरह्या हेते।"

28 ज्यी तीच वात हे, बोगवान जो काम केरने हुदेह, तो फिरोनाह देखाड़ेल हे, तोच मी तुवाह केथु। 29 हुमेल, आखा मिस्र देसाम सात वोरह्या ते जुलूमच पाकीन रेती। 30 एने तान पासाण सात वोरह्या कालान आवती, एने काल उलो मुठो पोड़ी काय हाजाली पाक एने कामाय मिस्र माय कुणीह इर वोर नाय रेय। 31 एने जुलूम हाजाला कालान पाक ज्या देसाम पोशो एर नाय रेय, काहाकाय काल जुलूम मोठो रेय। 32 एने फिरोन जो दुय वारीन होपनो दिखेल इतो, ज्यान आर्थो ज्योच हे काय ज्यी वात बोगवाना उगे रेन ठेराय जायेल हे, एने बोगवान ज्याह उतवाल्योच पुरो केरी।

33 केरीन एवी फिरोन एगदा सोमेजदार एने उशार माणहाह होदीन ताह मिस्र देसान प्रदानमंत्री बाणावी। 34 फिरोन ज्य केरी काय देसा माय आदिकाऱ्याह निवाड़े; एने जाहुख हाजाला कालान सात वोरह्या रेय, ताहुक वोर तो मिस्र देसान पाकीन पाचवो ईसो टुलो केरी। 35 एने ता ज्या हाजाला वोरह्या माय सोब बातीन खाणेन वोस्तु टुलो केरी, एने हेयरा हेयराम गोडाम गेर खाणान केरता, फिरोनान ताबाम केरीन ताह होमाले। 36 एने ती खाणेन वोस्तु आवणार कालान ता सात वोरह्यान केरता, वापेर एय, तेवी कालान सात वोरह्याम बी मिस्र देस खेतेम नाय एय।

37 ज्यी वात फिरोन एने तान आखा आदिकारीह हाजी लागी। 38 केरीन फिरोन तान आदिकारीह केयो, "काय आपुह ओहलो एदमी, जोहलो ज्यो हे, जा माय बोगवानान जीव रिथे, सापड़ी सेकी?" 39 तेवी फिरोन युसूफाह केयो, "बोगवान तुवाह ओली इकेल आपेल हे, काय तार बाराबोर सोमेजदार एने उशार कुण नाय मिले; 40 केरीन तु मारा गेरान आदिकारी रिहे, एने मारी आखी पोरजा तारो उकुम मानीन चाली; मी निस्तो राजगादिन बारा माय तुवाह रेन मुठो रेह।"✝ 41 पुशो फिरोन युसूफाह केयो, "हुमेल, मी तुवाह आखा मिस्र देसा पोर आदिकारी ठेराव देथु।" 42 तेवी फिरोन तान आथावाली मुंदी काढ़ीन युसूफान आथाम पेराव दिनो; एने ताह हाजला हुवाल्ला फाड़का पेराव दिनो, एने तान गेलाम होनान हाकोल पेरायो;✝ 43 एने ताह तान दिहरा तांगाम बोहाड्यो; एने माणहे तान ओंगाण-ओंगाण ज्य पारचार किरतेन चालना, काय मांड्या वोलीन वुंदो एने फिरोन ताह आखा मिस्र देसा पोर प्रदानमंत्री बाणायो। 44 ओवतो फिरोन युसूफाह केयो, "मी ते मिस्र देसान राजा ते हे, पुण आखा मिस्र देसान माणहा माय रेन कुण बी तारा उकुमा सावाय आथ पाय नाय आलवी सिके।"

45 फिरोन युसूफान नाव सापनत पानेह* मिल्यो। एने ओन हेयरान चाकऱ्या पोतीपरान सोरी आसनत हिऱ्यो तान वाराड़ केराव दिनो। एने युसूफ आखा मिस्र देसाम फिरने बाज गीयो।

46 जेवी युसूफ मिस्र देसान राजा फिरोनान चाकरी केरतालो, तेवी तो तीस वोरह्यान इतो; तेवी तो फिरोनान ओंगाण रेन निकलीन आखो मिस्र देस फिरीन देखणे बाज गीयो। 47 हाजाला कालान सात वोरह्या वोर बुय जुलूमच एन पाकाड़ती रेनी। 48 युसूफ ता सात वोरह्याम आखी बातीन खाणेन वोस्तु जी मिस्र देसाम पाकतालो, तो टुलो केरीन हेयराम मेलती गीयो, एने एकेक हेयरान कावदेन वाला खेतान एन तो ताच हेयराम टुलो किरते रिनो। 49 इह केरीन युसूफ एनाह देरीयान रेटान बाराबोर जुलूम वोस्तु टुलो केरीन मिल्यो; ओलो वोर काय तो गेणने सोड़ दिनो; काहाकाय त्यु जुलूम होवट्यु एय गियु।

50 कालान पेल्लो वोरीह आवणेन पेल युसूफान दुय सोरा, ओन ने चाकऱ्या पोतीपरान सोरी आसनत उगे रेन पायदा एना। 51 एने युसूफ तान जेठाला सोरान नाव ज्य किन मनश्शे* मिल्यो, "काय बोगवान माहु मारो आखो दुख, एने मारा आबाख ने आखो गेराणो विहराव दिनो।" 52 एने दुसरा सोरान नाव तो ज्य किन एप्रेम* मिल्यो, काय माहु दुख बोग्तण्या देसाम बोगवान वोदाड़ेल हे।

53 एने मिस्र देसान होवठाईन हाजाली पाकीन सात सात वोरह्या निवरी गीया। 54 एने युसूफ कियेल तीह केरीन सात वोरह्यान केरता काल चालु एय गीयो। आखा देसाम काल पोड़ने बाज गीयो; पुण आखा मिस्र देसाम एन एतो।✝ 55 जुलबुखे आखो मिस्र देस बुखल्यो मोरने बाज गीयो; तेवी पोरजा फिरोन फाय आयड़ी-आयड़ीन खाणो मांगणे बाज गीया; तेवी फिरोन ता आखा मिस्र देसान माणहाह केयो, "तुमू युसूफ फाय जावो; एने जो काय तो तुमूह केय, तोच किरो।" ✝ 56 केरीन जेवी काल आखी देरती पोर पोसरी गीयो, एने मिस्र देसाम जुलूम मुठो काल पुड़नो तेवी युसूफ आखा गोडाम उगाड़ीन-उगाड़ीन मिस्रीह एन वेचणे बाज गीयो। 57 केरीन आखी देरतीन माणहे मिस्र देसाम एन वेचातो लेणेन केरता युसूफ फाय आवणे बाज गीया, काहाकाय आखी देरती पोर जुलूम मुठो काल पुड़ेल इतो।