1 पुण बोगवान नुह एने जोला जेंगली जेनवारे, एने पालन्या जेनवारे, ता हेऱ्या डोंडह्याम एता, ता आखाह ईर मिल्यो; एने बोगवान देरती पोर वारो चालाड्यो, एने पाणी गेटणे बाज गीयो; 2 एने उन्डाला देरीयान जिरे बी बोंद एय गीया, ता माय जो मुहोल दाऱ्यो पाणी पोड़तालो तो बी इट गीयो। 3 एने एक होव पाचाह दिह्यान पासाण पाणी देरती पोर रेन लागातार आटणे बाज गीयो। 4 एने सातवा मोयनान सेतरावी दिह्याह, डोंडह्यो आरारत नावान बोयड़ा पोर टेक गीयो। 5 एने पाणी दोहवे मुय ने वोर आटती गीयो, एने दोहवा मोयनान पेल्ले दिह बोयड़ान चुटा देखाणे बाज गीया।

6 ओवतो ओहलो एनो काय चालीह दिह्यान पासाण नुह तान बाणायेल डोंडह्यान खिड़की उगाड़ीन, 7 एक कागलाह उड़ाव दिनो; पुण तो पाणी आटता वोर न्यान पोला उड़ती फिरती रेनो। 8 पुशो नुह ता फाय रेन पेरवीह बी उड़ाव दिनो काय देखी काय पाणी बुई पोर आट गीयो काय नाह। 9 पुण ती पेरवीह तीन पाय टेकाड़नेन केरता काय आदार नाह जुड़नो, केरीन तो डोंडह्याम पोशो फिरीन आवी, काहाकाय आखी देरती पोर उंजु वोर पाणीच एतो, तेवी तो आथ बाहेर काड़ीन ताह डोंडह्याम रिगाड़ लिदो। 10 तेवी पुशो सात दिह थोबीन, तो तीच पेरवीह डोंडह्या माय रेन पुशो उड़ाव दिनो। 11 एने पेरवी हांजीन टेम माय ता फाय आव लागी, तेवी तीन चाचड़ाम जेतुन जाड़ान एक कोवल्लो पान्‍टो हे; ता माय नुह जाण लिदो, काय देरती पोर पाणी आट जायेल हे। 12 पुशो तो सात दिह थोबीन, तिच पेरवीह उड़ाव दिनो, एने ती ता फाय पोशी केदी फिरीन नाह आवी।

13 नुहान वोय सोव होव एक वोरह्यान पेल्ले दिह देरती पोर रेन पाणी हुख गीयो। तेवी नुह डोंडह्यान खिड़की उगाड़ीन दिख्यो काय देरती हुक जाईल हे। 14 एने दुसरा मोयनान सत्ताविसवा दिह्याह देरती हास केरीन हुक गियी।

15 तेवी बोगवान नुहाह केयो, 16 "तु तारा बायकु एने सोरा, एने वोवड्युक लेन डोंडह्याम रेन बाहेर निकलीन आव। 17 एने तार हेऱ्या जोला चिड़ा, एने जेनवारे बुई पोर लोलनारे जीव जेन्तु, न्या आखाह डोंडह्याम रेन बाहेर काड़ीन लाव काय ता देरती पोर जुलूम वियाती, एने ता फुले फोले एने देरतीह पोशा बोर देय।" 18 तेवी नुह एने तान बायकु, सोरा, एने वोवड्युक डोंडह्याम रेन बाहेर निकलीन आवा। 19 एने ता हेऱ्या आखा जेनवारे, लोलनारे जीव जेन्तु, चिड़ा, एने जाती जातीन जोड़ी जोड़ी केरीन डोंडह्या माय रेन बाहेर निकलीन आवा।

20 तेवी नुह बोगवानान केरता एक वेदी बाणायो; एने आखा चोखाला जेनवारे एने आखा चोखाला चिड़ाम रेन थोड़ थोड़ाक लेन वेदी पोर होमबोली केरीन चेड़ायो। 21 तेवी यहोवा बोगवान हुक आपणार गेंद लिदो, एने खुस इन सुच्यो, "माणहाह देन्ड आपणेन केरता देरतीह पुशो केदी उहलो हाराप नाय आपु, माणहान मोना माय, सोरान वोईम रेच ने रेन जो काय निकलेह तो खाराबुच रिथे; तीबी जिहकेरीन मी सोब जीवाह एवी मारेल हे, इहकेरीन ताह पुशो केदी नाय मारू। 22 एवी रेन जाहुक वोर देरती बोणीन रेय, ताहुक वोर पेरने एने काटणेन टेम, हियालो, एने उनालो एने जेठवेड़, दिह एने रात इतीच रेती ता केदी थुबे नाय।"